ސިޔާސީ ލީޑަރުންނަކީ ހުރިހާ ނުބައިކަމެއް އެކުލެވޭ ކަންކަން ކުރާ ބައެއްކަމުގައި ހީވާން ފަށައިފި: އުމަރު
ރާއްޖޭގެ ސިޔާސީ ހުރިހާ ލީޑަރުންނަކީ ވައުދުތަކާއެކު ވެރިކަމަށް އައުމަށްފަހު ހުރިހާ ނުބައި ކަމެއް އެކުލެވޭ ކަންކަން ކުރާ ބައެއްކަމުގައި ހީވާން ފަށައިފި ކަމަށް ކުރީގެ ހޯމް މިނިސްޓަރ އުމަރު ނަސީރު ވިދާޅުވެއްޖެއެވެ.
ސިޔާސީ އައު ހަރަކާތެއް ކަމަށްވާ "ދިވެހި ނޭޝަނަލް އެކްޝަން" އިފްތިތާޙް ކުރުމަށް މިރޭ ބޭއްވި ޖަލްސާގައި ވާހަކަ ދައްކަވަމުން އުމަރު ނަސީރު ވިދާޅުވީ ސިޔާސީ ހުރިހާ ލީޑަރުންނަކީ ވައުދުތަކާއެކު ވެރިކަމަށް އައުމަށްފަހު، ރިޝްވަތު ހިފުމާ، ވައްކަން ކުރުމާ، ރޭޕް ކުރާ މީހުންނަށް ހިމާޔަތް ދިނުމާ، މިނޫންވެސް ހުރިހާ ނުބައި ކަމެއް އެކުލެވޭ ކަންކަން ކުރާބައެއް ކަމުގައި މިހާރު ހީވާން ފަށައިފި ކަމަށެވެ.
"އަމާނާތްތެރިކަމާ، ތެދުވެރިކަމާ، އަޚްލާޤާއި މިއީ ސިޔާސީ ޕާޓީތަކުގެ ފޮތްބައިގައި ހިމެނޭ ކަންތައްތަކެއް ނޫންކަން މިހާރު ޔަގީން ވެއްޖެ" އުމަރު ނަސީރު ވިދާޅުވިއެވެ.
މީގެއިތުރުން އުމަރު ނަސީރު ވިދާޅުވީ ސިޔާސީ މަސައްކަތްތަކަކީ ހެޔޮލަފާ މީހުން ކައިރިވާން ފަސްޖެހޭ ކަމަކަށް ވެއްޖެ ކަމަށެވެ. އަދި އެފަދަ މީހުން ޕާޓީތައް ދޫކޮށް ގޮސްފި ކަމަށެވެ.
"ސިޔާސީ މަސައްކަތްތަކަކީ ވައްކަން ކުރާ މީހުންނަށް ޚާއްސަ ކުރެވިފައިވާ ކަމަކަށް ވެއްޖެ. ކިޔަވައިގެން ތިބި ހެޔޮލަފާ މީހުން ސިޔާސީ މަސައްކަތާ ދުރަށް ޖެހުނީމަ، ޤައުމަކަށް ލިބޭނެ ގެއްލުން އަަޅުގަނޑުމެންނަށް މިދަނީ ފެންނަމުން." އުމަރު ނަސީރު ވިދާޅުވިއެވެ.
ޕާޓީތަކުގެ ވާދަވެރި އިންތިހާބުގެ ތެރެއަށް ބޭރުގެ ބާރުތަކުން ފައިސާ ހިފައިގެން ވަދެ، ޤައުމުގެ މިނިވަންކަން ގެއްލޭ ހިސާބަށް އެމީހުންގެ ނުފޫޒް މިރާއްޖެއަށް ފަތުރައިފި ކަމަށް ވެސް އުމަރު ނަސީރުގެ ވާހަކަފުޅުގައި ފާހަގަ ކުރައްވާފައިވެއެވެ.
"އެމީހުންގެ ސިފައިން އިތުރު ކޮށްފި، އެމީހުންގެ އުފެއްދުންތައް އިތުރުކޮށްފި، އެމީހުން ގާތްވެތިބޭ ސަރަޙައްދުތައް އިތުރު ކޮށްފި. ރާއްޖޭގެ އިސްލާމީ ޝަޚްސިއްޔަތު ޚަރާބުކޮށް، ދިވެހިންނަކީ ޓެރަރިސްޓުން ކަމަށް ބޭރު ޤައުމުތަކަށް ދައްކައިފި." އުމަރު ނަސީރު ވިދާޅުވިއެވެ.
ޑީއެންއޭއާ ބެހޭގޮތުން އުމަރު ވިދާޅުވީ ޑީއެންއޭ އަކީ އަންނަ ރިޔާސީ އިންތިހާބަށް އުފެއްދި ހަރަކާތެއް ނޫން ކަމަށާއި މިއީ އެމަނިކުފާނުގެ ކެމްޕޭނު ހަރަކާތެއް ވެސް ނޫން ކަމުގައެވެ.
"ޑީއެންއޭ އަކީ ރާއްޖެ ޓްރާންސްފޯމް ކުރުމަށް އުފައްދާ ހަރަކާތެއް." އުމަރު ނަސީރު ވިދާޅުވިއެވެ.
ޑީއެންއޭ އުފައްދަނީ ދިވެހީންގެ މުރާލިކަމާ، ދިވެހިންގެ ހީވާގިކަމާއި، މަސައްކަތްތެރިކަން އަނބުރާ ގެނައުމަށް ކަމަށް ވެސް އުމަރު ނަސީރު ވިދާޅުވިއެވެ.
ހާދަ ހީނުވެޔޭ ސިޔާސީ ހަރަކާތެއް ނޫންހެން. ވަށަިގެން ތިޔަ ތިބީ، ތިޔަ ވިދާޅުވާ ހުރިހާ ނުބައި ކަން ކަމުން”ކަޅި” ވެފައި ތިބި ބޭފުޅުން.
ކަލޭވެސް ތީ އޭގެ މީހެއްހެން ހީވަނީ.