އެންސީއައިޓީ އަށް 18 އަހަރު ފުރުން ކުލަގަދަ ގޮތެއްގައި ފާހަގަކޮށްފި
އިންފޮމޭޝަން ޓެކްނޯލޮޖީގެ އެހީގައި ސަރުކާރުގެ ހިންގުން ހަރުދަނާ ކުރުމަށް އުފެއްދެވި ނޭޝަނަލް ސެންޓަރ ފޮރ އިންފޯރމޭޝަން ޓެކްނޯލޮޖީ (އެން.ސީ.އައި.ޓީ) އަށް 18 އަހަރު ފުރުން ކުލަގަދަ ގޮތެއްގައި އެ އިދާރާއިން ފާހަގަކޮށްފިއެވެ.
މި ހަފްލާގައި މިނިސްޓްރީ އޮފް ކޮމިއުނިކޭޝަން، ސައިންސް އެންޑް ޓެކްނޯލޮޖީގެ ވެރިންނާއި މުވައްޒަފުންވެސް ބައިވެރިވިއެވެ. ޖަލްސާގެ ޝަރަފްވެރި މެހެމާން، މިނިސްޓަރ އޮފް ސްޓޭޓް ފޮރ ކޮމިއުނިކޭޝަން ސައިންސް އެންޑް ޓެކްނޯލޮޖީ އަލްފާޟިލް އަލީ ޞާލިހް ގެ ވާހަކަ ފުޅުގައި 18 އަހަރާއެކު އެން.ސީ.އައި.ޓީ މުޅިން އާ ހަރުފަތަކަށް މިސްރާބު ޖަހާފައިވާކަން ފާހަގަ ކުރެއްވިއެވެ. އަދި ކޮވިޑް-19 ގެ ހާލަތުގައި ކިޔެވުމާއި މަސައްކަތުގެ މާހައުލުގައި އިންފޮމޭޝަން އަދި ކޮމިއުނިކޭޝަން ޓެކްނޯލޮޖީގެ މުހިންމުކަން ބަލައިގަނެވުނުއިރު، ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިހު އާއި ސަރުކާރުގެ މުހިންމު ވައުދުތަކެއް ހާސިލްކުރުމަށް އެން.ސީ.އައި.ޓީގެ ދައުރު މުހިންމުކަން ފާހަގަ ކުރެއްވިއެވެ.
ޚާއްސަކޮށް 100 ދުވަހުގެ ވައުދު ތަކުގެ ތެރޭގައި ހިމަނައިގެން އެން.ސީ.އައި.ޓީ އިން ތައްޔާރު ކޮށްދެއްވި ކިޔުގައި ނުޖެހި ފްލެޓަށް އެޕްލައިކުރެވޭ ސިސްޓަމްގެ އަޕްގްރޭޑްގެ މަސައްކަތް 2 އަހަރުފަހުން މިއަދު އަނެއްކާ ވެސް އެން.ސީ.އައި.ޓީ އާއި ހަވާލު ކުރެވުނު ކަމީ ސަރުކާރުން އެން.ސީ.އައި.ޓީ އަށް ކުރާ އިތުބާރު ދައްކުވައިދޭ ކަމެއް ކަމަށް ވެސް އަލީ ސާލިޙް ވިދާޅުވިއެވެ. އަދި ސަރުކާރުގެ ސިޔާސަތުތައް ތަންފީޛް ކުރުމަށް އިދާރާއަށް ބޭނުންވާ ފަންނީ މުވައްޒަފުން ހޯދުމަށް ދިމާވާ ދަތިތައް ހައްލުކުރުމުގެ މަސައްކަތް ކުރަމުން އަންނަ ކަމަށް ވިދާޅުވެފައިވެއެވެ. މިކަމުގައި ވަޒީރު އަލްއުސްތާޛް ފައްޔާޟް އިސްމާއިލްގެ އެއްބާރުލުން ފާހަގަކުރައްވާ އެމަނިކުފާނަށާއި، އެން.ސީ.އައި.ޓީގެ މުވައްޒަފުންނަށް ވެސް ޝުކުރު އަދާ ކުރެއްވިއެވެ.
ހަފްލާގައި ބައިވެރި ވަޑައިގެންނެވި ބޭފުޅުންގެ ތެރެއިން ޑެޕިއުޓީ މިނިސްޓަރ މުޙައްމަދު ޝާތިރު ވަނީ އެން.ސީ.އައި.ޓީ އުފެދިގެން އައިގޮތާއި އިދާރާގެ 18 އަހަރުގެ ކާމިޔާބީތައް ހިއްސާ ކުރައްވާފައެވެ .
މިއަދުގެ ޖަލްސާގައި ވާހަކަދައްކަވަމުން މިނިސްޓްރީގެ ޕަރމަނަންޓް ސެކްރެޓަރީ އަލްފާޟިލް މުޙައްމަދު ޝަރީފު ވަނީ އެން.ސީ.އައި.ޓީ އުފެއްދެވުމުގައި ފުރަތަމަ ކޮމިއުނިކޭޝަން މިނިސްޓަރ އަލްފާޟިލް މިދުހަތު ހިލްމީ އަދި އެން.ސީ.އައި.ޓީގެ ކުރީގެ ޗީފް އެގްޒެކެޓިވް އަލްފާޟިލް ފާއިގު އުމަރުގެ ބުރަ މަސައްކަތްފުޅު ފާހަގަކޮށް އެބޭފުޅުންނާއި، ކުރީގެ މުވައްޒަފުންނާއި މިހާރުގެ ޓީމަށް ޝުކުރު އަދާ ކުރައްވާފައެވެ.
މީގެ އިތުރަށް މިނިސްޓަރ އޮފް ސްޓޭޓް އަލްފާޟިލް އަޙްމަދު އަފްޒަލް ދެއްކެވި ވާހަކަ ފުޅުގައި ތަނެއްގެ އެންމެ ބޮޑު ރައުސްމާލަކީ އެތަނެއްގެ މުވައްޒަފުން ކަމުގައި ފާހަގަކޮށް ކުރިއަށް އޮތްތަނުގައި ވެސް އިޚްލާސްތެރިކަމާއެކު މަސައްކަތްކޮށް ކާމިޔާބު ހޯދުމަށް ވަނީ ހިތްވަރު ދެއްވާފައެވެ.
