ކޮވިޑް ޖެހިގެން ދ.ބަނޑިދޫން މީހަކު ނިޔާވެއްޖެ
ކޮވިޑް ޖެހިގެން ދ.ބަނޑިދޫން މީހަކު ނިޔާވެއްޖެއެވެ.
“ދެން” އަށް މައުލޫމާތު ދެއްވަމުން ދ. ބަނޑިދޫ ކައުންސިލްގެ ރައީސް މުޙައްމަދު މޫސާ ވިދާޅުވީ ނިޔާވެފައި ވަނީ އުމުރުން 76 އަހަރުގެ ފިރިހެނެއް ކަމަށެވެ. އަދި އެމީހާއަކީ ދާއިމީ ބައްޔަށް ބޭސް ކުރަމުންދާ މީހެއް ކަމަށް ވެސް މޫސާ ވިދާޅުވިއެވެ.
އެމީހާއަކީ ހިތުގެ ބަލި ހުންނަ މީހެއް ކަމަށާއި ހިތް މަސައްކަތް ކުރަނީ ބެޓެރިއެއްގެ އެހީގައި ކަމަށް ވެސް މޫސަ ވިދާޅުވިއެވެ. އަދި ނިޔާވި އިރު ކޮވިޑް-19އިން ރައްކާތެރިވުމަށް ޖަހާ ވެކްސިން ޖަހައިފައި ނުވާކަމަށް ވެސް އޭނާ ވިދާޅުވިއެވެ.
މީގެ އިތުރުން މޫސަ ވިދާޅުވީ އެ މީހާ ދިރިއުޅޭ ގޭގެ ގިނަ މީހުން ކޮވިޑަށް ފައްސިވެފައިވާކަމަށާއި، އެމީހާއަށް ބަލި ޖެހި ފަރުވާ ދެމުންދިޔަތާ 4 ވަނަ ދުވަހުން ފެށިގެން ހާލު ދެރަވާން ފެށުމުން ކޮވިޑް ފެސިލިޓީއަށް ބަދަލުކުރުމަށް އެ ރަށު ސިއްޙީ މަރުކަޒުން ބޭނުންވި ކަމަށެވެ. އެހެން ނަމަވެސް އާއިލާއިން އެ މީހާ ފެސިލިޓީއަށް ބަދަލު ކުރަން ބޭނުން ނުވީ ކަމަށް މޫސާ ވިދާޅުވިއެވެ.
“ތަކުރާރުކޮށް އެމީހާ ފެސިލިޓީއަށް ބަދަލުކޮށްދޭން ސިއްހީ މަރުކަޒުން އެދެމުން ދިޔަ. ހާލަތު ގޯސްވާން ފެށުމުން ވަރަށް ގާތުން އެ މީހާގެ ހުރިހާ ކަމެއް ވެސް ސިއްހީ މަރުކަޒުން ދިޔައީ ބަލަމުން. އެކަމަކު އާއިލާއިން ބޭނުން ނުވި އޭރު ފެސިލިޓީއަށް ގެންދާކަަށް” މުސާ ވިދާޅުވިއެވެ.
މޫސަ އިތުރަށް ވިދާޅުވީ މާބޮޑަށް ހާލު ދެރަވެ، ނޭވާލާން އުނދަގޫވާން ފެށުމުން ފަހުން އާއިލާއިން އެމީހާ ކޮވިޑް ފެސިލިޓީއަށް ބަދަލުކޮށްދޭން އެދުނު ކަމަށެވެ. އޭނާ ފެސިލިޓީއަށް ގެންދަން އާއިލާ އިން އެއްބަސްވީ ރޭގެ ވަގުތެއްގައެވެ. އެއަށް ފަހު ސިއްހީ މަރުކަޒުން ދިޔައީ ލާމު ކޮވިޑް ފެސިލިޓީއަށް އެމީހާ ބަދަލުކުރުމަށް ޓަކައި ކުރަން ޖެހޭ ހުރިހާ ކަމެއް ކުރަމުން ކަމަށާއި، ސީ އެމްބިއުލާންސް އައުމަށް ހަމަޖެހިފައި އޮތީ މިއަދު 1:30ގައި ކަމަށް މޫސަ ވިދާޅުވިއެވެ. އެހެން ނަމަވެސް މިއަދު 11:20ހާއިރު ފަރުވާ ދެނިކޮށް އެމީހާ ވަނީ ނިޔާވެފައެވެ.
މިއީ ރާއްޖެއިން ކޮވިޑް-19 ޖެހިގެން ނިޔާވި 175 ވަނަ މީހާއެވެ. އަދި އެ ބަލީގައި މިމަހު ނިޔާވި 14 ވަނަ މީހާއެވެ.
މާތް ﷲ އެމައްޔިތާގެ ފުރާނައަށް ހެޔޮ ރަޙްމަތް ލައްވަވައި ފާފަ ފުއްސަވައި ސުވަރުގޭގެ މަތިވެރި ނިޢުމަތް މިންވަރު ކޮށްދެއްވާށިއެވެ. އާމީން! އަދި މިހިތްދަތި ވަގުތުގައި ޢާއިލާއަށް ކެތްތެރިކަން ދެއްވާށިއެވެ. އާމީން!
إِنَّا لِلّهِ وَإِنَّـا إِلَيْهِ رَاجِعُون
