އޮރެންޖު ތޮށިތައް އުކައި ނުލާ، އެއީ އެއަށްވުރެ ބޭނުންތެރި އެއްޗެއް!
ވިޓަމިން މުއްސަނދި އޮރެންޖަކީ ނުހަނު މީރު މޭވާއެކެވެ. ގިނަ މީހުންނަށް އެނގޭ ގޮތުގައި އޮރެންޖުން ލިބޭ ފައިދާއަކީ ހަށިގަނޑަށް ބޭނުންނާ ވިޓަމިން ސީ ފޯރު ކޮށްދިނުމެވެ. ނަމަވެސް މިއީ ހަށިގަނޑަށް ބޭނުންވާ ފޮލިކް އެސިޑުން ވެސް މުއްސަނދިވެފައިވާ މޭވާއެކެވެ.
މީގެ އިތުރުން ވެސް އޮރެންޖަކީ އޭގެން ތަފާތު ގިނަގުނަ ފައިދާ ލިއްބައިދޭ އެއްޗެކެވެ. އެ ގޮތުން ގިނަ މީހުން އޮރުންޖު މެށުމަށް ފަހު އެއްލައިލާ ތޮށްޓަކީ ވެސް ނުހަނު ބޭނުންތެރި އެއްޗެކެވެ.
އޮރެންޖު ތޮށިން ފައިދާ ލިބޭ ވާހަކަ ބުނުމުން ގިނަ މީހުން ހީކުރާނީ ދައްކަން މިއުޅެނީ އޭގެން ހަންގަނޑު ރީތިކޮށްދޭ ވާހަކަ ކަމަށެވެ. ނުވަތަ އެފަދަ ކޮންމެވެސް ރީތި ވުމަށް ކުރެވިދާނެ ކަމެއްގެ ވާހަކަ ކަމެކެވެ. ނަމަވެސް މިފަހަރު މިއީ މުޅިން ތަފާތު ކަމެކެވެ. ގޭގައި ތިބެ ކުރެވިދާނެ ނުހަނު ޝައުޤުވެރި މަސައްކަތެއްގެ ވާހަކަ އެވެ.
އެގޮތުން މިފަހަރު އޮރެންޖު ތޮށި ބޭނުން ކޮށްގެން ތައްޔާރު ކުރަންވީ އުއްބައްތިއެވެ. މިއީ ނުހަނު ޝައުޤު ވެރި މަސައްކަތަކަށް ވާނޭކަން ޔަޤީނެވެ. އަދި މީގެ އިތުރުން ގޭތެރޭގެ ވަސް ރަނގަޅު ކުރަން ވެސް ކުރެވިދާނެ މޮޅު ކަމެކެވެ.
އެންމެ ފުރަތަމަ ކަމެއްގެ ގޮތުގައި އޮރެންޖުގެ ތޮށިގަނޑު މެށުމަށް ޓަކައި އޮރެންޖު މެދުން ފަޅައިލާށެވެ. އަދި ފަރުވާތެރި ކަމާއެކު ފަޅިކުރި ދެބައިގެ ތެރޭގައި ހުރި އޮރެންޖުގެ ބައިތައް ނަގާށެވެ. އޭރުން ތޮށިގަނޑު އޮންނަންވާނީ ބޯ ތަށްޓެއްގެ ބައްޓަމަށް އެތެރެ ހުސްކޮށެވެ.
މިގޮތަށް އޮރެންޖުގެ ތޮށި މަށައިލުމަށް ފަހު ބޮޑު " ޓީ ލައިޓް" އުއްބައްތިއެއް އޭގެ ތެރޭގައި ބަހައްޓާށެވެ. " ޓީ ލައިޓް" އުއްބައްތި ބެހެއްޓުމުގެ ކުރިން އޭގެ ވަށައިގެންވާ ފޮއިލް ކޮޅު ނުވަތަ ދަގަނޑު ބައި ނައްޓާލަން ވާނެއެވެ. އަދި އެހެން އުއްބައްތިއެއް ކުޑަ ތަވައެއްގައި ރަނގަޅަށް ވިރުވައިލާށެވެ.
އޭރުން ހުންނާނީ "ކެންޑަލް ވެކްސް" ތައްޔާރު ކުރެވިފައެވެ. ވެކްސް ތައްޔާރު ކުރެވުމުން ކުރިން އޮރެންޖު ތޮށިގަނޑުގެ ތެރޭގައި ބެހެއްޓި " ޓީ ލައިޓް " އުއްބަތީގެ ވަށައިގެން އަޅައިލާށެވެ. މީގެ ބޭނުމަކީ ތޮށީގެ ތެރެ ރަނގަޅަށް ފުރިފައި ބެހެއްޓުމެވެ. އަދި ކުރިން ބެހެއްޓި "ޓީ ލައިޓް" އުއްބަތި ތޮށިގަނޑުގެ ތެރޭގައި ރަނގަޅަށް ހަރުލެއްވުމެވެ.
މިއީ ވަރަށް ފަސޭހައިން ތައްޔާރު ކުރެވިދާނޭ އެއްޗެކެވެ. އަދި އެހާމެ މީރު ގުދުރަތީ ވަހެއް އެކުލެވިގެންވާ އުއްބަތިއެކެވެ.
އެހެންކަމުން އޮރެންޖުގެ ތޮށި މަށައިލުމަށް ފަހު އުކައި ނުލާށެވެ. އޭގެ ބަދަލުގައި މިފަދަ ކޮންމެވެސް ބޭނުންތެރި ފައިދާއެއް އޭގެން ހިފޭތޯ ބަލާށެވެ.
ހްމްްްްމްމްމް އަހަރެން ބޭނުމީ މީރު ވަސް
ތިވަރަށް އިސްތިހާރުކޮށްލޮއިރު އަޅެފަހެ ވީޑިއޯކޮޅެއް ސެއާރ ކޮހލިނަމަ
ތިޔަވަރަށް އޮރެންޖްގެ ބޭނުންތެރިކަން އައިމާ ދެނެއް އަހަރުމެންކަހަލަ ސޮރުންނަކަށް އޮރެންޖެއް ގަންނާކަށް ނުލިބޭނެ. އޮރެންޖަށް ވަރަށް ބާރުބޮޑުވާނެ. މިއީފަހެ ދޮގެއްތަ.