ކޮވިޑް-19އާ ގުޅިގެން ހިމަންދޫގައި ޖަމާއަތުގައި ނަމާދުކުރުން މެދުކަނޑައިލައިފި
ހަލުވިކަމާ އެކު ކޮވިޑް-19 ފެތުރެމުން ދާތީ އއ. ހިމަންދޫގައި ޖަމާއަތުގައި ނަމާދުކުރުން މެދުކަނޑަލައިފިއެވެ.
ހިމަންދޫ ކައުންސިލުން ވިދާޅުވީ މިއަދުގެ ފަތިސްނަމާދުން ފެށިގެން މިމަހު 19ވަނަވާ ދުވަހުގެ ރޭ އިޝާ ނަމާދުގެ ނިޔަލަށް ހިމަންދޫ މަސްޖިދުލް އުލާގައި ފަރުޟު ނަމާދުތަކާއި ހުކުރު ނަމާދުގެ ޖަމާއަތް ވަގުތީގޮތުން މެދުކަނޑައިލާން އިސްލާމިކް މިނިސްޓްރީން ސިޓީއިން އަންގަވައިފައިވާ ކަމަށެވެ.
ކައުންސިލުން ވަނީ މިސްކިތުގެ ޖަމާއަތުގައި ނަމާދު ނުކުރި ނަމަވެސް ފަރުޟު ފަސް ނަމާދު ބަރާބަރަށް އަދާކުރުމަށާއި، ސުންނަތް ނަމާދު ގިނަކޮށް، ޤުރުއާން ކިޔަވައި ގިނަގިނައިން ދުއާކޮށް، އިސްތިޣްފާރު ކުރުމަށް ހިމަންދޫގެ ރައްޔިތުންނަށް ނަސޭހަތްތެރިވެފައެވެ. އަދި ކޮންމެހެން ބޭރަށް ނިކުންނަން ޖެހިއްޖެ ހާލަތެއްގައި މެނުވީ ބޭރަށް ނުނިކުތުމަށާއި، ކޮންމެހެން ބޭރަށް ނިކުމެ އުޅެންޖެހޭ ފަދަ ޒަރޫރީ ބެނުމެއް ޖެހިގެން ބޭރަށް ނިކުންނަ ފަރާތްތަކުން މާސްކް އެޅުއްވުމަށާއި، ގާތްދުރުކަން އިސްކުރުމަށާއި، ގިނަގިނައިން ސައިބޯނިލައިގެން އަތް ދޮވުމަށާއި، އަދި މިނޫން ވެސް ރައްކާތެރިކަމަށް އެޅެންހުރި ފިޔަވަޅުތައް އެޅުމަށް ވެސް ކައުންސިލުން ވަނީ އިލްތިމާސްކޮށްފައެވެ.
ހިމަންދޫން އެންމެ ފުރަތަމަ މީހަކު ބައްޔަށް ފައްސިވީ އެ ރަށަށް އީދު ޗުއްޓީއަށް ދިޔުމަށް ފަހު ފަހު އެނބުރި މާލެ އައި މީހެކެވެ. އެމީހާއާ ގާތުން އެއްތާވި ފަރާތްތަކުގެ ތެރެއިން ނެގުނު ސުންކުން 3 އޯގަސްޓް 2021 ގައި 4 މީހަކުވަނީ ކޮވިޑް ބައްޔަށް ފައްސިވެފައެވެ.
