ދިޔާނާ ރައީސަށް: ސިކުނޑީގެ މައްޗަށް ޖަޒުބާތު އިސްކުރީމާ ވާނީ ތިޔަހެން!
ޓްރާންސްޕޯޓް މިނިސްޓްރީ އާއި އޮތޯރިޓީއާ ދެމެދު ގާނޫނީ ފުށުއެރުންތަކެއް އެބަހުރި ކަމަށާއި އޮތޯރިޓީ އުވާލަން ރައްޔިތުންގެ މަޖިލީހަށް ފޮނުވާފައިވާ ކަމަށް ރައީސް އިބްރާހިމް މުހައްމަދު ސޯލިހް ވިދާޅުވުމާ ގުޅިގެން ކުރީގެ ބަންޑާރަ ނައިބު ދިޔާނާ ސައީދުގެ ފާޑު ވިދާޅުވެއްޖެއެވެ.
ދިޔާނާ މިއަދު ކުރެއްވި ޓްވީޓެއްގައި ރައީސް ސޯލިޙަށް އަމާޒުކޮށް ވިދާޅުވީ، ސިކުނޑީގެ މައްޗަށް ޖަޒުބާތު އިސްކުރީމާ ވާނީ ތިޔަހެން ކަމަށެވެ. އޮންލައިން ނޫހެއް ކަމަށްވާ “މިހާރު” އިން ލިޔެފައިވާ ޚަބަރެއްގެ ފޮޓޯ އާއި އެކު ކުރި މި ޓްވީޓްގައި ދިޔާނާ ވަނީ އިތުރު ސުވާލުތައް ވެސް ރައީސަށް އަމާޒުކޮށްފައެވެ.
“ނެޕޮޓިޒަމް، ކްރޮނިޒަމް، ޓޮކެނިޒަމް ގެ މައްޗަށް ސަރުކާރު ރާވަން ޖާގަ ދެއްވީ ކޮންބޭފުޅެއްތޯ؟” ދިޔާނާ ސުވާލު ކުރެއްވިއެވެ.
ދިޔާނާ މިހެން ވިދާޅުވެފައިވަނީ ޓްރާންސްޕޯޓް މިނިސްޓްރީގައި މައްސަލަތަކެއް އެބަހުރި ކަމަށް ރައީސް ވިދާޅުވުމާ ގުޅިގެން ސަރުކާރުގެ އިސް މަގާމުތަކުގެ ބޭފުޅުން ޓްވިޓާ އަދި އެހެނިހެން ޕްލެޓްފޯމްތައް މެދުވެރިކޮށް ނުރުހުން ފާޅު ކުރަމުން ދާ ދަނޑިވަޅެއްގައެވެ.
ރައީސް ވިދާޅުވީ ޓްރާންސްޕޯޓް އޮތޯރިޓީ އުވާލައި މިނިސްޓްރީގެ އޮނިގަނޑަށް ބަދަލުތައް ގެންނާނެ ކަމަށެވެ. އަދި އޮނިގަނޑަށް ގެނެވޭނެ ބަދަލުތަކަކާ އެކު ހަލުވި ކަމެއް ގެނެވޭނެ ކަަމަށެވެ.
