ސްކޫލްތައް ބަންދުވާނީ ޖޫން 24ގައި، އައު އަހަރުގެ ފޮތްތައް ދިނުމުގެ މަސައްކަތް ދަނީ ކުރަމުން
މި އަހަރުގެ ކިޔެވުން ނިމި، ބޮޑު ޗުއްޓީއަސް ސްކޫލްތައް ބަންދު ވާނީ ޖޫން 24ގައި ކަމަށާއި ދިރާސީ އައު އަހަރުގެ ފޮތްތައް ދިނުމުގެ މަސައްކަތް މިހާރު ކުރައްވަމުން ގެންދަވާކަމަށް އެޑިއުކޭޝަން މިނިސްޓްރީން ވިދާޅުވެއްޖެއެވެ.
މިހާރު ކުރިއަށްދާ ނޫސްވެރިންގެ ބައްދަލުވުމުގައި މިނިސްޓަރ އޮފް އެޑިއުކޭޝަން ޑރ. އައިޝަތު އަލީ ވިދާޅުވީ ދެވަނަ ޓާރމްގެ ކިޔެވުމާއި އިމްތިހާނުތައް ނިމި ޖޫން 24 ގައި ސުކޫލުތައް ބަންދުވާނެ ކަމަށެވެ.
"އަޅުގަނޑުމެން މިހާރު މި މަސައްކަތް ކުރަނީ އަންނަ އަހަރަށް (އެކެޑެމިކް އަހަރަށް) ދަރިވަރުން ސްކޫލަށް ވެއްދުމުގެ މަސައްކަތްތައް ނިންމާލެވޭތޯ. އަންނަ އަހަރަށް ބޭނުންވާ ފޮތްތައް ދަރިވަރުންނަށް ފޯރު ކޮށްދިނުމުގެ މަސައްކަތް ވެސް ކުރަމުން މިދަނީ. މިހާރު ފޮތްތައް ބަހަން ވަނީ ފެށިފަ. އުންމީދަކީ ސްކޫލް ނިމޭ ދުވަހު ދަރިވަރުންނަށް ހުރިހާ ފޮތްތަކެއް ލިބޭނެ ދުވަހަށް ވުން" މިނިސްޓަރ ވިދާޅުވިއެވެ.
މިނިސްޓަރ ވިދާޅުވީ ހުރިހާ ރަށްތަކަށް ވެސް ފޮތްތައް ފޮނުވުމުގެ މަސައްކަތް މިހާރު ކުރިއަށް ދާ ކަމަށެވެ.
މީގެ އިތުރުން މިނިސްޓަރ ވިދާޅުވީ އަލަށް ސްކޫލަށް ކުދިން ވައްދަން ބޭނުންވާ ފަރާތްތަކަށް ފޯމު ދޫކުރުން ވެސް މިހާރު ސްކޫލްތަކުގައި ކުރިއަށްދާ ކަމަށެވެ.
