އިންޑިއާ ހައި ކޮމިޝަން ގޮއްވައިލާން ބުނި މީހާގެ ބަންދަށް އިތުރު 7 ދުވަސް

މާލޭގައި ހުންނަ އިންޑިއަން ހައި ކޮމިޝަން ގޮއްވައިލާނެ ކަމަށް ބުނެ ޓްވީޓް ކުރި މީހާގެ ބަންދަށް 7 ދުވަސް އިތުރު ކޮށްފިއެވެ.

Ads by STELCO

އިންޑިއަން ހައިކޮމިޝަން ގޮއްވައިލާނެކަމަށް ބުނެ ޓްވީޓްކުރިކަމުގެ ތުހުމަތުގައި މިދިޔަ ހޮނިހިރު ދުވަހު ހައްޔަރުކޮށްފައި ވަނީ 42 އަހަރުގެ ދިވެހި ފިރިހެނެއްކަމަށް ފުލުހުން ވަނީ ވިދާޅުވެފައެވެ. އެހެން ނަމަވެސް އެ މީހާއާ ބެހޭ އެއްވެސް ތަފްސީލެއް ފުލުހުން ހާމައެއް ނުކުރައްވައެވެ.

އެމީހާގެ ނަން ފުލުހުން ހާމަ ނުކުރެއްވި ކަމުގައި ވިޔަސް، މިމައްސަލައިގައި ހައްޔަރު ކޮށްފައި ވަނީ އެމްޑީޕީއަށް ނިސްބަތްވި މުޙައްމަދު އިނާދު ނަމަކަށް ކިޔާ މީހެކެވެ. މި ތުހުމަތާ ގުޅިގެން އެމްޑީޕީން ވަނީ އޭނާ މެމްބަރުކަމުން ވަކިކޮށްފައެވެ.

"ރޮޔަލް ހުސެން ތަކުރު" ނަމުގައި އޮތް ޓްވިޓާ އެކައުންޓަކުން މިދިޔަ ހަފްތާގައި ކުރި ޓްވީޓެއްގައި ބުނެފައި ވަނީ އިންޑިއާ ހައި ކޮމިޝަން ގޮއްވައިލާން އާރްޑީއެކްސް ބޭނުންވާ ކަމަށާއި އެކަން ވަރަށް އަވަހަށް ކުރާނެ ކަމަށެވެ.

މި އިންޒާރާ ގުޅިގެން ފުލުހުން ނެރުނު ބަޔާނުގައި ވިދާޅުވެފައި ވަނީ، އިންޑިއާ ހައި ކޮމިޝަން ގޮއްވައިލާނެ ކަމަށް ބުނުމުން މިހާރު އެތަނާއި ޗައިނާގެ އެމްބަސީގެ ސެކިއުރިޓީ ވަރުގަދަ ކޮށްފައިވާ ކަމަށެވެ.