އޮޅުވެލިފުއްޓަށް އަރައިފޭބުން މަނާކޮށްފި
ޅ. އޮޅުވެލިފުށިން ކޮވިޑަށް ޓެސްޓްކުރި މީހަކު ޕޮޒިޓިވްވެ އެރަށް މޮނިޓަރިންގެ ހާލަތަށް ގެނެސްފިއެވެ.
ހެލްތު އިމަޖެންސީ އޮޕަރޭޝަން ސެންޓަރު (އެޗްއީއޯސީ) އިން ރޭ ބޭއްވި ނޫސްވެރިންގެ ބައްދަލުވުމުގައި ހެލްތު ޕްރޮޓެކްޝަން އެޖެންސީ (އެޗްޕީއޭ)ގެ ޑިރެކްޓަރު އަހުމަދު ނާސިރު ވިދާޅުވީ އޮޅުވެލިފުށިން މިއަދު އެކަކު ކޮވިޑަށް ޕޮޒިޓިވް ވެފައިވާ ކަމަށެވެ.
އެ ކޭސްއާ ގުޅިގެން ކޮންޓެކްޓް ޓްރޭސިންގެ މަސައްކަތް ނިމެންދެން އެރަށް ވެސް މިއަދު މޮނީޓަރިންގެ ހާލަތަށް ގެނެސްފައިވާ ކަމަށް އޭނާ ވިދާޅުވިއެވެ.
އޮޅުވެލިފުށީގެ އިތުރުން އެ އަތޮޅު ނައިފަރާއި ހިންނަވަރު ވެސް އޮތީ މޮނިޓަރިންގައެވެ. އަދި ފެލިވަރު މަސް ފެކްޓްރީގައި މަސައްކަތް ކުރާ ބަޔަކު ޕޮޒިޓިވްވެ އެރަށް ވެސް އޮތީ މޮނިޓަރިންގައެވެ.
ހެލްތު ޕްރޮޓެކްޝަން އޭޖެންސީ (އެޗްޕީއޭ)އިން އާއްމު ކޮށްފައިވާ ސާވޭލަންސް ޑޭޓާއަށް ބަލާއިރު މިއަދު ރާއްޖެއިން ކޮވިޑަށް ފައްސި ވެފައި ވަނީ މާލެއިން 49 މީހުންނާއި، އަތޮޅުތެރެއިން 46 މީހަކާއި، ހިންގަމުން އަންނަ ރިސޯޓުތަކުން 12 މީހަކާއި އިންޑަސްޓްރިއަލް އައިލެންޑުން 13 މީހެކެވެ.
މިހާރު ރާއްޖެއިން މިބައްޔަށް ޖުމްލަ 23،524 މީހުން ފައްސި ވެފައިވެއެވެ.
