އިޓަލީ ކުއްޖަކަށް ޖިންސީ ގޯނާ ކުރި މީހާ ދޫކޮށްލައިފި
އިޓަލީގެ 17 އަހަރުގެ އަންހެން ކުއްޖަކު ރާއްޖޭގެ ރިސޯޓެއްގައި ޗުއްޓި ހޭދަކުރަމުން ދަނިކޮށް، އެ ކުއްޖާއަށް ޖިންސީ ގޯނާ ކުރިކަމަށް ބުނާ މުހައްމަދު ހަންނާދު ޝަރީއަތް ނިމެންދެން ބަންދުގައި ހުއްޓާ ހައިކޯޓުން އޭނާ ދޫކޮށްލައިފިއެވެ.
އޭނާގެ ފަރާތުން މުޖްތަމައުގައި ހިމެނޭ ކުދިންގެ ސަލާމަތަށް ނުރައްކަލެއް ކުރިމަތިވެ، އޭނާގެ ފަރާތުން މިފަދަ ކަމެއް އިތުރަށް ތަކުރާރުވެ، މި މައްސަލައިގެ ހެކިބަސް ދޭ ފަރާތްތަކަށް ނުފޫޒު ފޯރުވާނެ ކަމަށް ބެލެވޭތީ ނިލަންދެއަތޮޅު ދެކުނުބުރި ކުޑަހުވަދޫ މެޖިސްޓްރޭޓް ކޯޓުން އޭނާ ބަހައްޓައިފައި ވަނީ ބަންދުގައެވެ.
މީގެ އިތުރުން އަނިޔާ ލިބުނު ކުއްޖާގެ ނަފްސާނީ ހާލަތު އަންގައިދޭ އެއްވެސް ހެއްކެއް ހުށަހަޅައިފައި ނުވާތީ އަނިޔާ ލިބުނު އަންހެން ކުއްޖާއަށް ލިބުނު ގެއްލުންތައް އެނގެން ނެތް ކަމަށް ހައިކޯޓުން ނިންމައިފައި ވާއިރު، ރަށު ކޯޓުން އޭނާ ބަންދު ކުރަން އަމުރު ކުރި ސަބަބު ބަޔާންކޮށްފައި ނުވާތީ އެ އަމުރަކީ ގަވައިދާ ހިލާފަށް ކޮށްފައިވާ އަމުރެއް ކަމަށް ވެސް ހައިކޯޓުން ވަނީ ނިންމާފައެވެ.
ހަމައެއާއެކު، ބަންދު ކުރުމުގެ އަމުރު ނެރެފައި ވަނީ އޭނާ ހައްޔަރުކުރުމުގެ އަމުރު ވެސް ނެރުނު ފަނޑިޔާރު ކަމަށް ވާތީ އެއީ ޤާނޫނާ ހިލާފަށް ކުރި ކަމެއް ކަމަށް ވެސް އެ ހުކުމުގައި ވެއެވެ.
މި މައްސަލަ ހައިކޯޓުން ބައްލަވައިފައި ވަނީ ފަނޑިޔާރު އަބްދުﷲ ހަމީދާއި ފަނޑިޔާރު އަލީ ސަމީރުގެ އިތުރުން ފަނޑިޔާރު ހުސައިން ޝަހީދެވެ.
