ޤަވައިދާ ޚިލާފަށް އުޅެމުންދިޔަ އަށް ބިދޭސީއަކު އަތުލައިގެންފި
ޤަވައިދާ ޚިލާފަށް އުޅެމުންދިޔަ އަށް ބިދޭސީއަކު އަތުލައިގެންފިއެވެ.
އިމިގްރޭޝަންއިން މިއަދު އެކްސްގައި ކުރި ޕޯސްޓެއްގައި ބުނީ އެ ބިދޭސީންތައް އަތުލައިގަތީ އިއްޔެ އެ އިދާރާގެ ޓާސްކު ފޯސްއިން މާލެ ސަރަހައްދުގައި ހިންގި ރެއިޑް އޮޕަރޭޝަންއެއްގެ ތެރެއިން ކަމަށެވެ.
ކެފޭއާއި ޓޭކްއަވޭ ތަންތަން ބަލައި ފާސްކޮށް ހިންގި އެ އޮޕަރޭޝަންގައި ޖުމްލަ 16ބިދޭސީއަކު ބަލާ ފާސްކުރި އިރު އޭގެ ތެރެއިން ނުގަވައިދުން އުޅެމުން ދިޔަ އަށްބިދޭސީއަކު ފާހަގަވި ކަމަށް ވެސް ބުންޏެވެ.
އެހެންވެ އެ އަށް ބިދޭސީން އިމިގްރޭޝަންގެ ބެލުމަށް ދަށަށް ގެންގޮސްފައިވާ ކަމަށް ވެސް ބުންޏެވެ.
މި ސަރުކާރުން ވެރިކަމަށް އައުމަށް ފަހު ގަވައިދާ ހިލާފަށް އުޅޭ ބިދޭސީން މަދުކުރަން ދަނީ ގަވައިދުން އޮޕަރޭޝަންތައް ހިންގަމުންނެވެ.
މި ސަރުކާރުން ވެރިކަމާ ހަވާލުވި ފަހުން 12،000އަށް ވުރެ ގިނަ ބިދޭސީން އަނބުރާ ގައުމަށް ފޮނުވާލައިފައިވެއެވެ. އޭގެ ތެރޭގައި ޑީޕޯޓްކޮށްފައިވާ ފަރާތްތަކާއި، އެނޫން ވެސް ގޮތްގޮތަށް ފޮނުވާލާފައިވާ ފަރާތްތައް ހިމެނޭކަމަށާއި އަދި އިމިގްރޭޝަނުން ޑީޕޯޓްކުރި ބިދޭސީންގެ ތެރޭގައި ރާއްޖޭގައި ޤަވާއިދާއި ޚިލާފަށް ވިޔަފާރިކުރާ މީހުންނާއި، ޑޮކިއުމަންޓުތައް ފުރިހަމަ ނޫން މީހުން ގިނަ އަދަދަކަށް ހިމެނޭކަމަށް ހޯމް މިނިސްޓްރީން ބުނެފައިވެއެވެ.





ކޮމެންޓް
މި ލިޔުމަށް ކޮމެންޓް ކުރުން ވަނީ ބަންދުކޮށްފައެވެ.