އަންނަ މަހު ކޮވިޑް ޖެހިގެން އެޑްމިޓް ކުރަން ޖެހޭ މީހުންގެ އަދަދު ދެގުނަ އިތުރުވެދާނެ: ޑރ. ޝީނާ
އަންނަ އޮގަސްޓު މަހު ކޮވިޑް ޖެހިގެން އެޑްމިޓް ކުރަން ޖެހޭ މީހުންގެ އަދަދު ދެގުނަ އިތުރުވެދާނެ ކަމަށް ޑރ. ޝީނާ މޫސާ ވިދާޅުވެއްޖެއެވެ.
މިރޭ ބޭއްވި ނޫސްވެރިންގެ ބައްދަލުވުމުގައި ޑރ. ޝީނާ ވިދާޅުވީ، ޢުމުރުން ދުވަސްވީ މީހުންނަށް ބަލިޖެހޭ ޢަދަދު މިހާރު ވަރަށް ބޮޑަށް އިތުރު ވެފައިވާކަމަށެވެ. އަދި މިހާރު އިތުރުވަމުން ދާގޮތަށް ބަލިޖެހޭ މީހުންގެ ޢަދަދު އިތުރުވަމުންދާނަމަ ހޮސްޕިޓަލުގައި އެޓްމިޓްކޮށްގެން ފަރުވާ ދޭންޖެހޭ މީހުންގެ ޢަދަދު އިތުވާނެކަމަށް އޭނާ ވިދާޅުވިއެވެ.
"ކުރިއާ އަޅާބަލާއިރު މިހާރު ދެމީހަކު ނޫނީ ތިން މީހަކު ހޮސްޕިޓަލުގައި އެޑްމިޓްކުރަމުން ދަނީ. އެކަމަކު ކުރިއަށް އޮތްތަނުގައި ލަފާކުރެވެނީ ދުވާލަކު ހަމަ ދެގުނަ ނޫނީ ތިންގުނަ އިތުވާނެކަމަށް، އެޑްމިޓް ކުރެވޭނެކަމަށް. އެހެންވީމަ އައިސީޔޫގައި ބާއްވަންޖެހޭ މީހުންގެ ޢަދަދުވެސް އިތުރުވާނެކަމަށް ލަފާކުރެވެނީ. އަދި މާލެ ސަރަހައްދުގައި ކޮވިޑަށް ތައްޔާރުކޮށްފައިވާ އެނދުތައް، އައިސީޔޫ ފަރުވާދޭންޖެހޭ އެނދުތައް ގާތްގަނޑަކަށް ކިރިޔާ އޭގެން މިވަރަށް ރޭޓް ގޮއްސިއްޔާ މެނޭޖުކުރެވޭނީ." ޑރ. ޝީނާ ވިދާޅުވިއެވެ.
މި ޢަދަދުތައް މަދުކުރެވޭނީ، މީހުންގެ ހަރަކާތްތައް މަދުވެ ދިމާވާ މީހުންގެ ޢަދަދު ދަށްކުރެވިގެންކަމަށެވެ. މިހާތަނަށް ރާއްޖޭގައި މަރުވާ މީހުންގެ ޢަދަދު އެހެން ޤައުމުތަކާއި އަލާބަލާއިރު މަދުނަމަވެސް ޖުލައި މަހުން ފެށިގެން ޢުމުރުން ދުވަސްވީ މީހުންނާއި ދިގު މުއްދަތަކަށް ފަރުވާ ހޯދަންޖެހޭ ބަލިތައް ތަހައްމަލުކުރާ މީހުންންނަށް ބަލިޖެހޭ ޢަދަދު އިތުރުވެފައިވުމުން ނިޔާވާ މީހުންގެ ޢަދަދުވެސް އިތުވާނެކަމަށް ލަފާކުރެވޭކަމަށެވެ.
Ads by STO
