މުޒާހަރާގެ ބައިވެރިއެއް ކަމަށް ބުނެ ފަތުރުވަމުންދިޔަ ދޮގު ފޮޓޯއެއް ސީޕީ ހަމީދު ފަޅާ އަރުވާލައިފި
އިދިކޮޅު ކޯލިޝަނުން މިއަދު މާލޭގައި ކުރި މުޒާހަރާގެ ތެރެއިން ފުލުހުން އަނިޔާކުރި މީހެއް ކަމަށް ބުނެ މީސް މީޑިއާގައި ދައުރު ކުރަމުން ދިޔަ ދޮގު ފޮޓޯއެއްގެ ހަގީގަތް ކޮމިޝަނާ އޮފް ޕޮލިސް މުހައްމަދު ހަމީދު ހާމަ ކުރައްވައިފިއެވެ.
ފުލުހުން މުޒާހަރާގެ ބައިވެރިއަކަށް އަނިޔާކޮށްގެން ލިބުނު އަނިޔާ ކަމަށް ބުނެ ޓްވިޓާގައި ފޮޓޯ އާންމު ކޮށްފައި ވަނީ ޕީޕީއެމްގެ އެކްޓިވިސްޓެކެވެ. މޫނުމަތި ފަޅައިގެން ގޮސް ގިނަ ޒަހަމްތަކެއް ލިބިފައިވާ މީހެއްގެ ފޮޓޯ އާންމުކޮށް އޭނާ ޖަހާފައިވަނީ ސީޕީ ހަމީދު އާއި ރައީސް އިބްރާހިމް މުހައްމަދު ޞާލިހުގެ އަމުރަށް މުޒާހަރާގެ ތެރެއިން ފުލުހުން މިއަދު ކޮށްފައިވާ އަނިޔާ ކަމަށެވެ.
މި ޓްވީޓުގެ ސްކްރީންޝޮޓެއް ހިއްސާކޮށް ސީޕީ ހަމީދު ވަނީ އެ ފޮޓޯގެ އަސްލު ހަބަރު ވެސް ހިއްސާ ކޮށްފައެވެ. އޭގެއިން ފެންނަ ގޮތުގައި އެ ފޮޓޯއަކީ ސްރީލަންކާގެ އަވަށެއްގައި ހިނގައިދިޔަ ހާދިސާއެއްގައި އަނިޔާވި މީހެއްގެ ފޮޓޯއެވެ.
ސީޕީ މި ދެ ފޮޓޯ ހިއްސާ ކޮށްފައި ވަނީ ދޮގު މައުލޫމާތު ފެތުރުން ހުއްޓުވުމަށް ގޮވާލާ ހޭޝްޓެގާއެކުގައެވެ.
ސީޕީ މިހެން ވިދާޅުވެފައިވާއިރު، އިދިކޮޅު ޕްރޮގްރެސިވް ކޯލިޝަނުން މިއަދުކުރި މުޒާހަރާ ރޫޅާލާ، ލެ ސޫކް ކެފޭ ތެރެއަށް ފުލުހުން ވަންނަން އުޅުމުގެ ތެރޭގައި އެތަނުން ނުކުތް މީހަކު ފުލުހުން ވަނީ ކޮށްޕާލާފައި ކަމަށާއި، ކޮށްޕާލުމުގެ ސަބަބުން އެމީހާ އެތަނުގެ ތަނބުގައި ޖެހި ބޯ ފަޅައިގެން ގޮސްގެން ވެއްޓުނު ކަމަށް އެވަގުތު އެސަރަޙައްދުގައި ތިބި ބައެއް މީހުން ބުނެފައި ވެއެވެ.މީގެ އިތުރުން ޕީޕީއެމްގެ ނައިބު ރައީސް ޝިޔާމްގެ އިތުރުން ބައެއް އެހެން މީހުންނަށް ވެސް މިއަދުގެ މުޒާހަރާގައި އަނިޔާ ވެފައި ވެއެވެ.
ކެފޭ ތެރެއިން އަނިޔާވި މީހާއާ ގުޅޭ ގޮތުން ފުލުހުން ވިދާޅުވީ މުޒާހަރާ ކޮންޓްރޯލު ކުރުމަށް މަސައްކަތް ކުރަމުން ދިޔަ ފުލުހުންގެ ސަފު ރޫޅާލާ، ކެފޭ އެއްގެ ތެރެއަށް ވަން ބައެއްގެ ގައިގައި އެތަނުން މީހަކު ޖެހި ވެއްޓުމުގެ ސަބަބުން ބޯ ފަޅައިގެން ގޮސްފައިވާ ކަމަށެވެ.
