އުއްތަމަ ފަނޑިޔާރުގެ ގެކޮޅަށް ވަން މައްސަލައިގައި މަޖިލީހުގައި ހޫނު ބަހުސްތަކެއް
އުއްތަމަ ފަނޑިޔާރު، އަޙްމަދު މުއުތަސިމް އަދުނާންގެ ގެކޮޅަށް މީހަކު ވަން މައްސަލައިގައި ހުރި ކަންބޮޑުވުންތަކާ އެކު އެކަން ބެލުމަށް ހުށަހެޅުމުން، ރައްޔިތުންގެ މަޖިލީހުގައި ހޫނު ބަހުސްތަކެއް ކުރިއަށް ގޮސްފިއެވެ.
ރާއްޖޭގެ އުއްތަމަ ފަނޑިޔާރުގެ ގެކޮޅުގެ ސެކިއުރިޓީ ބްރީޗްވި މައްސަލައާ ގުޅިގެން، އެކަން ބެލުމަށް މަޖިލީހުގެ ތަޅުމަށް އެ މައްސަލަ ހުށަހެޅުއްވީ ފޮނަދޫ ދާއިރާގެ މެންބަރު މޫސާ ސިރާޖެވެ.
މެންބަރު ސިރާޖު ވިދާޅުވީ މިއަހަރުގެ މެއި މަހުގެ 6ގައި ހިނގި ނިރުބަވެރި ހަމަލައިގެ އެ ހާދިސާ ވެސް ހިނގަން އެންމެ ބޮޑަށް ދިމާވި އެއްކަމަކީ، މިފަދަ ކަންކަން ވަރަށް ލުއިކޮށް ނެގުމުގެ ސަބަބުން ކަމަށެވެ. އެކަން ނުނިމި އުޅެނިކޮށް ދައުލަތުގެ އަނެއް ބާރުގެ ވެރިޔާ ހުންނަވާ ގެކޮޅުގެ ސެކިއުރިޓީ ބްރީޗްވެފައިވާތީ މިކަން ވަރަށް ސީރިއަސްކޮށް ބަލަންޖެހޭ ކަމަށް މެންބަރު ސިރާޖު ވިދާޅުވިއެވެ.
މިއަދުގެ މަޖިލިހަށް ހުށަހެޅުނު މި މައްސަލަ އާއި ގުޅިގެން ވާހަކަފުޅު ދައްކަވަމުން، ގަލޮޅު ދެކުނު ދާއިރާގެ މެމްބަރ މީކާއިލް ނަސީމް ވިދާޅުވީ، ދައުލަތުގެ އެއް ބާރުގެ ވެރިއެއްގެ ސެކިއުރިޓީ މިފަދައިން ބްރީޗް ވުމަކީ މުޅި ދައުލަތް މިކަމަށް ސަމާލުވެ، މުޅި ދައުލަތުން މިކަމަށް އަވަސް ފިޔަވަޅުތަކެއް އަޅަންޖެހޭ ކަމެއް ކަމަށެވެ.
"މީގެ އެންމެ ފަސް މަސް ދުވަސް ކުރިން، ދަޢުލަތުގެ އެއްބާރުގެ އެންމެ އިސްވެރިޔާ، ރައްޔިތުންގެ މަޖިލީހުގެ ރައީސް، ރައީސް މުޙައްމަދު ނަޝީދުގެ ފުރާނަފުޅު ނެތިކޮށްލެވޭނެ ފަދަ ބޮޑު ހަމަލާއެއް ދެވިފައިވަނިކޮށް، ދައުލަތުގެ އަނެއް ބާރުގެ ވެރިއެއްގެ ސެކިއުރިޓީ މިފަދައިން ބްރީޗް ވުމަކީ، މުޅި ދަޢުލަތް މިކަމަށް ސަމާލުވެ، މުޅި ދައުލަތުން މިކަމަށް އަވަސް ފިޔަވަޅުތަކެއް އަޅަންޖެހޭނެ ކަމެއް ކަމަށް އަޅުގަނޑު ދެކެން." ގަލޮޅު ދެކުނު ދާއިރާގެ މެންބަރު ވިދާޅުވިއެވެ.
އުއްތަމަ ފަނޑިޔާރު އަހުމަދު މުއުތަސިމް އަދުނާނު ދިރިއުޅުއްވާ ގެކޮޅުގެ ސެކިޔުރިޓީ ބްރީޗްވި މައްސަލައިގައި ސަރުކާރު ހިންގާ އެމްޑީޕީއާއި އިދިކޮޅު ޕްރޮގްރެސިވް ކޮންގްރެސް ކޯލިޝަނުން ވެސް ވަނީ ކަންބޮޑުވުން ފާޅުކުރައްވައިފައެވެ.
Ads by STO
