ދިޔާނާއާއި ޖާބިރު ވަރިވެއްޖެ

ކާށިދޫ ދާއިރާގެ މެމްބަރު ޢަބްދުﷲ ޖާބިރުއާއި ކުރީގެ ބަންޑާރަ ނައިބު ދިޔާނާ ސައީދު ވަރިވެއްޖެއެވެ.

Ads by Hajj Corporation

ދިޔާނާއާއި ޖާބިރު ވަރުވެފައިވާކަން ދިޔާނާ ވަނީ "ދެން"އަށް ކަށަވަރު ކޮށްދެއްވައިފައެވެ.

މިއަދު ކުރެއްވި ޓްވީޓެއްގައި ދިޔާނާ ވަނީ ޖާބިރު އޭނާ ވަރިކުރިކަން ވެސް ހާމަކޮށްފައެވެ. މިގޮތުން ކުރެއްވި ޓްވީޓެއްގައި ވިދާޅުވީ، "އަޅުގަނޑަކީ އެއްވެސް މީހެއްގެ އަނތްބެއް ނޫން" ކަމަށެވެ.

މިކަން ކަށަވަރު ކުރުމަށް ދިޔާނާއަށް "ދެން" އިން ގުޅައިލުމުން ވިދާޅުވީ، ދެމަފިރިން ވަރިވެފައި ވަނީ 15 އަހަރަށް ފަހު ކަމަށެވެ. ނަމަވެސް ވަރި ކުރި ސަބަބު ހާމައެއް ނުކުރައްވައެވެ.

"އަޅުގަނޑު ސަޖިދައަށް ތިރިވާ އިރު ފަސް ދުއާއެއް ކުރަން. އޭގެ ތެރެއިން ފުރަތަމަ ދުއާ އަބަދުވެސް ކުރަނީ ޖާބިރުއަށް. ޖާބިރުއަށް ދުއާ ކޮށްފަ އަޅުގަނޑުގެ ބައްޕައަށް ވެސް ދުއާ ކުރަނީ. އެކަން ފަހުން ވެސް އިންނާނީ އެ ގޮތަށް، އަބަދުވެސް ޖާބިރުގެ މައްޗަށް ހެޔޮ ދުއާ ކުރާނަން" ދިޔާނާ ވިދާޅުވިއެވެ.

މިކަމާ ގުޅޭގޮތުން ޖާބިރުގެ ބަހެއް އަދި ވަނީ ލިބޭ ގޮތް ނުވެފައެވެ. ނަމަވެސް ދިޔާނާ ދެކެ ލޯބިވާ ކަމަށް ޖާބިރު އަބަދުވެސް އަންނަނީ އެކިއެކި އިންޓަވިއުތަކުގައި ވިދާޅުވަމުންނެވެ.