އައްޑޫ ސިޓީ ގައި ހުރި ވެހިކަލްތައް އާރުޑީސީއަށް ނުގެންދެވޭނެ ސަބަބެއް ނެތް: ކައުންސިލް
އައްޑޫގެ މަގުތައް ހަދާ ޔުނިޓްގެ ވެހިކަލްތަކެއް މާލެ ގެންދަން ބާޖަކަށް އަރުވައި، މިއަދު އިރުއޮއްސެން އުޅެނިކޮށް ފުރަން ތައްޔާރުވަމުން ދަނިިކޮށް، ހިތަދޫން ބަޔަކު ނުކުމެ އެކަމާ ދެކޮޅަށް އިހުތިޖާޖުކޮށް، އެ ވެހިކަލްތައް ބާޖުން ބޭލުވި ނަމަވެސް އެ ވެހިކަލްތަކަކީ އާރުޑީސީއަށް ކައުންސިލުން ދޫކޮށްފައިވާ ވެހިކަލްތަކެއްކަމަށާއި އެ ވެހިކަލްތައް އާރުޑީސީއަށް ނުގެންދެވޭނެ ސަބަބެއް ނެތްކަމަށް އައްޑޫ ސިޓީ ކައުންސިލުން ވިދާޅުވެއްޖެއެވެ.
"ދެން"އަށް މައުލޫމާތު ދެއްވަމުން އައްޑޫ ސިޓީ ހިތަދޫ ކޮރޮވަލު ކައުންސިލް މެމްބަރު އިބްރާހިމް ޝިނާޒް ވިދާޅުވީ މިއަދު އާރްޑީސީން ގެންދަން މަސައްކަތްކުރި ވެހިކަލްތަކަކީ އިއްޔެ ކައުންސިލާއި އާރްޑީސީން ބައްދަލު ކުރުމަށް ފަހު އާރްޑީސީއަށް ދޫކޮށްލައިފައިވާ ވެހިކަލްތަކެއް ކަމަށެވެ.
"އެ ވެހިކަލްތަައް އާރްޑީސީއަށް ނުގެންދެވޭނެ ސަބަބެއް އޮތް ކަމަކަށް އަޅުގަނޑު ގަބޫލެއް ނުކުރަން. އިއްޔެ ކައުންސިލާއި އާރްޑީސީއާ ނެގޯޝިއޭޓް ކޮށްގެން އައްޑުއަށް ބޭނުންވާ ވެހިކަލް ނެގުމަށް ފަހު ދެންހުރި ވެހިކަލްތައް މި ދޫކޮށްލީ އާރޑީސީއަށް. މި ގެންދަން އުޅުނީ އެ ވެހިކަލްތައް" ޝިނާޒް ވިދާޅުވިއެވެ.
ޝިނާޒް ވިދާޅުވީ އިއްޔެ ބޭއްވި ބައްދަލުވުމުގައި ވެސް ބައެއް ކައުންސިލަރުން އާރްޑީސީއަށް ވެހިކަލްތަައް ދިނުމާމެދު ހިތްހަމަނުޖެހުން ފާޅުކޮށްފައިވާކަމަށެވެ. އެހެން ނަމަވެސް އާރްޑީސީއަކީ މުޅި ރާއްޖެއަށް ހިދުމަތްދޭ ކުންފުންޏަކަށް ވުމާއެކު މިވަގުތަށް އައްޑޫއަށް ބޭނުންނުވާ ވެހިކަލްތައް އާރްޑީސީއަށް ދޫކޮށްލީ ކަމަށް ވެސް އޭނާ ވިދާޅުވިއެވެ.
ޝިނާޒް އިތުރަށް ވިދާޅުވީ ބަޔަކު ސިޔާސީ ބޭނުމެއްގައި ނިކުމެ އާރްޑީސީގެ ވެހިކަލްތައް ބޭލުވި ނަމަވެސް ހަގީގަތުގައި އެވެހިކަލްތައް އާރްޑީސީއަށް ގެންދެވޭނެ ކަމަށެވެ. އޭނާ ވިދާޅުވީ އައްޑުއަށް ގެންނަ ވެހިކަލްތައް ކުރިން ވެސް ރައްޔިތުންގެ ނުރުހުމުގައި ވެސް އެހެން ރަށްރަށަށް ގެންގޮސްފައިވާ ކަމަށާއި އެ ކަންކަން ކުރަނީ ހިދުމަތްދޭ ކުންފުނީގެ މެންޑޭޓުގެ ދަށުން ކަމަށެވެ. އެހެން ނަމަވެސް މިއަދު އާރްޑީސީން ވެހިކަލް ގެންދަން އުޅުނީ އައްޑޫއަށް ބޭނުންވާ ވެހިކަލްތައް އައްޑޫގައި ބެހެއްޓުމަށްފަހުގައެވެ.
