ކާށިދޫގެ ހާލަތު ގޯހުން ގޯހަށް، ފައްސިވި އަދަދު 100އިން މައްޗަށް
ކޮވިޑް19 ގެ ވޭދަނައެއް ފެނި މި ޖުލައި މަހުގެ 14 ވަނަ ދުވަހު މޮނިޓަރިންއަށް ލައިފައިވާ ކ.ކާށިދޫގެ ހާލަތު ގޯސްވެ ކޮވިޑް19އަށް ފައްސިވީ މީހުންގެ ޖުމްލަ އަދަދު 104އަށް އަރައިފިއެވެ.
"ދެން"އަށް މައުލޫމާތު ދެއްވަމުން ކާށިދޫ ކައުންސިލްގެ ރައީސް މުހައްމަދު އާމިރު ވިދާޅުވީ ރަށުގެ ހާލަތު ގޯސްވުމުގެ ސަބަބުން ރޭގަނޑު 9އިން ފަތިހު 4އަށް ކާފިއު އިއުލާނުކޮށް ޒަރޫރީ ބޭނުންތަކަށް ފިޔަވައި ގެއިން ބޭރަށް ނުކުތުން މަނާކޮށްފައިވާ ކަމަށެވެ.
"ރަށުގެ ހާލަތު ގޯސްވުމުން ރަށު ތެރޭގެ މޫވްމެންޓްސް މިވަނީ މަދުކޮށްފައި. ކެފޭ ރެސްޓޯރެންޓްތައް ބަންދުކޮށް ފިހާރަތަކުން ޑެލިވަރީކޮށް އާއްމުތަންތާ ހުރި ޖޯލިފަތިތައް ވެސް މިހާރު ވާނީ ނަގައިފައި." އާމިރު ވިދާޅުވިއެވެ.
އާމިރު ވިދާޅުވީ ރަށުގެ އެތެރޭގެ ހަރަކާތްތައް އަދިވެސް މަދުކުރުމަށް ކޮންމެ ގޭބީސީއަކަށް ވަކި އަދަދަކަށް ޕާމިޓް ދިނުމުގެ މަސައްކަތް ކުރަމުންދާކަމަށެވެ.
"ރަށުގެ އެތެރޭގެ މޫވްމެންޓްސް އަދިވެސް މަދުކުރުމަށް ކޮންމެ ގޭބީސީއަކަށް ވަކި ވަރަކަށް ޕާމިޓް ދޫކުރުމުގެ މަސައްކަތް މިހާރު މި ކުރިއަށް ގެންދަނީ. އޭރުން އެއް ގެއިން އަނެއް ގެއަށް ދިޔުން ވެސް މަނާވާނެ." އާމިރު ވިދާޅުވިއެވެ.
އާމިރު ވިދާޅުވީ މިއީ ކާށިދޫ މޮނިޓަރިންއަށް ލީ ދެވަނަ ފަހަރު ކަމަށާއި ފުރަތަމަ ފަހަރު ހާލަތު ގޯސް ނުވަނީސް ކޮންޓްރޯލް ކުރެވުނު ނަމަވެސް މިފަހަރު ރަށުތެރޭ ބަލި އުޅޭކަން އެނގުނު އިރު ވެސް ރަށުތެރެއަށް ވަރަށް ބޮޑަށް ބަލި ފެތުރިފައިވާކަމަށް ލަފާކުރެވޭ ކަމަށެވެ.
Ads by STO
