ޝިޔާމްގެ ރައްދު ދޮންބިލެތަށް: ރައީސް ނަޝީދަކީ އަޅުގަނޑުމެންގެ ސަބްޖެކްޓެއް ނޫން!
ވެރިކަން ކުރާ އެމްޑީޕީގެ އެކްޓިވިސްޓުން ލައްވާ އެޕާޓީގެ ލީޑަރުން ކުރުވާ ކަންކަން އިދިކޮޅު ޕީޕީއެމްއަކުން ނުކުރާނެ ކަމަށް، ޕީޕީއެމްގެ ނައިބު ރައީސް އަދި ރައްޔިތުންގެ މަޖިލީހުގެ ނައިފަރު ދާއިރާގެ މެމްބަރު އަހުމަދު ޝިޔާމް ވިދާޅުވެއްޖެއެވެ.
ޝިޔާމް މިހެން ވިދާޅުވީ، ރައްޔިތުންގެ މަޖިލީހުގެ ރައީސް މުޙައްމަދު ނަޝީދު ގެ ގޭދޮށަށް ގޮސް "ގަޔަށް ބޮލަށް އަރާކަށް ނުޖެހޭ" ކަމަށް ވިދާޅުވެ ބިލެތްދޫ ދާއިރާގެ މެމްބަރު އަހްމަދު ހަލީމް (ދޮންބިލެތް) ކުރެއްވި ޓްވީޓަކަށް ރައްދު ދެއްވަމުންނެވެ.
ދޮންބިލެތް ވިދާޅުވެފައި ވަނީ ޕީޕީއެމްއިން މުޒާހަރާ ވެސް ކުރަން ވާނެ ކަމަށާއި އެކަމަކު ރައީސް ނަޝީދުގެ ގޭ ދޮށަށް ގޮސް އެމަނިކުފާނަށް ހަމަލާ ދޭން އުޅުމަކީ މުޒާހަރާ ކުރުމެއް ނޫން ކަމަށެވެ. އަދި އެއީ ކުރީގެ ރައީސް ޢަބްދުﷲ ޔާމީން ޢަބްދުލްޤައްޔޫމަށް ލުޔެއް ލިބޭނެ ކަމެއް ނޫން ކަމުގައި ވެސް ދޮންބިލެތް ވިދާޅުވިއެވެ.
އެވާހަކަތަކަށް ރައްދު ދެއްވާ ޝިޔާމް ވިދާޅުވީ ޕީޕީއެމް އަކީ ކުރާ ކަމެއް "ނިކަން ރިވެތިކޮށް" ކުރާ ބައެއް ކަމަށެވެ.
"އެމްޑީޕީ އެކްޓިވިސްޓުން ލައްވާ އެމްޑީޕީ ލީޑަރުން ކުރުވާ ކަންކަމެއް ޕީޕީއެމްއަކުން ނުކުރާނެ. ވާދަވެރިންގެ އިހުތިޖާޖުތައް މާކަމުދާތީ ތިޔަ އުޅުއްވަނީ ޚަރާބު ކުރައްވަން. ރައީސް ނަޝީދަކީ އަޅުގަނޑުމެންގެ ސަބްޖެކްޓެއް ނޫން" ޝިޔާމް ވިދާޅުވިއެވެ.
