މައުމޫން ވިދާޅުވި ބަސްފުޅަކީ ދޮގުވެރި ކައްޒާބެއްގެ ބަހެއް: ޝެއިޚް އާދަމް ނިޝާން

މިޔުޒިކާއި ލަވަކިޔުމަކީ ހަރާމްކަމެއް ނޫން ކަމުގައި ކުރީގެ ރައީސް މައުމޫން ޢަބްދުލްޤައްޔޫމް ވިދާޅުވި ބަސްފުޅަކީ ދޮގުވެރި ކައްޒާބެއްގެ ބަސް ކަމުގައި ދީނީ ޢިލްމުވެރިޔާ ޝެއިޚް އާދަމް ނިޝާން ވިދާޅުވެއްޖެއެވެ.
އޮންލައިން ނޫހަކުން ކުރި ސުވާލަކަށް ޖަވާބު ދެއްވަމުން ރައީސް މައުމޫން ވިދާޅުވީ ރައްބު ހަރާމް ކުރެއްވި ކަންތައްތަކުގެ ތެރޭގައި މިއުޒިކް ކުޅުމާއި، ލަވަކިޔުން ނޯންނަ ކަމަށެވެ.
އެއްވެސް ކަމެއް ޙަރާމް ވާނީ މަތިވެރި ރައްބު އެކަމެއް ޙަރާމް ކުރެއްވުމުން ކަމަށާއި އެ އިލާހު ޙަރާމް ކުރެއްވި ކަންތައްތައް ކީރިތި ޤުރުއާނުގައި ބަޔާން ކުރައްވާފައިވާ ކަމަށް ރައީސް މައުމޫން ވިދާޅުވެފައިވެއެވެ. އަދި އެކަންކަމުގެ ތެރޭގައި މިއުޒިކު ކުޅުމާއި، ލަވަކިޔުން ނޯންނަ ކަމަށްވެސް ރައީސް މައުމޫން ވިދާޅުވިއެވެ.
ރައީސް މައުމޫން މިގޮތަށް ވިދާޅުވުމާ ގުޅިގެން ޝެއިޚް އާދަމް ނިޝާން ފޭސްބުކްގައި ލިޔުއްވި ޕޯސްޓެއްގައި ވިދާޅުވެފައި ވަނީ، އެއީ ދޮގުވެރި ކައްޒާބެއްގެ ބަސް ކަމަށެވެ.
"މިފަދަ މީހަކު، އިސްލާމްދީނުގައި ފަރުޟު ކުރެވިފައި ފަސް ނަމާދު އޮންނަ ކަމަށް، ކޮންމެ ނަމާދެއްގައި މިވެނި ޢަދަދަކަށް ރަކުޢަތް އޮންނަ ކަމަށް އަދި ނަމާދުގެ ޙަރަކާތްތަކާއި ކިޔަންވީ ދުޢާތައް ތެދު ކުރާނީ ކިހިނަކުން ހެއްޔެވެ؟ އަދި ހަމައެގޮތަށް ފިރިހެނުންނަށް ރަނާއި ފަށުވި ފޭރާން ޙަރާމްކަމަށް، އަނބިމީހާގެ ބޮޑު ދައިތައިންނާއި އެއްވަޤުތެއްގައި ކައިވެނި ކޮށްގެން އުޅުން ޙަރާމް ކަމަށް، ޙިމާރުގެ މަސްކެއުން ޙަރާމްކަމަށް، މީގެ އެއްވެސް ކަމެއް އަދި މިނޫން އެތައް ކަމެއް ވެސް ޙަރާމްކަމަށް ޤުރްއާނުގައި އެއްވެސް ދަލީލެއް ނެތެވެ." ޝެއިޚް އާދަމް ނިޝާން ވިދާޅުވިއެވެ.




.jpg)
.jpeg)
ކޮމެންޓް
މި ލިޔުމަށް ކޮމެންޓް ކުރުން ވަނީ ބަންދުކޮށްފައެވެ.