ޑީޕީއީ އިން ނާންނާނެ ކަމަށް ބުނި ސުވާލުތަކެއް ޓެސްޓް ޕޭޕަރުގައި އައުމުން، މުދައްރިސުން ހިމޭން އިހުތިޖާޖަކަށް!

ގްރޭޑް 10 އެއްގެ ދަރިވަރުންނަށް ޑިޕާޓްމެންޓް އޮފް ޕަބްލިކް އެކްޒަމިނޭޝަން (ޑީޕީއީ) އިން ދިން އިސްލާމް ޓެސްޓް ޕޭޕަރުގެ ސަބަބުން އެ ޓެސްޓްގައި ބައިވެރިވި ބައެއް ދަރިވަރުންނާއި، އެކުދިންގެ އިސްލާމް ޓީޗަރުން ނުރުހުން ފާޅުކޮށްފިއެވެ.

Ads by MWSC

މަންޙަޖު ބަދަލުވުމާ ގުޅިގެން، އާ މަންޙަޖަށް ދަރިވަރުން އަހުލުވެރި ކުރުމުގެ ގޮތުން މިއަދު ގްރޭޑް 10 ގެ ދަރިވަރުންނަށް ވަނީ އެސްއެސްސީ އިސްލާމް މިމާއްދާއިން އިމްތިހާނެއް ނަގާފައެވެ. އަދި މާދަމާ ދިވެހި އިމްތިހާނު ނެގުން ވެސް އެބައޮތެވެ.

އެސްއެސްސީ އިސްލާމް އިމްތިހާނު މިއަދު ބާއްވާފައިވާއިރު، އެ ޕޭޕަރު ހެދި ދަރިވަރުންނާއި އެކުދިންގެ އިސްލާމް މުދައްރިސުން އަންނަނީ ކަންބޮޑުވުން ފާޅު ކުރަމުންނެވެ.

އެގޮތުން ޕޭޕަރުގައި ނާންނާނެ ކަމަށް ބުނެފައިވާ ބައިތަކުން ވެސް، ޑީޕީން ދިން ޕޭޕަރުގައި ސުވާލު އައިސްފައިވާ ކަމަށް އެކުދިން ބުނެފައި ވެއެވެ.

އެ އިދާރާއިން ސްކޫލްތަކަށް ފޮނުވާފައި ލިޔުމެއްގައި ބުނެފައި ވަނީ އިސްލާމް މާއްދާގެ ފުރަތަމަ ޕޭޕަރުގައި ގްރޭޑް 10 އެއްގެ ފޮތުން އެއްވެސް ސުވާލެއް ނާންނާނެ ކަމަށެވެ. އެހެން ނަމަވެސް އެފޮތުން 15 ވަރަކަށް ސުވާލު މި އިމްތިހާނުގައި އައިސްފައިވާ ކަމަށް ގިނަ ދަރިވަރުން ބުންޏެވެ.

މިކަމާ ގުޅިގެން ދަރިވަރުންގެ އިތުރުން އެކުދިންގެ އިސްލާމް ޓީޗަރުންގެ ނުރުހުން ވެސް ވަނީ ޑީޕީއީއަށް އަމާޒު ވެފައެވެ.

ރާއްޖޭގެ ނަން މަޝްހޫރު ސްކޫލެއްގެ އިސްލާމް ޓީޗަރަކު "ދެން" އަށް މައުލޫމާތު ދެއްވަމުން ވިދާޅުވީ ޑީޕީއީ އިން މިފަދައިން ކަންތައް ކޮށްފައިވުމުން އިސްލާމް މުދައްރިސުން ހިމޭން އިހުތިޖާޖެއް ކުރަން ނިންމާފައިވާ ކަމަށާއި އެގޮތުން ރަސްމީކޮށް އެ ޕޭޕަރު މާކު ނުކުރަން ނިންމާފައިވާ ކަމަށެވެ.

"އަޅުގަނޑު އަބަދުވެސް ބަލަން ޑީޕީއީއާ ގުޅައިގެން ސައްޙަ މައުލޫމާތު ފޯރު ކޮށްދެވޭތޯ. އެގޮތުން މިދިޔަ މަހު އެއިދާރާގެ އިމްތިހާނުތައް ބޭއްވުމުގެ ކަންތަކާ ހަވާލުވެ ހުންނަވާ ބޭފުޅާއާ ގުޅައިގެން، އަޅުގަނޑަށް މެއިލް ކޮށްފައި އެބަހުރި ޕޭޕަރު އަންނާނީ މިވެނި ގޮތަކަށް ކަމަށް. އޭގައި އެބައޮވޭ އަންނާނީ ވަކި ބައިތަކަކުން ކަމަށް. ގްރޭޑް 10 ގެ ފޮތުން ޕޭޕަރ 1 ގައި ނާންނާނެ ކަމަށް ބުނި ޑޮކިއުމެންޓެއް ވެސް އެބައޮތް. އެކަމަކު އެޕޭޕަރު ދިން އިރުގައި ގްރޭޑް 10 ގެ ފޮތުން، އަޅުގަނޑު ގުނާލިއިރުގައި 12 ސުވާލު ހަމަ ޔަގީނުން ވެސް އައިސްފައި އެބައޮތް." އެ މުދައްރިސް ވިދާޅުވިއެވެ.

މީގެއިތުރުން މުދައްރިސް ވިދާޅުވީ، އެކަމާ ގުޅޭގޮތުން މިއަދު ހަވީރު 4:00 ހާއިރު ގުޅާލުމުން ވެސް ޑީޕީއީ އިން ވިދާޅުވީ 10 ގެ ފޮތުން ސުވާލު ނާންނާނެ ކަމަށެވެ.

"ނަމަވެސް ބައެއް ކުދިންވެސް ބުނި ފޮތުން ސުވާލު އައިސްފައިވާ ވާހަކަ. އަދި އަޅުގަނޑަށް ވެސް ފަހުން ޕޭޕަރު ފެނިގެން ބަލާލިއިރު އޭގައި 12 ވަރަކަށް ސުވާލު 10 ގެ ފޮތުން އައިސްފައި އޮތް. މިއީ އަޅުގަނޑުމެން ކަންބޮޑުވާ ކަމެއް އެހެންވީމަ މިހާރު އަޅުގަނޑުމެން އިސްލާމް މުދައްރިސުން އެ ޕޭޕަރު ރަސްމީކޮށް މާކް ނުކުރާނެ ކަމަށް ނިންމައިގެން އަޅުގަނޑުމެން މިތިބީ" އެމުދައްރިސު ވިދާޅުވިއެވެ.

"ދަރިވަރުންގެ ކުރިމަތީގައި އަޅުގަނޑުމެންނަކީ ވަރަށް އިޙްތިރާމް ކުރެވިގެންވާ ބައެއް. މިކަމުގެ ސަބަބުން ބައެއް ދަރިވަރުން މާޔޫސް ވެގެން އެބަ ބުނޭ މާދަމާ އޮންނަ ދިވެހި އިމްތިޙާން ނުހަދާނަމޭ ވެސް"

އެމުދައްރިސް އިތުރަށް ވިދާޅުވީ ޑީޕީއީ އިން ރިޓާން ޑޮކިއުމެންޓެއް ދީފައި އެ ޑޮކިއުމެންޓާއި ޚިލާފަށް އިމްތިހާން ދިނުމަކީ އިސްލާމް މުދައްރިސުންގެ އަގު ބެލެނިވެރިންނާ ދަރިވަރުންގެ ކުރިމަތީގައި ވައްޓާލުން ކަމަށެވެ.