ކޮވިޑް ބަލީގައި ކުރީގެ އޮޑިޓަރޖެނެރަލް ފަތުހީ ދެމިއޮތުމުގެ އާލަމަށް ދަތުރުކޮށްފި
ކޮވިޑް-19 ޖެހިގެން ކުރީގެ އޮޑިޓަރ ޖެނެރަލް، ނިޝާން އިއްޒުއްދީންގެ އިއްޒަތުގެ ވެރިޔާ، އިސްމާއިލް ފަތުހީ އަވަހާރަ ވެއްޖެއެވެ.
ފަތުހީ އަވަހާރަވީ ދަރުމަވަންތަ ހޮސްޕިޓަލުގައި ކޮވިޑަށް ފަރުވާ ހޯއްދަވަމުން ގެންދަވަނިކޮށެވެ. އަވަހާރަވިއިރު އުމުރުފުޅަކީ 80 އަހަރެވެ.
ފަތުހީއަކީ ރާއްޖޭގަައި އެކައުންޓިންގް ދާއިރާއަށް ދިގުމުއްދަތަކަށް ޚިދުމަތް ކޮށްދެއްވި ބޭފުޅެކެވެ. އެ މަނިކުފާނު ވަނީ ލައިފްޓައިން އެޗީވްމަންޓް އެވޯޑާއި، ރާއްޖޭގެ އެކައުންޓިން ދާއިރާގެ ބައްޕަގެ ލަގަބު ލިބިވަޑައިގެންފައެވެ.
މާތް ﷲ އެމައްޔިތާގެ ފުރާނައަށް ހެޔޮ ރަޙްމަތް ލައްވަވައި ފާފަ ފުއްސަވައި ސުވަރުގޭގެ މަތިވެރި ނިޢުމަތް މިންވަރު ކޮށްދެއްވާށިއެވެ. އާމީން! އަދި މިހިތްދަތި ވަގުތުގައި ޢާއިލާއަށް ކެތްތެރިކަން ދެއްވާށިއެވެ. އާމީން!
إِنَّا لِلّهِ وَإِنَّـا إِلَيْهِ رَاجِعُون
މިއީ ރާއްޖެއިން ކޮވިޑް ބަލީގައި މިއަދު ނިޔާވި ތިން ވަނަ މީހާއެވެ. އަދި ރާއްޖެއިން ކޮވިޑް ބަލީގައި ނިޔާވި 126 ވަނަ މީހާއެވެ.
