ދިއްދޫގެ މިސްކިތްތަކުގައި ޖަމާއަތުގައި ނަމާދުކުރުން ހުއްޓާލައިފި
ހއ. ދިއްދޫގެ މިސްކިތްތަކުގައި ޖަމާޢަތުގައި ނަމާދުކުރުން ހުއްޓާލައިފިއެވެ.
ދިއްދޫ މޮނިޓަރިންގެ ޙާލަތަށް ގެނެސްފައިވަނީ ހއ.ކެލާ ސަވާރީބޯޓްގެ ފަޅުވެރިންތަކަކަށް ކޮވިޑް-19 ޖެހިފައިވާއިރު، އެ ބޯޓުގެ ފަޅުވެރިންނާއި ދިއްދޫގެ ވަރަށްގިނަ މީހުންނާ ދިމާވެފައިވާތީއެވެ.
ދިއްދޫ ކައުންސިލުން ނެރުބު ބަޔާނެއްގައި ބުނީ ސަވާރީ ބޯޓްގެ ފަޅުވެރިންނާ ދިމާވި މީހުން ހޯދުމަށް ކުރިޔަށް ގެންދާ ކޮންޓެކްޓް ޓްރޭސިންގެ މަސައްކަތް ނިމެންދެން، މިއަދުގެ ފަތިސް ނަމާދުން ފެށިގެން އެރަށުގެ މިސްކިތްތަކުގައި ޢީދު ނަމާދާއި ހުކުރުނަމާދާއި ފަރުޟު ނަމާދުތައް، ޖަމާޢަތުގައި ކުރުން ވަގުތީގޮތުން ހުއްޓާލާފައިވާކަމަށެވެ. އަދި ކެލާ ސަވާރީ ބޯޓުގެ ފަޅުވެރިންނާއި ބައްދަލުވެފައިވާ ނަމަ އެމީހަކު އަމިއްލައަށް ހޯމް ކަރަންޓީންވުމަށްވެސް އެރަށު ކައުންސިލުން ވަނީ އެދިފައެވެ.
މޮނިޓަރިންގެ ހާލަތު ނިމެންދެން، މިދުވަސްވަރު ގެއިން ބޭރަށް ނުކުންނަނަމަ މާސްކު އެޅުމާއި ގައިދުރުކަން ބެހެއްޓުމާއި، އެއްވެސް ބާވަތެއްގެ އެއްވުންތަކާއި ކުޅިވަރު ޙަރަކާތްތައް ނުބޭއްވުމަށް ވަނީ އަންގާފައެވެ. އަދި ގިނަގިނައިން އަތްދޮވުމާއި ޟަރޫރީ ހާލަތެއްގައި މެނުވީ އެއްވެސް ވަގުތެއްގައި ކުޑަކުދިންނާއި އުމުރުން ދުވަސްވީ މީހުން ގެއިން ބޭރަށް ނުދިއުމާއި ފިނިމައިޒާންތަކާއި ޖޯލިފަތިތަކަށް އެއްވެ ނުތިބުމަށްވެސް އަންގާފައެވެ. މީގެ އިތުރުން އެޗްޕީއޭގެ ގައިޑްލައިންތަކާއި އެއްގޮތަށް އަމަލުތައް ބަހައްޓައި ރައްކާތެރިކަމުގެ ފިޔަވަޅުތަކަށް ސަމާލުވުމަށްވެސް އެ ކައުންސިލުން ވަނީ އެދިފައެވެ.
ސަވަރީ ބޯޓުގެ އެއްވެސް ފަޅުވެރިއަކާ ބައްދަލުވެފައިވާ މީހަކު ހުރިނަމަ އެކަން ހއ. އަތޮޅު އިމަޖެންސީ އޮޕަރޭޝަން ސެންޓަރަށް ވީ އެންމެ އަވަހަކަށް އަންގައި ދިނުމަށްވެސް ދިއްދޫ ކައުންސިލުން ވަނީ އެދިފައެވެ.
