މި ތިން އަހަރު ތެރޭގައި 4061 ޒުވާނުންނަށް ލުއި ލޯނުގެ އެހީ ފޯރުކޮށްދެވިއްޖެ: ރައީސް

މި ވެރިކަމުގެ ތިން އަހަރު ތެރޭގައި 4061 ޒުވާނުންނަށް އެކިކަހަލަ ލުއި ލޯނު ފެސިލިޓީ ފޯރުކޮށްދެވިފައިވާކަމަށް ރައީސް ޑރ. މުހައްމަދު މުއިއްޒު ވިދާޅުވެއްޖެއެވެ.
އެމަނިކުފާނު މިފަދައިން ވިދާޅުވީ ރައްޔިތުންގެ ސަރުކާރަށް ތިން އަހަރު ފުރުމާ ގުޅިގެން ހާސިލުކުރި ކާމިޔާބީ ފާހަގަކުރުމަށް ރޭ ހުޅުމާލޭ ސެންޓްރަލް ޕާކުގައި ބޭޢްވި ހަފުލާގައި ވާހަކަފުޅުދައްކަވަމުންނެވެ.
ރައީސް ވިދާޅުވީ އިގުތިސާދީ ގޮތުން ޒުވާނުން ބާރުވެރިކުރުމަށް އަމާޒުކޮށް ސަރުކާރުން ވޭތުވެދިޔަ ތިން އަހަރު ތެރޭގައި ފައިނޭންސިން ފުރުސަތު ވަރަށް ލުއި ގޮތެއްގައި ފޯރުކޮށްދެވިފައިވާ ކަމަށެވެ.
އެގޮތުން އަންހެން ވިޔަފާރިވެރީންނަށް ހާއްސަ ފައިނޭންސިން، ކޮންޓެންޓް ކްރިއޭޓާ ފައިނޭންސިން، ޒުވާން ވިޔަފާރިވެރިންނަށް ހާއްސަ ފައިނޭންސިން، ފަށާ މަދަދު ފައިނޭންސިން، ތިޖާރާ ރަށު ފަތުރު ފައިނޭންސިން ސްކީމް ފަދަ އެކިއެކި ފައިނޭންސިން ފުރުސަތުތަކުގެ ތެރެއިން އިގުތިސާދު ބިނާކުރުމުގައި ޒުވާނުންގެ ދައުރު ވަރަށް ބޮޑަށް ފުޅާކުރެވިފައިވާކަން ރައީސުލްޖުމްހޫރިއްޔާ ހާމަކުރެއްވިއެވެ.
އެމަނިކުފާނުގެ ވާހަކަފުޅުގައި، މި ފުރުސަތުތަކުގެ އެހީގައި އެފަރާތްތަކުން އަމިއްލަ ކުދި ވިޔަފާރިތައް ފަށައިގެން، ނުވަތަ ފަށާފައިހުރި ވިޔަފާރިތައް ފުޅާކޮށް، ވަރުގަދަކުރަމުންދާ ކަމުގައި ރައީސުލްޖުމްހޫރިއްޔާ ވިދާޅުވިއެވެ. ކުދި އަދި މެދު ފަންތީގެ ވިޔަފާރިތަކަކީ ސަރުކާރުން ވަރަށް އިސްކަންދެއްވާ ދާއިރާއެއް ކަމުގައި ރައީސުލްޖުމްހޫރިއްޔާގެ ވާހަކަފުޅުގައި ފާހަގަކުރެއްވިއެވެ. އަދި އިންޑިވިޑުއަލް ޕްރޮސްޕެރިޓީ ހޯދަދިނުމަކީ ނުވަތަ އާންމު ރައްޔިތުން މުއްސަނދިކޮށްދިނުމަކީ ސަރުކާރުން ހާއްސަ އިސްކަމެއް ދެއްވާ ކަމެއްގެ ގޮތުގައި އެމަނިކުފާނު ފާހަގަކުރެއްވިއެވެ.




ކޮމެންޓް
މި ލިޔުމަށް ކޮމެންޓް ކުރުން ވަނީ ބަންދުކޮށްފައެވެ.