ކެންޕެއިން ކުރަން އެންމެ އުނދަގޫވާނީ އެމްޑީޕީއަށް: ފިއްޓޭ
މިއަންނަ ލޯކަލް ކައުންސިލް އިންތިޚާބުގައި ކެންޕެއިން ހަރަކާތްތައް ހިންގަން އެންމެ އުނދަގޫ ވާނީ ސަރުކާރު ހިންގާ މައި ޕާޓީ މޯލްޑިވްސް ޑިމޮކްރެޓިކް ޕާޓީ (އެމްޑީޕީ) އަށް ކަމަށް ވައިކަރަދޫ ދާއިރާގެ މެންބަރު ހުސައިން ޒިޔާދު (ފިއްޓޭ) ވިދާޅުވެއްޖެއެވެ.
މިއަދު ޕީޕީއެމް ކޯލިޝަނުން ކައުންސިލް އިންތިޚާބުގައި ހަމަހަމަ ފުރުސަތު ތަކެއް ނެތް ކަމަށް ބުނެ ވެއްދި ކުއްލި މައްސަލައިގައި ވާހަކަފުޅު ދައްކަވަމުން ފިއްޓޭ ވިދާޅުވީ، އެމްޑީޕީއަކީ އަބަދުވެސް ދޮރުން ދޮރަށް ހިނގާ ކެންޕެއިން ކުރަމުން އަންނަ ޕާޓީ އެއް ކަމަށާއި މިހެން ކަމުން މި އިންތިޚާބުގައި ކެންޕެއިން ކުރަން އެންމެ އުނދަގޫވާނީ އެމްޑީޕީ އަށް ކަމަށެވެ. އަދި ޕީޕީއެމްއަކީ އަބަދުވެސް ސިޓީ އުރަ ބަހާ ޕާޓީއެއް ކަމަށާއި އެކަން ކުރަން މިދަނޑިވަޅުގައިވެސް އުނދަގޫ ނުވާނެ ކަމަށް ފިއްޓޭ ވިދާޅުވިއެވެ.
"ކެންޕެއިން ކުރާ ވައްޓަފާޅިއަށް ބަލާއިރު، މިވަގުތު މީ އެމްޑީޕީއަށް ކެންޕެއިން ކުރަން އެންމެ އުނދަގޫ ވަގުތު. އެއީ އެމްޑީޕީއަކީ ސީދާ ދޮރުން ދޮރަށް ހިނގައިގެން ކެންޕެއިން ކުރާ ޕާޓީއަކަށް ވެފައި. އިދިކޮޅު ފަރާތްތަކަށް މިކެންޕެއިން ކުރަން މާ ދަތިވާނެ ހެނެއް އަޅުގަނޑަކަށް ހީއެއް ނުވޭ. އެބޭފުޅުންގެ ކެންޕެއިންގެ އެންމެ ބޮޑު އެއް ކަމަކަށް މި އޮންނަނީ ސިޓީ އުރަ ބެހުން. މިހާރުވެސް ސިޓީ އުރަ އެއްގެއިން އަނެއް ގެޔަށް ލާކަށް މާ ދައްޗެއް ނުވާނެ." ފިއްޓޭ ވިދާޅުވިއެވެ.
ފިއްޓޭ އިތުރަށް ވިދާޅުވީ މިއަދު އިދިކޮޅު ފަރާތްތަކުން އުޅުއްވަނީ ފުރުސަތު ނެތިގެން ނޫން ކަމަށާއި ފުރުސަތުގެ ބޭނުން ކުރައްވަން ނޭނގިގެން ކަމަށެވެ. މިގޮތުން ޕީޕީއެމްގެ ވެރިކަމެއް އޮތް އިރު، ބައެއް މެންބަރުގެ ދާއިރާތަކުގެ ފެނާ ނަރުދަމާ ނާޅާ، މިއަދު އެވާހަކަ ދައްކަވަން ލަދު ގަންނަން ޖެހޭ ކަމަށް ވެސް ވިދާޅުވިއެވެ.
"މިއަދު ހިތަދޫއާއި ކުނަހަންދޫގައި ފެނާއި ނަރުދަމާ ޤާއިމްކޮށްފައި އޮތްނަމަ، މިތާންގައި މަޑު މަޑުން އިނދެ ކެންޕެއިން ކުރައްވަން ފަސޭހަވީސް" މާވަށު ދާއިރާގެ މެންބަރު ސަޢީދުއަށް ނިސްބަތް ކުރައްވާ ފިއްޓޭ ވިދާޅުވިއެވެ.
އިދިކޮޅު ފަރާތްތަކުން މުޒާހަރާ ކުރުމަށް ފުރުސަތު ނެތް ކަމަށް ދައްކާ ވާހަކަތަކަށް ރައްދު ދެއްވަމުން ފިއްޓޭ ވިދާޅުވީ، އިދިކޮޅުގައި މިހާރު ތިއްބެވި ފަރާތްތަކުން، މުޒާހަރާ ކުރެވޭނެ މަގު ބަންދުކޮށް ކާނިވާ ސަރަހައްދުގައި އެކަނި މުޒާޙަރާ ކުރެވޭ ގޮތަށް ހެދީ ދުރު މާޒީއެއްގައި ނޫން ކަމަށެވެ. މިގޮތަށް ކަންތައް ކުރި ބަޔަކު، މިއަދު މުޒާހަރާ ނުކުރެވެޔޭ ކިޔާނީ "ލަދު ހަޔާތް" ނެތީމާ ކަމަށްވެސް ފިއްޓޭ ފާހަގަ ކުރެއްވިއެވެ.
Ads by STO
