ބޭސް ފޮނުވާ ޕައިލެޓް ޕްރޮގްރާމް ފަށަން ދެ ޑްރޯން ރާއްޖެ ގެނެސްފި

އެއްތަނުން އަނެއްތަނަށް ބޭސް ފޮނުވަން ޕައިލެޓް ޕްރޮގްރާމްއެއް ފެށުމަށް ދެ ޑްރޯން ރާއްެޖެ ގެނެސްފިއެވެ.
ރާއްޖެއަށް ބޭސް އެތެރެކުރާ ސަރުކާރުގެ ކުންފުނިން ސްޓޭޓް ފާމާއިން ކުރިން ބުނެފައިވާ ގޮތުން ބޭސް ގެންދަން ޑްރޯން ބޭނުންކުރަން ޕައިލެޓް ޕްރޮޖެކްޓް ފަށާނީ އަންނަ އަހަރުގެ ކުރީކޮޅުއެވެ. އަދި އެއަށް ފަހު އެކަން މުޅި ރާއްޖެއަށް ފުޅާކުރަން ނިންމާފައިވާ ކަމަށް އެ ކުންފުނިން ހާމަކޮށްފައިވެއެވެ.
ސްޓޭޓް ފާމާގެ މެނޭޖިން ޑިރެކްޓަރު ޑރ. ޝާހު މާހިރު ވިދާޅުވީ ބޭސް ފޮނުވަން ބޭނުންކުރާ ދެ ޑްރޯން ހެލްތު މިނިސްޓްރީން ރާއްޖެ ގެނެސް މިހާރު ސްޓޭޓް ފާމާއާ ހަވާލުވެސްކޮށްފައިވާ ކަމަށެވެ. އަދި މިހާރު ތައްޔާރުވަމުންދަނީ ޑްރޯން ސަޕްލައިކުރި ކުންފުންޏާ ގުޅިގެން ޕައިލެޓް ޕްރޮޖެކްޓް ފަށަންވާއިރަށް ޑްރޯން ބޭނުންކުރަން މީހުން ތަމްރީންކުރުމަށް ކަމަށެވެ.
ރާއްޖެ ގެނައި ޑްރޯންގައި ފަސް ކިލޯ ލޯޑު ކުރެވޭނެކަމަށް ވެސް ޑރ. ޝާހު ވިދާޅުވިއެވެ.
ސްޓޭޓް ފާމާއަށް ކޮންމެ ދުވަހަކު ވެސް ދުއިއްސައްތައެއްހާ އޯޑަރުގެ ބޭސް ލިބެއެވެ. އެތަކެތި މިހާރު ފޮނުވަމުންދަނީ ވައިގެ މަގުންނާއި އަދި ކަނޑުމަގުން ކަމަށްވާއިރު ބައެއް ފަހަރު ބޭސް ލިބުން ލަސްވެއެވެ.




ކޮމެންޓް
މި ލިޔުމަށް ކޮމެންޓް ކުރުން ވަނީ ބަންދުކޮށްފައެވެ.