ޒަހާއަށް ފުރިހަމަ އިތުބާރު އެބައޮތް: ޖާބިރު
ފިޝަރީޒް މިނިސްޓަރު ޒަހާ ވަހީދަށް ފުރިހަމަ އިތުބާރު އޮތްކަމަށް ވިދާޅުވެ، ކާށިދޫ ދާއިރާގެ މެމްބަރު ޢަބްދުﷲ ޖާބިރު ކުރެއްވި ސޮއި އަނބުރާ ނަންގަވައިފިއެވެ.
ރައީސް މައުމޫން ހިންގަވާ މޯލްޑިވްސް ރިފޯމް މޫވްމަންޓް (އެމްއާރުއެމް)އަށް ނިސްބަތްވެ ވަޑައިގަންނަވާ މިނިސްޓަރ ޒަހާގެ އިތުބާރު ނެތްކަމުގެ ވޯޓަށް އެހުމަށް ރައްޔިތުންގެ މަޖިލީހަށް ހުށަހެޅުއްވީ އިދިކޮޅު ކޯލިޝަނަށް ނިސްބަތްވެ ވަޑައިގަންނަވާ މެމްބަރުންނެވެ.
މިނިސްޓަރ ޒަހާގެ އިތުބާރު ނެތްކަމުގެ މައްސަލަ ރައްޔިތުންގެ މަޖިލީހަށް ހުށަހެޅީ 11 މެމްބަރުންގެ ސޮޔާ އެއްކޮށެވެ. ނަމަވެސް މިނިސްޓަރ ޒަހާއަށް ނޯޓިސް ފޮނުވާފައި ވަނިކޮށް ޖާބިރު މިއަދު ވަނީ އޭނާގެ ނަން އަނބުރާ ގެންދަވައިފައެވެ.
އެ ގޮތުން ރައްޔިތުންގެ މަޖިލީހުގެ ރައީސަށް ޖާބިރު ފޮނުއްވި ސިޓީއެއްގައި ވިދާޅުވެފައި ވަނީ ޒަހާ ޖަވާބުދާރީ ކުރުވުމުގެ މަސައްކަތް ކުރަމުން ދަނިކޮށް ރަމަޟާން މަސް ފެށުމުގެ ކުރިން، ދިވެހިރާއްޖޭގެ ކަނޑުގެ ހަޒާނާ ހުޅުވާލުމަށާއި އަދި ދަނޑުވެރިންނަށް ވެސް ކުރިމަތިވެފައިވާ ދަތިތަކަށް ހައްލު ގެނެސް ދިނުމަށް ސަރުކާރުން މަސައްކަތް ކުރައްވަމުން ގެންދަވާ ކަމީ، ދިވެހި މަސްވެރިންނާއި، ދަނޑުވެރިންގެ ހައްގުގައި އޭނާ ކުރަމުން އައި މަސައްކަތްތަކުގެ ނަތީޖާ ފެނިގެން ދިއުން ކަމަށް ގަބޫލު ކުރެވޭތީ ޒަހާގެ އިތުބާރު އޮތް ކަމަށެވެ. އަދި، އޭނާ ކުރެއްވި ސޮއި އަނބުރާ ގެންދަން ނިންމާފައިވާ ކަމަށް ވެސް ޖާބިރު ވިދާޅުވެފައި ވެއެވެ.
ޖާބިރުގެ ސޮއި އަނބުރާ ގެންދެވުމުން، މިނިސްޓަރ ޒަހާގެ އިތުބާރު ނެތްކަމުގެ މައްސަލަ ވަނީ ރައްޔިތުންގެ މަޖިލީހުން ބޭރު ކޮށްލައިފައެވެ.
