މޮނިޓަރިންގައި އޮތް ހުޅުދުއްފާރަށް އަނގޮޅިތީމުން އެހީވެދީފި

ކޮވިޑް19ގެ ފައްސި ވޭދަނަތަކެއް ފެނި މޮނިޓަރިންއަށް ލައިފައިވާ ހުޅުދުއްފާރުގެ ރައްޔިތުންނަށް އަވަށްޓެރި އަނގޮޅިތީމުން އެހީވެދީފިއެވެ.

Ads by MWSC

އަނގޮޅިތީމު ކައުންސިލްގެ ނައިބު ރައީސް މުޙައްމަދު ޝާހީން "ދެން"އަށް މައުލޫމާތު ދެއްވަމުން ވިދާޅުވީ މި ހަރަކާތަކީ އެ ރަށުގެ ޒުވާނުން އިސްނަގައިގެން ހިންގި ހަރަކާތެއް ކަމަށެވެ. މި ހަރަކާތުގެ ދަށުން 1000 ކިލޯގެ ކަނޑު މަސް ހުޅުދުއްފާރު ރައްޔިތުންނަށް ދީފައިވާ ކަމަށް ވެސް ޝާހީން ވިދާޅުވިއެވެ.

ހުޅުދުއްފާރުން މިހާތަނަށް 43 މީހަކު ވަނީ ކޮވިޑަށް ފައްސިވެފައެވެ. އަދި ހަރަކާތްތެރި ވޭދަނައިގެ ގޮތުގައި 8 މީހަކު އެ ރަށުގައި އެބަތިއްބެވެ.އެ ރަށުގެ 14 ގެއެއް މިހާރު ވެސް ހުރީ ކަރަންޓީނުކޮށްފައެވެ. އަދި ރަށް ވެސް މޮނިޓަރިންގައި އޮންނަތާ މިއަދު މިއީ 40 ވަނަ ދުވަހެވެ. ރާއްޖޭގެ ގިނަ ރަށްރަށެކޭ އެއްފަދައިން ހުޅުދުއްފާރު ވެސް ބަންދުގައި އޮންނަތާ ގިނަ ދުވަސްތަކެއް ވެފައިވުމާއެކު އާމްދަނީ ހޯދުމަށް ގިނަ ބަޔަކު ކުރާ މަސައްކަތްތަކަށް ވަނީ ހުރަސް އެޅިފައެވެ.

ޝާހީން ވިދާޅުވީ މި އެހީގެ ސަބަބުން ހުޅުދުއްފާރުގެ ރައްޔިތުންނަށް ކޮންމެވެސް މިންވަރެއްގެ ހިތްހަމަޖެހުމެއް ލިބިގެންދާނެ ކަމަށް އުއްމީދު ކުރައްވާކަމަށާއި އެހީވުމުގައި ބައިވެރިވި އެންމެހައި ފަރާތްތަކަށާއި އަނގޮޅިތީމު އެންމެހައި ރައްޔިތުން ދައްކަވަމުންދާ އެކުވެރިކަމާއި ބަދަހިކަމަށް ޓަކައި އެ އެންމެންނަށް ޝުކުރު އަދާ ކުރައްވާ ކަމަށެވެ.

ކޮވިޑްގެ ވޭދަނަތައް ފެނި ރާއްޖޭގެ ގިނަ ރަށްރަށެއް މިވަގުތު އޮތީ މޮނިޓަރިންގައެވެ. ޝާހީން ވިދާޅުވީ މޮނިޓަރިންގައި އޮތް ރ،އަތޮޅުގެ އެހެނިހެން ރަށްރަށަށް އެހީވުމުގެ މަސައްކަތް ވެސް މިހާރު ވަނީ ފަށައިފައި ކަމަށެވެ. އެގޮތުން އަނގޮޅިތީމުން ވަނީ ދުވާފަރަށް 2000 ކާށި ވެސް ހަދިޔާ ކޮށްފައެވެ.