ސަސްޕެންޑުކުރި ކައުންސިލަރުން ޖަވާބުދާރީއެއް ނުވޭ: އެލްޖީއޭ
ދ. މީދޫން މިދިޔަ ބުރާސްފަތި ދުވަހު ސަސްޕެންޑުކުރި ތިން ކައުންސިލަރުން ޖަވާބުދާރީވާން ދިން ފުރުސަތުގައި ޖަވާބުދާރީ ވެފައި ނުވާ ކަމަށް ލޯކަލް ގަވަމަންޓް އޮތޯރިޓީ (އެލްޖީއޭ) އިން ބުނެފިއެވެ.
މިކަން ހާމަކުރަމުން އެލްޖީއޭއިން އާންމު ކުރި މީދޫ ކައުންސިލުގެ އިންކުއަރީ ހުލާސާ ރިޕޯޓުގައި ބުނެފައި ވަނީ އިންކުއަރީ ކުރިއަށް ގެންދިއުމުގެ ގޮތުން އިންކުއަރީ ރައްދުވާ ދ. މީދޫ ކައުންސިލުގެ މެމްބަރުންނަށް ލިޔުމުން ޖަވާބުދާރީވުމަށް ހަތް ދުވަހުގެ މުއްދަތެއް ދިން ކަމަށެވެ.
އެލްޖީއޭއިން އިތުރަށް ބުނީ، އެ އޮތޯރިޓީން ކައުންސިލުގެ ހުރިހާ މެމްބަރުންނާއި، މީދޫ ކައުންސިލް އިދާރާއަށް ހުށަހަޅާފައިވާ މައްސަލަތަކާ ގުޅުން ހުރި މަސައްކަތް ކުރާ މުވައްޒަފުންގެ ބަޔާން ނަގާ، މައްސަލަތަކާ ގުޅޭ މައުލޫމާތު ސާފު ކޮށްފައިވާނެ ކަމަށެވެ.
އެ މައްސަލަތަކާ ގުޅޭ މައުލޫމާތާއި ލިޔެކިޔުންތައް މީދޫ ކައުންސިލުގެ އިދާރާއިން ހޯދުމަށް ތަކުރާރުކޮށް މަސައްކަތް ކޮށްފައި ކަމަށާއި، ނަމަވެސް އެ އޮތޯރިޓީއަށް މީދޫ ކައުންސިލުން ފޮނުވާފައި ވަނީ މަދު ލިޔުންތަކެއް ކަމަށް އެލްޖީއޭއިން ބުނެފައި ވެއެވެ. އަދި ޖަވާބުދާރީ ވުމަށް ދިން ފުރުސަތުގައި މީދޫ ކައުންސިލުގެ އެއްވެސް މެމްބަރަކު ޖަވާބުދާރީ ވެފައި ނުވާކަން ވެސް އެލްޖީއޭއިން ފާހަގަ ކޮށްފައި ވެއެވެ.
