ނަޝީދަށް ދިން ހަމަލާގެ ތަހްގީގަށް އެއްވެސް ވަރެއްގެ ނުފޫޒެއް ނެތް: އިމްރާން
ރައްޔިތުންގެ މަޖިލީހުގެ ރައީސް، މުހައްމަދު ނަޝީދަށް އަމާޒުކޮށް ދިން ޓެރަރިސްޓް ހަމަލާގެ ތަހްގީގު ކުރިއަށް ދަނީ އެއްވެސް ފަރާތެއްގެ ނުފޫޒެއް ނެތި ކަމަށާއި މި ތަހްގީގަކީ ރާއްޖޭގެ ޑިމޮކްރަސީގެ ހަޔާތުގައި އެންމެ ފުރިހަމަ އެއް ތަހުގީގުކަމަށް ހޯމް މިނިސްޓަރ އިމްރާން އަބްދުﷲ ވިދާޅުވެއްޖެއެވެ.
މިނިސްޓަރ އިމްރާން މިހެން ވިދާޅުވީ ރާއްޖެޓީވީގެ ފަލަ ސުރުޚީ ޕްރޮގްރާމްގައި ވާހަކަ ދައްކަވަމުންނެވެ. އިމްރާން ވިދާޅުވީ ހައެއް މެއިގެ ތަހްގީގް ކުރިއަށް ގެންދަނީ ފުލުހުންނަށް ލިބިދޭ ހުރިހާ ވަސީލަތްތަކެއް ލިބިމެ، އެ ވަސީލަތްތައް ބޭކާރު ނުކޮށް އެންމެ ފުރިހަމައަށް ކަމަށާއި މިކަމުގައި ސަރުކާރުން ދީފައި ވަނީ ޕޮލިސީ ލެވެލްގެ އިރުޝާދުތަކެއް ކަމަށާއި، އަދި މި މައްސަލައިގައި ރައީސް ޞާލިޙް ގެންގުޅުއްވި އުސޫލުތަކަކީ ތައުރީފު ހައްގު އުސޫލުތަކެއް ކަމަށެވެ.
"މި ތަހުގީގު ކުރިއަށް ދަނީ އެއްވެސް ވަރެއްގެ ނުފޫޒެއް ނެތި، ފުލުހުންނަށް ލިބިދޭ ހުރިހާ ވަސީލަތްތަކެއް ލިބިމެ، އެ ވަސީލަތްތައް ބޭކާރު ނުކޮށް އެންމެ ފުރިހަމައަށް. މިކަމުގައި ސަރުކާރުން ދީފައި ވަނީ ޕޮލިސީ ލެވެލްގެ އިރުޝާދުތަކެއް. މި މައްސަލައިގައި ރައީސް ޞާލިޙް ގެންގުޅުއްވި އުސޫލުތަކަކީ ތައުރީފު ހައްގު މަސައްކަތްޕުޅުތަކެއް. އެގޮތުން މި މައްސަލައިގެ ދެފުށް ފެންނަކަން ކަށަވަރުކުރުމަށް ބޭނުންވާ ހުރިހާކަމެއް އިންތިޒާމުކޮށް މި މައްސަލަ އެންމެ ފުރިހަމަ ތަހުގީގެއްގެ ގޮތުގައި ނިންމާލެވޭނެކަމުގެ ޔަގީންކަން އެބަ އޮތް." އިމްރާން ވިދާޅުވިއެވެ.
އިމްރާން ވިދާޅުވީ ހޯމް މިނިސްޓަރުގެ ހައިސިއްޔަތުން ރައްޔިތުންގެ މަޖިލީހަށާއި، އަދި މިނޫނަސް ޖަވާބުދާރީ ވާންޖެހޭ ހުރިހާ ތަނަކަށް ޖަވާބުދާރީ ވުމަށް ފަސްނުޖެހެނީ ވެސް މި ސަބަބަށް ޓަކައި ކަމަށް ވެސް އިމްރާން ވިދާޅުވިއެވެ.
މަޖިލީހުގެ ރައީސް، ރައީސް ނަޝީދަށް ދިން ހަމަލާއާ ގުޅިގެން އެމަނިކުފާނަށް ދެމުން ގެންދާ ސަލާމަތާއި ރައްކާތެރިކަން ބްރީޗްވި ގޮތް ހޯދުމަށް ރައްޔިތުންގެ މަޖިލީހުގެ ސަލާމަތީ ޚިދުމަތްތަކާ ބެހޭ ކޮމިޓީން ކުރިއަށް ގެންދިޔަ އިންކުއަރީގެ ރިޕޯޓް ރޭ ވަނީ އެ ކޮމިޓީން ފާސްކޮށްފައެވެ.
