ކައުންސިލު ރައީސްކަމުގެ ގޮނޑިއަށް ހިންމަފުށިން ދެބެން ވާދަކުރަނީ
މިއަދު ހެނދުނުން ފެށިގެން ކުރިއަށްދާ ލޯކަލް ކައުންސިލްތަކުގެ އިންތިހާބުގައި ކ.ހިންމަފުށީގެ ކައުންސިލްގެ ރައީސްކަމަށް އެއްބަނޑުއެއްބަފާ ދެބެއިން ވާދަކުރަމުން އެބަ ގެންދެއެވެ.
އެނގިފައިވާ ގޮތުގައި އެއީ އެ ރަށު ކައުންސިލު ރައީސްކަން އަދާ ކުރައްވަމުން ގެންދަވާ ޝާން އިބްރާހިމާއި އޭނާގެ ބޭބެ ފަރުހާދު އިބްރާހިމެވެ.
ހިންމަފުށި ކައުންސިލު ރައީސް ޝާން ވާދަ ކުރައްވަމުން ގެންދަވަނީ އިދިކޮޅު ޕީޕީއެމްގެ ޓިކެޓުގައެވެ. އޭނާގެ ބޭބެ ފަރުހާދަކީ އެމްޑީޕީ މެމްބަރެއް ކަމުގައިވީ ނަމަވެސް މި އިންތިހާބުގައި ވާދަ ކުރައްވަނީ އަމިއްލަ ގޮތުންކަމަށް ވެސް މަައުލޫމާތު ލިބިފައިވެއެވެ.
"ދެން" އަށް މައުލޫމާތު ދެއްވަމުން ޝާން ވިދާޅުވީ ދެ ފިކުރަކުން އެއް މަޤާމަކަށް ވާދަ ކުރެއްވި ކަމުގައި ވިޔަސް، އެކަމުގެ ސަބަބުން ޢާއިލާ ތެރޭގައި އެއްވެސް މައްސަލައެއް ނުޖެހޭ ކަމަށެވެ.
"ޑިމޮކްރަސީގައި އިންނާނެ ދެއްތޯ ކޮންމެ މީހަކަށް ވެސް މަޤާމަށް ވާދަ ކުރުމުގެ ފުރުސަތު، އެގޮތުން އާއިލާގައި ވެސް ކޮންމެ މީހަކަށް ވެސް އިންނާނެ އަޅުގަނޑުމެންނަކީ ދެބެން ވިޔަސް ވޯޓުލުމުގެ ފުރުސަތު. އަޅުގަނޑަށް ވޯޓު ދޭންޖެހޭ ސަބަބު އަޅުގަނޑުވާނީ އެންމެންނަށް އަންގާފަ" ޝާން ވިދާޅުވިއެވެ.
ޝާން ވިދާޅުވީ މި އިންތިހާބުގެ ނަތީޖާ ދައްކާގޮތުން އޭނާ ބަލިވި ކަމުގައިވިޔަސް ޢަމަލު ކުރައްވާނީ ޕީޕީއެމްގެ ލަފާދޭ ކޮމިޓީގެ އިރުޝާދުގެ ދަށުން ކަމަށާއި އޭނާގެ ފިކުރު އަބަދުވެސް ހުންނާނީ ޕީޕީއެމްއާއެކު ކަމަށެވެ.
