އެމްބަސީތައް ހަދަނީ އާއިލީ މީހުންނަށް ވަޒީފާ ދޭން: އަލީ ހުސައިން
އެމްބަސީތަކާއި ހައިކޮމިޝަންތަކުން ހާސިލް ވާކަމެއް ނެތްކަމަށް ސިފަކުރައްވައި އެ ތަންތަނުގެ ބޭނުމަކީ ވަކި އާއިލާއަކަށް ނިސްބަތްވާ މީހުންނަށް ވަޒީފާ ދިނުންކަމަށް ކެންދޫ ދާއިރާގެ މެމްބަރު އަލީ ހުސައިން ވިދާޅުވެއްޖެއެވެ.
ރައްޔިތުންގެ މަޖިލީހުގެ މިއަދުގެ ޖަލްސާގައި ވާހަކަފުޅު ދައްކަވަމުން މެމްބަރު އަލީ ހުސައިން ވަނީ އެމްބަސީތަކާއި ހައިކޮމިޝަންތަކުގެ ސަބަބުން ރާއްޖޭގެ އިގްތިސާދަށް ލިބޭނީ ކޮން ފައިދާއެއް އެއްތޯއާއި ރާއްޖެއަށް އަންނަނީ ކޮން އިންވެސްޓްމަންޓްއެއްތޯ ސުވާލު ކުރައްވައިފައެވެ.
"ނެތް މިންވަރަަށް ވެސް މިތިބެނީ ދުނިޔޭގެ އެކި ގައުމުތަކުގައި އެމްބަސީތަކާއި ހައިކޮމިޝަންތައް ހަދައިގެން. އެހެން ނަމަވެސް ކުރެވެނީ ކޮންކަމެއްތޯ. ރާއްޖޭގެ އިގްތިސޯދަށް ލިބެނީ ކޮން މަންފާއެއްތޯ. ރާއްޖެއަށް އަންނަނީ ކޮން އިންވެސްޓްމަންޓްތަކެއްތޯ. މިއީ އަޅުގަނޑުމެން ފުންކޮށް ވިސްނާލަން ޖެހޭ ކަމެއް. ހަމަ އެކަނި ވަކި އާއިލާތަކަކަށް ނިސްބަތްވާ ބަޔަކަށް ވަޒީފާ ދިނުމުގެ ނިޔަތުގައި ދުނިޔޭގެ އެކި ގައުމުތަކުގައި އެމްބަސީތައް ހަދައިގެން ތިބުމަކީ އެއީ ދެރަވަރު ކަމެއް." މެމްބަރު އަލީ ހުސައިން ވިދާޅުވިއެވެ.
އިތުރަށް ވާހަކަ ދައްކަވަމުން މެމްބަރު އަލީ ހުސައިން ވިދާޅުވި އާއިލީ ވެރިކަން 2008ވަނަ އަހަރު ނިމުނުކަމަށް ބެލެވުނަސް ފޮރިން ސާވިސްއަށް ބަލައިލުމުން ފެންނަނީ އެހެން މަންޒަރެއް ކަމަށެވެ.
ރާއްޖޭގެ ފޮރިން ސާވިސްގެ ބިލާ ގުޅޭ ގޮތުން މަޖިލީހުގައި މިއަދު ކުރިއަށް ދިޔަ ބަހުސްގައި ރާއްޖޭގެ ފޮރިން ސާވިސްގެ އިސް މަގާމުތަކުގައި ތިއްބެވި ބޭފުޅުންނާއި ބެހޭ ގޮތުން ވާހަކަ ދައްކަވަމުން މެމްބަރުން އަލީ ހުސައިން ވަނީ ޑރ. ފަރަހަނާޒް ފައިސަލްގެ މަސައްކަތްޕުޅަށް ތަޢުރީފް ކުރައްވައިފައެވެ. އެހެން ނަމަވެސް ރާއްޖޭގެ ފޮރިން މިނިސްޓަރު އަބްދުﷲ ޝާހިދު ދެ ވަޒީފާއެއް އަދާކުރައްވާތީ އޭނާ ވަނީ ހިތްހަމަނުޖެހުން ފާޅުކޮށް އަބްދުﷲ ޝާހިދު ވެސް ކޮންމެވެސް އެއް މަގާމެއް އިހްތިޔާރު ކުރުމަށް އެދިވަޑައިގެންފައެވެ.
