"ނޫސްވެރިއަކަށް ވުމުގެ ކުރިން ރިޟްވާން އުޅުނީ ޑޮޓް މީހުންނާއެކީގައި"
ވީ ނުވީއެއް ނޭނގި ގެއްލުވާލާފައިވާ މިނިވަން ނޫހުގެ ނޫސްވެރިޔާ އަޙްމަދު ރިޟްވާނަކީ ނޫސްވެރިކަމުގެ ދާއިރާއަށް ވަނުމުގެ ކުރީގައި ރާއްޖޭގައި ހަރަކާތްތެރިވާ ހަރުކަށި ފިކުރުގެ ޖަމާއަތެއް ކަމަށްވާ ޑޮޓް ޖަމާއަތުގެ މީހުންނާއެކު އުޅުނު މީހެއް ކަމަށް ތަޙްޤީޤްތަކުން ހާމަވާ ކަމަށް ރިޟްވާން ގެއްލުނު ދުވަސްވަރު ހޯމް މިނިސްޓަރަކަށް ހުންނެވި އުމަރު ނަސީރު ވިދާޅުވިއެވެ.
ރިޟްވާން ގެއްލުވައިލި މައްސަލައިގައި ދައުލަތުގެ ބައެއްގެ އަތެއްވޭތޯ ކުރި ސުވާލަކަށް ޖަވާބު ދެއްވަމުން ސަންގު ޓީވީއިން ގެނެސްދިން ޚަބަރަށް ފަހު ޕްރޮގްރާމްގައި ވާހަކަފުޅު ދައްކަވަމުން އުމަރު ވިދާޅުވީ، ރިޟްވާން ގެއްލުނު މައްސަލައަކީ ދަޢުލަތާ ގުޅޭ މައްސަލައެއް ނޫން ކަމަށާއި މައްސަލައަކީ އޭނާއާ ދީނީ ގޮތުން ޚިޔާލު ތަފާތުވި ބަޔަކާ ދެމެދު ޖެހުނު މައްސަލައެއް ކަމަށެވެ.
"ރިޟްވާނަކީ ރިޕޯޓަރަކަށް ވުމުގެ ކުރީގައި ރާއްޖޭގައި ހަރުކަށި ފިކުރު ކަމަށް ޤަބޫލު ކުރެވޭ ޑޮޓް ޖަމިއްޔާގައި މަސައްކަތް ކުރި ކުއްޖެއް. ޑޮޓް ޖަމިއްޔާގައި ތުނބުޅި ދިގުކޮށްގެން ބޮލުގައި ފޮށާ އޮޅައިގެން އުޅުނު ކުއްޖެއް ރިޟްވާނަކީ. މިކަން ފަހަރެއްގައި މީހުންނަށް ނޭނގިދާނެ. މިހެން އުޅެފަ ރިޟްވާން އެމީހުންގެ ތެރެއިން ވަކިވެގެން ދެން ދިޔައީ މިނިވަން ނޫހަށް. ގޮސްފައި ސެކިއުލަރ ވިސްނުމުގައި އެ މީހުންނާ ދިމާކޮށްފައި ވާހަކަ ދައްކާ ހަދަން ފެށީ. އޭގެ ސަބަބުން އެ ދެބައި ދޭތެރޭގައި ކޯޅުމެއް އައީ." އުމަރު ވިދާޅުވިއެވެ.
ރިޟްވާން ގެއްލުނުތާ މިހާރު 7 އަހަރު ވެފައިވާއިރު، ގެއްލިފައިވާ މީހުންނާއި މަރައިލެވިފައިވާ މީހުންގެ މައްސަލަ ތަޙްޤީޤް ކުރަން ރައީސް ޞާލިޙް އުފެއްދެވި މަރު ކޮމިޝަނަށް ވެސް ރިޟްވާންގެ މައްސަލައިގައި ކުރިއެރުމެއް ހޯދިފައިނުވާކަން ފާހަގަކޮށްލެވެއެވެ.
ރިޟްވާން ގެއްލުނު މައްސަލައިގައި ރައީސް ޔާމީން އަބްދުލްޤައްޔޫމް ވެސް ވަނީ މިދިޔަ ހަފްތާގައި މަރު ކޮމިޝަނަށް ހާޒިރުކޮށްފައެވެ. ރައީސް ޔާމީން މަރު ކޮމިޝަނަށް ހާޒިރުކޮށްފަ އިވަނީ ރިޟްވާންގެ މައްސަލައިގައި ތަޙްޤީޤަށް ހުރަސް އެޅި ކަމުގެ ތުހުމަތުގައެވެ. މިކަމާ ގުޅިގެން އުމަރު ވިދާޅުވީ، ރައީސް ޔާމީން ވެސް އަދި އޭރު ދަޢުލަތުގައި ހުންނެވި އެއްވެސް ބޭފުޅަކު ވެސް ރިޟްވާންގެ މައްސަލައިގައި ތަޙްޤީޤަށް ނުފޫޒު ފޯރުވަން މަސައްކަތްކޮށްފައި ނުވާ ކަމަށެވެ.
"އަޅުގަނޑަށް އެނގިގެން އެއްވެސް ބޭފުޅަކު ސަރުކާރުގެ ތެރެއިން މި މައްސަލައަށް ނުފޫޒު ފޯރުވަން މަސައްކަތްކޮށްފައެއް ނެތް. ސަބަބަކީ އަޅުގަނޑު ދިޔައީ ކޮންމެ ހަފްތާއަކު އެއްފަހަރު މިމައްސަލައާ ބެހޭ ބްރީފިންގްއެއް އަޅުގަނޑުގެ މޭޒު މައްޗަށް ގެންނަމުން. ސަބަބަކީ ހަފްތާއަކު އެއްފަހަރުހެން އަޅުގަނޑު ރިޟްވާންގެ އާއިލާއާ ބައްދަލު ކުރަން. އަދި އަޕްޑޭޓް ދެމުން ގެންދިޔައިން" އުމަރު ވިދާޅުވިއެވެ.
އުމަރު ވިދާޅުވީ، ރިޟްވާންގެ މައްސަލައިގައި އާއިލާއިން ތުހުމަތު އޭރުގެ ނައިބު ރައީސް އަޙްމަދު އަދީބަށް ތުހުމަތުތަކެއް ކުރި ކަމަށާއި އެހެން ނަމަވެސް ފަހުން ރައީސް ޔާމީނަށް ހަމަލާދީގެން އަދީބު ހައްޔަރު ކުރި އިރު ރިޟްވާންގެ މައްސަލައިގައި ހިމެނޭ ހެކީގައި އަދީބުގެ ފިންގަރޕްރިންޓް ހުރިތޯ ބެލި ކަމަށެވެ. އަދި މައްސަލައާ އަދީބާ ނުގުޅޭ ކަމަށް ވެސް އޭނާ ވިދާޅުވިއެވެ.
އުމަރުގެ ވާހަކަފުޅުގައި އޭނާ ވަނީ ރިޟްވާންގެ މައްސަލައިގައި ރައީސް ޔާމީން އޭނާއަށް ފޮނުވި ކަމަށް ބުނާ މެސެޖްގެ ހަޤީޤަތް ކިޔައިދެއްވައިފައެވެ. މިގޮތުން ވިދާޅުވީ، "ޑޯންޑް ބީ އޯވާވެލްމް" މިހެން ވިދާޅުވެ މެސެޖުކޮށްފައި ވަނީ ކެބިނެޓްގެ ވަޒީރުން ތިއްބަވާ ވައިބަރ ގްރޫޕަކަށް ކަމަށެވެ. އަދި އޭގެ މާނައަކީ މައްސަލަ އޮއްބާލާށޭ ނުވަތަ ބުރަކި ހިފާށޭ ނޫން ކަމަށާއި ދައުލަތުގެ ރިސޯސްތައް އެއް ދިމާއަކަށް ޑައިވާޓް ކުރާނީ، އެކަމާ ވިދާޅުވި އެއްޗެއް ކަމަށް އުމަރު ވިދާޅުވިއެވެ.
"އެހެން ވިދާޅުވުމުގެ އެއް ދުވަސް ކުރިން، ރިޟްވާންގެ މައްސަލައިގައި ބްރީފިންއެއް ދެމުން އަޅުގަނޑު ދެންނެވިން އެ ބޭފުޅާއަށް މިހާރު 80 ފުލުހުން ވެއްޖޭ ކޯސްޓް ގާޑާއެކީގައި ޑިޕްލޮއިކޮށްފައި އޭނާ ފެނޭތޯ، ހުޅުމާލޭގެ ބޭރަށް ޑައިވް ކުރަންށާ ވަރަށް ގިނަ މަސައްކަތް ކުރަން. ބުނީމަ ވިދާޅުވީ، އާނ ރަނގަޅޭ. ކެބިނެޓް ވައިބަރ ގްރޫޕްގައި އެ ބޭފުޅާ އެ މެސެޖް ލިޔުއްވި ދުވަހު، ދުންޔާ ލިޔުއްވި ވާހަކައަކަށް، އަޅުގަނޑު އެ މަސައްކަތް ކުރަމުންދާ ވާހަކައާއި އަދި އިތުރު ސިފައިން އެތަނަށް ފޮނުވަން އުޅޭ ވާހަކަ އަޅުގަނޑު ޖެހީމަ ދެން އެބޭފުޅާ ވިދާޅުވަނީ، ދެން ތިވަރުކޮށް ނުލިޔަސް ނުވާނޭ" އުމަރު ވިދާވީ ވެރިއެއްގެ ހައިސިއްޔަތުން މިއީ ވަޒީރަކާ ދިމާއަށް ބުނެވޭނެ ވާހަކައެއް ކަމަށާއި އަދި ބުނަން ޖެހޭ ވާހަކައެއް ކަމަށެވެ.
ސެހެނާޒަކީީ ސަމާލުކަން ހޯދަން އުޅޭ މީހެއް