Wednesday, 18 November 2026
Advertisement
Ooredoo — Airfibre (leaderboard)
ޚަބަރު

ވޭޕް މަނާނުކުރި ނަމަ ރާއްޖެ މިހާރު އޮންނާނީ ބިރުވެރި ހާލަތެއްގައި: ރައީސް

ވޭޕް މަނާނުކުރި ނަމަ ރާއްޖެ މިހާރު އޮންނާނީ ބިރުވެރި ހާލަތެއްގައި: ރައީސް

ވޭޕް މަނާކުރުމާއި ޖެނެރޭޝަން ބޭންއަކަށް ނުދިޔަނަމަ ރާއްޖެ އޮންނާނީ ބިރުވެރި ހާލަތަކަށް ގޮސްފައިކަމަށް ރައީސް ޑރ. މުހައްމަދު މުއިއްޒުވިދާޅުވެއްޖެއެވެ.

އެމަނިކުފާނު މިފަދައިން ވިދާޅުވީ ރައްޔިތުންގެ ސަރުކާރަށް ތިން އަހަރު ފުރުމާ ގުޅިގެން ހާސިލުކުރި ކާމިޔާބީ ފާހަގަކުރުމަށް ރޭ ހުޅުމާލޭ ސެންޓްރަލް ޕާކުގައި ބޭޢްވި ހަފުލާގައި ވާހަކަފުޅުދައްކަވަމުންނެވެ.

ޒުވާނުންގެ ދުޅަހެޔޮކަމާއި ސަރުކާރުން ގެންގުޅުއްވާ ޕްރިވެންޓިވް ސިޔާސަތުތަކުގެ މައްޗަށް އަލިއަޅުވާލައްވާ ރައީސުލްޖުމްހޫރިއްޔާ ރޭ ދެއްކެވި ވާހަކަފުޅުގައި، އެމަނިކުފާނަކީ ގައުމަށްޓަކައި އަންޕޮޕިއުލާ ޑިސިޝަންސް (އާންމުން ނުރުހޭ، ނުވަތަ ގިނަ ބަޔަކު އެކަމަކާ ދެކޮޅުހަދާ ފަދަ ނިންމުންތައް) ނަންގަވާ ބޭފުޅެއްކަމުގައި ވިދާޅުވިއެވެ.

އެގޮތުން ވޭޕް މަނާކުރުމާއި ޖެނެރޭޝަނަލް ބޭން ތަޢާރަފު ނުކުރިނަމަ ކަންވެގެންދާނެގޮތުގެ މިސާލެއް ޖައްސަވަމުން ރައީސުލްޖުމްހޫރިއްޔާ ވިދާޅުވީ، ވޭޕް މަނާ ނުކުރިނަމަ އެންމެ ތުއްތު ކުއްޖާ ވެސް ސްކޫލަށް، ޤުރުއާން ކްލާހަށް، ކުޅެން ނޫންނަމަ އެހެންތާކަށް ދިޔަޔަސް ގޮސް ވަދެވޭނީ މުޅިން ނުބައި މާހައުލަކަށް ކަމުގައި ވިދާޅުވިއެވެ. ހަމައެގޮތަށް ޖެނެރޭޝަނަލް ބޭން ވެސް އަންޕޮޕިއުލާ ކަމަކަށްވިޔަސް، އެކަން ކުރެއްވީ ދުންފަތުގެ އިސްތިޢުމާލު ކުރަން ނުފަށާ ކުދިންނަށް، އަދި އެކަމަށް ހުށަނޭޅޭ ކުދިންނަށް ކުރީބައިގައި އެކަން މަނާކުރުމަށް ކަމުގައި އެމަނިކުފާނު ވިދާޅުވިއެވެ.

ރައީސުލްޖުމްހޫރިއްޔާގެ ވާހަކަފުޅުގައި ރާއްޖެއަކީ މިކަން މަނާކުރި ފުރަތަމަ ގައުމު ކަމަށާއި މިއާއެކުގައި މިހާރު އެހެން ގައުމުތަކުން ރާއްޖެ މިސާލަކަށް ބަލައި، އެކަން އެގޮތަށް ކުރަމުންދާ ކަމުގައި ވިދާޅުވިއެވެ. ރާއްޖެއިން މިކަންކަމުގައި އެޅި ފިޔަވަޅުތަކާއި ގާތަށް ވެސް އެހެން ގައުމުތަކުން އެކަންކަމުގައި ފިޔަވަޅު އަޅަން ފަސްޖެހިފައިވާ ކަމުގައި ރައީސުލްޖުމްހޫރިއްޔާ ވިދާޅުވިއެވެ. އަދި ރާއްޖެއަކީ ކިތަންމެ ކުޑަ ޤައުމަކަށް ވިޔަސް އަޅުގަނޑުމެންގެ ހިތް މާބޮޑު ކަމަށާއި، އިޚުލާސްތެރިކަން ބޮޑުކަމަށާއި ގައުމުދެކެވާ ލޯބި މާބޮޑު ކަމުގައި އެމަނިކުފާނު ވިދާޅުވިއެވެ.



ރިއެކްޝަން

Advertisement
Ooredoo — Square (box)

ކޮމެންޓް

މި ލިޔުމަށް ކޮމެންޓް ކުރުން ވަނީ ބަންދުކޮށްފައެވެ.