Tuesday, 17 November 2026
Advertisement
STO — McCoy (leaderboard)
ޚަބަރު

ވިލުފުށި އިހުތިޖާޖު: ބޯޑުތަކުގައި ޕްރިންސިޕަލާމެދު ހިތްހަމަނުޖެހުން، މީޓިންގ ގައި ހިއްސާ ކުރީ އެހެން ކަންބޮޑުވުންތަކެއް

ވިލުފުށި އިހުތިޖާޖު: ބޯޑުތަކުގައި ޕްރިންސިޕަލާމެދު ހިތްހަމަނުޖެހުން، މީޓިންގ ގައި ހިއްސާ ކުރީ އެހެން ކަންބޮޑުވުންތަކެއް

ތ. ވިލުފުށީ ސްކޫލްގެ ޕްރިންސިޕަލާ ގުޅޭގޮތުން ކަންބޮޑުވުންތަކެއް ފާޅުކޮށް، އެރަށުގެ ބައެއް ބެލެނިވެރިން ސްކޫލް ދޮރުމަތީގައި އިހުތިޖާޖު ކޮށްފިއެވެ.

"ދެން" އަށް އެނގިފައިވާ ގޮތުގައި ބައެއް ބެލެނިވެރިން ބޯޑުތަކެއް ހިފައިގެން އެސްކޫލު ދޮރުމަތީގައި އިހުތިޖާޖު ކުރަމުން، ސްކޫލްގެ ޕްރިންސިޕަލް އިސްތިއުފާ ދެއްވުމަށް ވެސް ވަނީ ގޮވާލާފައެވެ.

މިކަމާއި ގުޅޭގޮތުން "ދެން" އަށް މައުލޫމާތު ދެއްވަމުން ވިލުފުށި ކައުންސިލު ރައީސް ޙުސެއިން ޢަބްދުއްސަލާމް އާދަމް ވިދާޅުވީ ރަށުގެ ގާތްގަނޑަކަށް 15 ވަރަކަށް މީހުން ސްކޫލް ކުރިމަތީގައި އިހުތިޖާޖު ކުރިކަމަށާއި ނަމަވެސް އެއީ ކޮންކަމަކާ ގުޅިގެންކަން އެނގިފައި ނުވާ ކަމަށެވެ.

Advertisement
Ooredoo — Truecaller (box)

"ސްކޫލްގެ މެނޭޖްމަންޓުން މިއަދު ކައުންސިލާއި ބައްދަލުކުރި. ޕޭރެންޓު އެސޯސިއޭޝަންގެ ނައިބު ރައީސްއަކީ ބެލެނިވެރިންގެ ތެރެއިން އައްޔަނު ކުރާ މީހެއް. ސްކޫލް މިހާރު ހިންގުމާ ހަވާލުވެ ހުރީ ލީޑިންގ ޓީޗަރެއް. އެބޭފުޅާ އަޅުގަނޑުމެންނަށް މައުލޫމާތު ދިން ގޮތުގައި، ބެލެނިވެރިން ޕޭރެންޓް އެސޯސިއޭޝަންގެ ނައިބު ރައީސްއާ ބައްދަލުކުރީ ހެނދުނު. އެއީ ސްކޫލް މެނޭޖްމަންޓުން ބޭނުން ވެގެން. ސްކޫލް ހިންގުމާ ހަވާލުވެ ހުންނެވި މީހާ ބޭނުން ވެގެން ބައްދަލު ކުރީ. އޭގެ ކުރިން އިހުތިޖާޖުގައި ބައިވެރިވި އެއްވެސް މީހަކު ބައްދަލު ކުރަން އެދުނު ކަމަކަށް އަޅުގަނޑުމެންނަށް އެނގިފައެއް ނެތް" ކައުންސިލު ރައީސް ވިދާޅުވިއެވެ.

ޢަބްދުއްސަލާމް ވިދާޅުވީ މިއަދު ބައްދަލު ކޮށްފައި އެބޭފުޅުން ފާޅުކުރީ ތިން ކަންބޮޑުވުމެއް ކަމަށާއި، ނަމަވެސް އެ ތިން ކަންބޮޑުވުމުގެ ތެރޭގައި ސްކޫލްގެ ޕްރިންސިޕަލާ ގުޅޭ ކަންބޮޑުވުމެއް ނުވަތަ ސްކޫލް ޕްރިންސިޕަލް ބަދަލު ކުރުމުގެ ވާހަކައެއް ވެސް ނުދައްކާ ކަމަށެވެ.

"ޕޭރެންޓް އެސޯސިއޭޝަންގެ ނައިބު ރައީސް އެކަހަލަ ވާހަކައެއް ނުދައްކަވާ. ދެއްކެވި އެއް ވާހަކައަކީ ސްކޫލުގެ ކްލާސްރޫމްގައި ހަރުކޮށްފައި ހުންނަ ބޯޑުތަކުގެ ވާހަކަ. ކޮވިޑްގެ ހާލަތާ ގުޅިގެން ގައިދުރުކޮށްތާ ކުދިން ތިބޭނީ، މިހާރު ދުރުދުރުގައި ތިބޭއިރު ބޯޑު ނުފެންނަ ވާހަކަ، އެކަމާ މެނޭޖްމަންޓުގައި އެދިގެން ގެނައި ބަދަލެއްގެ ވާހަކަ. އެކަމާ ބެލެނިވެރިން ވެސް ކަންބޮޑުވިއިރު، މިބަދަލަކީ ޓީޗަރުން އެދިގެން ގެނައި ބަދަލެއް ކަމަށް. ދެވަނަ ކަމަށް އެބޭފުޅުން ކަންބޮޑުވުން ފާޅު ކުރެއްވީ އެކްޓިވިޓީ ޔުނީފޯމު ލިބުން ލަސްވުން. އެވެސް ލަސްވީ ކޮވިޑް ކަންތަކާ ގުޅިގެން. ކޮންޓެކްޓަރު އެތަކެތި އެތެރެ ކުރަނީ ލަންކާ ކޮޅުންކަމަށް ވަނީ. މިހާރު ހާލަތު އޮތް ގޮތުން އެކަން ނުކުރެވިފަ އަދި އެއޮތީ. ތިންވަނަ ކަންބޮޑުވުމަކަށް ފާހަގަ ކޮށްފައިވާކަމެއް އަޅުގަނޑު ހަނދާނެއް ނެތް މިވަގުތު. އެހެން ނަމަވެސް މިބުނާ ޕޭރެންޓް އެސޯސިއޭޝަންގެ ނައިބު ރައީސާއާއި ސްކޫލްގައި މިހާރު ހިންގުމާ ހަވާލުވެހުރި ޙަލީމަތުއާ ބައްދަލު ކުރި ކުރުމުގެ ތެރޭގައި ޕްރިންސިޕަލު ބަދަލު ކުރުމުގެ ވާހަކައެއް ނެތް ދައްކާފައެއް" އަބްދުއްސަލާމް ވިދާޅުވިއެވެ.

ވިލުފުށީގެ ސްކޫލު ޕްރިންސިޕަލާ ދެކޮޅަށް އިހުތިޖާޖު ކޮށްފައި ވަނީ މިއަދު މެންދުރުގެ ވަގުތެއްގައެވެ. މިކަމާއި ގުޅޭގޮތުން އިހުތިޖާޖުގެ ބައިވެރިންގެ ބަހެއް އަދި ވަނީ ލިބޭގޮތް ނުވެފައެވެ.

ރިއެކްޝަން

Advertisement
Ooredoo — Truecaller (box)

ކޮމެންޓް

މި ލިޔުމަށް ކޮމެންޓް ކުރުން ވަނީ ބަންދުކޮށްފައެވެ.