ކޮވިޑް-19ގެ ނުރައްކާ ނެތްކަމަށް ބަލަން އަދި އަވަސް: މައުޞޫމް
މުޅި ރާއްޖެ ހުއްޓުމަކަށް ގެނައި ކޮވިޑް-19ގެ ބަލީގެ ނުރައްކާ ނެތް ކަމަށް ނިންމަން އަދި މާ އަވަސް ކަމަށް ޓޫރިޒަމް މިނިސްޓަރ ޑރ. އަބްދުﷲ މައުޞޫމް ވިދާޅުވެއްޖެއެވެ.
މިއަދު ކުރެއްވި ޓްވީޓެއްގައި މައުޞޫމް ވަނީ ފަތުރުވެރިކަމުގެ ދާއިރާގައި ހަރަކާތްތެރިވާ ފަރާތްތަކަށް ނަސޭޙަތްތެރިވެ ވަޑައިގެންފައެވެ. މިގޮތުން މައުސޫމް ވިދާޅުވީ، "އިންތަކާއި މިންތަކާ އެއްގޮތަށް ފަތުރުވެރިކަމުގެ ވިޔަފާރި ކުރެއްވުމަށް ސަމާލު"ވެ ލެއްވުމަށެވެ.
މިގޮތަށް ވިދާޅުވަމުން މިނިސްޓަރ ވިދާޅުވީ، އިއްޔެ ރާއްޖެއަށް ދަތުރު ކުރި މީހުންގެ ތެރެއިން ސައުތު އޭޝިއާގެ 9 ބައްޔަށް ފައްސިވެފައިވާ ކަމަށެވެ. މީގެ ތެރޭގައި ބަނގްލަދޭޝްއަށް ނިސްބަތްވާ 6 މީހަކާއި، އިންޑިއާއަށް ނިސްބަތްވާ މީހަކާއި، ސްރީލަންކާއަށް ނިސްބަތްވާ މީހެއް ހިމެނޭ ކަމަށް މިނިސްޓަރ ވިދާޅުވިއެވެ.
ސައުތް އޭޝިއާގެ ޤައުމުތަކުން ރާއްޖެއަށް ފަތުރުވެރިން އައުމުގެ ހުއްދަ ދީފައި ވަނީ ޖުލައި މަހުގެ 15 ވަނަ ދުވަހުއެވެ. އެ ޤައުމުން މީގެ ކުރިން އޮތީ ފަތުރުވެރިން އައުން މަނާކޮށްފައެވެ. މިގޮތަށް ކަންތައް ކޮށްފައި ވަނީ، އެ ޤައުމުތަކުގައި ކޮވިޑް-19 ޑެލްޓާ ވޭރިއަންޓް ވަރަށް ބޮޑަށް ފަތުރުމާ ގުޅިގެންނެވެ. ބޯޑަރު ބަންދު ކުރުމުގެ ކުރިން އެ ސަރަހައްދުގެ ޤައުމުތަކުން ރާއްޖެއަށް ގިނަ އަދަދެއްގެ ފަތުރުވެރިން ޒިޔާރަތް ކުރިކަން ފާހަގަކޮށްލެވެއެވެ. އެ ޤައުމުތަކުން ފަތުރުވެރިން އައުން މަނާ ކުރީ ގިނަ ބަޔަކު އެމަކާ ނުރުހުންވުން ފާޅު ކުރުމުންނެވެ، ސައުތް އޭޝިއާގެ ޤައުމުތަކުގައި އަދިވެސް ހަލުވި ކަމާއެކު ކޮވިޑް-19 ދަނީ ފެތުރުމުންނެވެ. މިފަދަ ހާލަތެއް އޮއްވާ އެޤައުމުތަކުގެ ފަތުރުވެރިން ރާއްޖެއަށް އެތެރެވުމުގެ ހުއްދަ ދިނުމުން ގިނަ ބަޔަކު ދަނީ ކަންބޮޑުވުން ފާޅު ކުރަމުންނެވެ.
