ކާފިއު ގަޑީގައި ފުޓްބޯޅަ ކުޅެން ދިޔަ ބަޔަކު ޖޫރިމަނާކޮށް ދައުލަތަށް 115،000 ރުފިޔާ

އއ. އުކުޅަހުގައި ކާފިއު އިއުލާން ކޮށްފައިވާ ވަގުތެއްގައި ފުޓްބޯޅަ ކުޅެން އުޅުނު ބަޔަކު ޖޫރިމަނާކޮށް 115،000 ރުފިޔާ ދައުލަތުން ހޯދައިފިއެވެ.

Ads by Sosun Fihaara

މައުލޫމާތު ލިބޭ ގޮތުގައި ޖޫރިމަނާ ކޮށްފައިވަނީ ކުޅެން ނުކުމެ އުޅުނު 23 މީހެކެވެ. ކޮންމެ މީހަކު ވެސް 5000 ރުފިޔާއިން ވަނީ ޖޫރިމަނާ ކޮށްފައެވެ. މި އެންމެން ވެސް ކުޅެން ނިކުމެ އުޅުނީ އިއްޔެ ހަވީރެވެ. އަދި މި އެންމެން ޖޫރިމަނާ ކުރުމުގެ ސަބަބުން ރަށުގައި މިއަދު މުޒާހަރާ ކުރި ކަމަށް ވެސް މައުލޫމާތު ލިބެއެވެ.

އުކުޅަހުން ކަރަންޓީނުގައި ނެތް ބަޔަކު ކޮވިޑަށް ފައްސި ވުމާއެކު ރަށް ވަނީ މޮނިޓަރިންގެ ހާލަތަށް ލެވިފައެވެ. އަދި އެރަށުގެ ހެލްތު ސެންޓަރުން ވަނީ އެރަށުގައި ކޮމިއުނިޓީ ސްޕްރެޑަކަށް ބަލި ފެތުރެމުންދާ ކަން ހާމަ ކޮށްފައެވެ.

މިފަދަ ހާލަތެއްގައި ކަމާބެހޭ ފަރާތްތަކަށް ބޯލަނބައި ކޮންމެ މީހަކު ވެސް އެމީހެއްގެ ފަރުދީ ޒިންމާ އަދާކުރުން މަތީ ދެމިތިބުމަށް އުކުޅަހު ކައުންސިލުން ވަނީ އިލްތިމާސް ކޮށްފައެެވެ.