ރިޔާސީ ބަޔާނަށް ޖަވާބުދޭ ވަގުތު އެމްޑީޕީ މެމްބަރުން ތިބެންވީ ހަނު: ރައީސް ނަޝީދު
އިދިކޮޅު ފަރާތްތަކުން ރިޔާސީ ބަޔާނަށް ޖަވާބު ދެއްވާއިރު ވެރިކަން ހިންގާ އެމްޑީޕީގެ މެންބަރުން މަޑުން ތިއްބެވުމަށް ރައްޔިތުންގެ މަޖިލީހުގެ ރައީސް އަދި ކުރީގެ ރައީސް މުހައްމަދު ނަޝީދު މެންބަރުންގެ ކިބައިން އެދިވަޑައިގެންފިއެވެ.
ބުދަ ދުވަހުގެ މަޖިލީހުގެ ޖަލްސާއަށް ރިޔާސީ ބަޔާނުގެ ޖަވާބު އިއްވުން ތާވަލް ކޮށްފައިވާ ކަން ހާމަކުރައްވައި، ރިޔާސަތުގައި އިންނެވި ރައީސް ނަޝީދު ވަނީ މަޖިލީހުގެ މައިނޯރިޓީ ލީޑަރު އަދި އޭދަފުށި ދާއިރާގެ މެންބަރު އަހުމަދު ސަލީމް ރިޔާސީ ބަޔާން އިއްވަވާއިރު، އަޑު ގަދަކޮށް ނުހެއްދެވުމަށް މެންބަރުންނަށް އިލްތިމާސް ކުރައްވާފައެވެ.
"އަޅުގަނޑު ވަރަށް ބޮޑަށް އެދެން، ރިޔާސީ ބަޔާނުގެ ޖަވާބު އިއްވާ ވަގުތު އެމްޑީޕީގެ މެންބަރުން ހަނު ތިއްބެވުމަށް، ރިޔާސީ ބަޔާނުގެ ޖަވާބު ދެއްވަނިކޮށް ވަގުތުން ޖަވާބު ދެއްވުމަށް ގަވާއިދަކު ނޯވޭ، އަދި ރައީސުލްޖުމްހޫރިއްޔާ ރިޔާސީ ބަޔާން އިއްވަވާ ވަގުތު ވާދަވެރި ފަރާތްތައް، މިހާރު ނަމަ، ޕީޕީއެމްގެ މި ބައެއް މެންބަރުން އަޑުގަދަކުރެއްވި އިރު، ވަގުތުން ޖަވާބު ދެއްވުމެއް ވެސް ގަވާއިދަކު ނޯވޭ،" ރައީސް ނަޝީދު ވިދާޅުވިއެވެ.
ރައީސުލްޖުމްހޫރިއްޔާ އިބްރާހިމް މުހައްމަދު ޞާލިހު ރިޔާސީ ބަޔާން އިއްވަވާފައި ވަނީ މި މަހުގެ ހަތަރު ވަނަ ދުވަހުއެވެ.
އެދުވަހުގެ ޖަލްސާގައި ވާހަކަދައްކަވަމުން ރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދު ވިދާޅުވީ ރިޔާސީ ބަޔާނަށް ޖަވާބު ދެއްވުމަށް މައިނޯރިޓީ ލީޑަރ ތައްޔާރުވެ ވަޑައިގެންނެވުމުން އެކަން އިންތިޒާމު ކުރައްވާނެ ކަމަށެވެ.
ރިޔާސީ ބަޔާނަކީ ގައުމުގެ ހާލަތު އެވަގުތު އޮތްގޮތާއި ހާލަތު ރަނގަޅުކުރުމަށް އިތުރަށް ކުރާނެ ކަންކަން ބަޔާންކޮށް ރައީސުލްޖުމްހޫރިއްޔާ އިއްވަވާ ބަޔާނެކެވެ. ގާނޫނު އަސާސީގެ 84 ވަނަ މާއްދާގައިވާގޮތުން ރައީސުލްޖުމްހޫރިއްޔާ ރިޔާސީ ބަޔާން އިއްވަވަން ޖެހިވަޑައިގަންނަވާއިރު ރައްޔިތުންގެ މަޖިލީހުގެ ގަވާއިދުގެ 32 ވަނަ މާއްދާގައިވާގޮތުން ރައީސުލްޖުމްހޫރިއްޔާ ރިޔާސީ ބަޔާން އިއްވެވުމުން އެއިރެއްގައި ސަރުކާރު ހިންގާ ޕާޓީ ނޫން ދެން މަޖިލީހުގައި އެންމެ ގިނައިން މެމްބަރުން ތިބި ޕާޓީއަކުން ރިޔާސީ ބަޔާނަށް ޖަވާބު ދޭން ޖެހެއެވެ. އެ ޖަވާބު ތައްޔާރުކުރަން ޖެހެނީ ވެސް ރައީސުލްޖުމްހޫރިއްޔާ ނިސްބަތްވެ ވަޑައިގަންނަވާ ޕާޓީ ނޫން ދެން ތިބި ޕާޓީތަކުގެ މެމްބަރުންގެ ހިޔާލު ހިމަނައިގެންނެވެ. އަދި މި ޖަވާބު ރިޔާސީ ބަޔާން އިއްވާތާ 14 ދުވަސް ތެރޭގައި އިއްވުން ވެސް ގަވާއިދުގައި ބުނާގޮތުން ލާޒިމްވެއެވެ.
މިފަހަރުގެ ރިޔާސީ ބަޔާނަށް އިދިކޮޅުން ވަނީ ގިނަ ފާޑުކިޔުންތަކެއް އަމާޒުކޮށްފައެވެ.
