ސުޝާންތުގެ މަރަށްފަހު ''ފުދިއްޖެ'' ކަމަށްބުނެ މަޝްހޫރު ޑައިރެކްޓަރ އަނޫބާވް ފިލްމީ ދާއިރާ ދޫކޮށްލައިފި
ބޮލީވުޑްގެ މަޝްހޫރު ބަތަލު ސުޝާންތު ރާޖުޕޫތުގެ މަރަށްފަހު ބޮލީވުޑްގެ އަނދިރިފަރާތުގެ ވާހަކަތައް އާންމުވެފައިވާ މި ދަނޑިވަޅުގައި ''ފުދިއްޖެ''ކަމަށް ބުނެ ބޮލީވުޑްގެ އެންމެ މަޝްހޫރު އެއް ޑައިރެކްޓަރ އަނޫބާވް ސިންހާ އެ ދާއިރާ ދޫކޮށްލައިފިއެވެ.
ތުމްބިން ، ދަސް، މުލްކް އަދި ރާވަން ފަދަ މަޝްހޫރު އެތައް ފިލްމެއް ޑައިރެކްޓްކޮށްފައިވާ އަނޫބާވް ފިލްމީ ދާއިރާ ދޫކޮށްލި ސަބަބެއް ހާމަ ނުކުރިޔަސް އޭނާ ވަނީ ''ފުދިއްޖެ''ކަމަށް ބުނެ ޓްވީޓެއް ކޮށްފައެވެ. މީގެ އިތުރުން އޭނާގެ ޓުވިޓާގެ ނަން އަނޫބާވް ސިންހާ (ނޮޓް ބޮލީވުޑް) އަށް ވަނީ ބަދަލު ކޮށްފައެވެ.
ބޮލީވުޑްގައި ފައިސާވެރިންނާއި ބޮޑެތި ސުޓާރުންގެ ނުފޫޒު އޮތްވަރު ، ސުޝާންތު ރާޖުޕޫތުގެ މަރަށްފަހު ވަނީ ހާމަވެގެން ގޮސްފައެވެ. އެގޮތުން އަލަށް އަރައިގެން އަންނަ ތަރިންގެ ކެރިއާ ހަލާކުކޮށްލުމަން ފައިސާވެރިންނާއި ނުފޫޒުގަދަ މީހުން އަދާކުރާ ދައުރު ވެސް ވަނީ ހާމަވެފައެވެ. އެގޮތުން ސަންޖޭލީލާ ބަންސާލީގެ ކާމިޔާބު ދެ ފިލްމެއް ސުޝާންތު ރާޖުޕޫތަށް ލިބުނު ނަމަވެސް ، އެހެން ފިލްމް ކުންފުންޏެއްގެ އެގްރީމެންޓެއްގައި އޭނާ ބަނދެވިފައި ހުރުމުގެ ސަބަބުން ވަގުތު ނުދެވޭނެތީ ސްޝާންތަށް ޖެހުނީ އެ ފިލްމްތައް ވެސް ދޫކޮށްލާށެވެ.
އަނޫބާވްގެ މި ނިންމުމަށް ފިލްމީ ދާއިރާގެ ބައެއް މީހުން ތާއީދު ކުރިއިރު އޭނާގެ ސަޕޯޓަރުން ދަނީ ނިންމުން އަނބުރާ ގެނައުމަށް ގޮވާލަމުންނެވެ.
