ރައީސް ނަޝީދު ދެ މުސާރަ ނަންގަވާ މައްސަލަ، މަލީހު މަޖިލީހަށް ހުށަހަޅަނީ

ރައްޔިތުންގެ މަޖިލީހުގެ ރައީސް އަދި ކުރީގެ ރައީސް މުހައްމަދު ނަޝީދު ދެ މުސާރަ ނަންގަވާ މައްސަލަ ފޮރުވައިގެން ދެން ނުތިބެވޭނެ ކަމަށާއި، އެ މައްސަލަ މާދަމާ މަޖިލީހަށް ހުށަހަޅުއްވާނެ ކަމަށް ކުރީގެ މިނިސްޓަރ އޮފް ކޮމިއުނިކޭޝަން ސައިންސް އެންޑް ޓެކްނޮލޮޖީ މުހައްމަދު މަލީހު ޖަމާލް ވިދާޅުވެއްޖެއެވެ.

Ads by Hajj Corporation

މަލީހު އިޝާރާތްކުރެއްވި ދެ މުސާރައަކީ ރައީސް ނަޝީދަށް ލިބިވަޑައިގަންނަވާ ކުރީގެ ރައީސުންނަށް ދެވޭ އިނާޔަތާއި މަޖިލީސް ރައީސްގެ މުސާރައާއި އިނާޔަތެވެ.

މަލީހު މިއަދު ކުރެއްވި ޓްވީޓެއްގައި ވަނީ ރައީސް ނަޝީދު އަކީ "ދެ މުސާރަ ތަކުރު" ކަމަށް ވިދާޅުވިއެވެ. އެގޮތުން އޭނާ ވިދާޅުވީ އެ މައްސަލަ ފޮރުވައިގެން ރައީސް ނަޝީދަށް ދެން ނުހުރެވޭނެ ކަމަށާއި އާރްޓީއައި ގެ ދަށުން މާދަމާ އެ މައްސަލަ މަޖިލީހަށް ހުށަހަޅުއްވާނެ ކަމަށެވެ.

މީގެ އިތުރުން މަލީހު ވަނީ ދެ މުސާރައިން އެއް މުސާރަ ރައްޔިތުންގެ ހައްގުގައި ގުރުބާން ކޮށްލައްވަން ރައީސް ނަޝީދު އަށް ކެރިވަޑައިގަންނަވާނެތޯ ސުވާލު ކުރައްވާފައެވެ.

ރައީސްކަން ކުރައްވާފައިވާ ބޭފުޅުންނަށް ދޭންޖެހޭ އިނާޔަތާއި ރައްކާތެރިކަން ބަޔާންކުރާ ގާނޫނުގައިވާ ގޮތުން ރައީސްކަން އެއް ދައުރު ކުރައްވައިފި ނަމަ ދައުލަތުން މާލީ އިނާޔަތުގެ ގޮތުގައި މަހަކު 50،000ރ. ދޭންޖެހެއެވެ. އެއް ދައުރަށް ވުރެ އިތުރު ނަމަ މަހަކު 75،000ރ. ދޭންޖެހެއެވެ. އަދި ރައީސްކަން ކުރައްވާފައިވާ ބޭފުޅަކު ދިރިއުޅުއްވާ ތަނަކަށް ހިނގާ ހުރިހާ ހަރަަދަކަށް ކޮންމެ މަހަކު 50،000ރ. އާ ހަމައަށް ދައުލަތުން ދޭން ޖެހޭނެ ކަމަށް ގާނޫނުގައި ވެއެވެ. މީގެ އިތުރުން، މުޖުތަމައަށް ފައިދާ ހުރި އިޖުތިމާއީ މަސައްކަތެއް ކުރައްވަން އެ ބޭފުޅަކު ބޭނުންފުޅުވެއްޖެ ހިނދެއްގައި އޮފީހާއި މުވައްޒަފުންގެ ހަރަދާއި އެހެނިހެން ކަންކަމަށް 175،000ރ. އާ ހަމައަށް ދައުލަތުން ފައިސާ ދޭންޖެހެއެވެ.

ރައީސް މުހައްމަދު ނަޝީދު މަޖިލީހަށް އިންތިޚާބުވެފައިވާއިރު އެމަނިކުފާނަކީ މިހާރު މަޖިލީހުގެ ރައީސެވެ. ރައީސް ނަޝީދަށް ކުރީގެ ރައީސުންގެ އިނާޔަތް ވެސް ގާނޫނުން ލިބެން އޮތް ނަމަވެސް އެމަނިކުފާނު އެ އިނާޔަތް މިހާރުވެސް ނުނަންގަވާ ކަމަށް ބައެއް މަޖިލިސް މެންބަރުން މީގެ ކުރިން ވިދާޅުވެފައިވެއެވެ.

ރައީސް ނަޝީދު މީގެ ކުރިންވަނީ، ފައިސާއާއި އިނާޔަތަކީ ބޭނުންވެގެން އެ އެއްޗެހި ފަހަތުން ދުވެ އުޅޭ އެއްޗެއް ނޫން ކަމަށް ވިދާޅުވެފައެވެ.