ސިވިލްސާވަންޓުން ސިޔާސީ ވާހަކަ ދެއްކުމަކީ ފުރަތަމަ ދަރަޖައިގެ ކުށަކަށް!

ސިވިލްސާވަންޓުން ސިޔާސީ ވާހަކަ ދެއްކުމަކީ ފުރަތަމަ ދަރަޖައިގެ ކުށަކަށް ހަދައި ބޮޑެތި ބަދަލުތަކަކާ އެކު ސިވިލް ސާވިސްގެ ގަވާއިދު އިސްލާހުކޮށްފިއެވެ.

Ads by Hajj Corporation

އިސްލާހު ކުރި ގަވާއިދުގައިވާ ގޮތުން ސިވިލް ސާވަންޓުން އޮފީހުގެ ރަސްމީ ގަޑީގައި ސިޔާސީ ވާހަކަދެއްކުން ވަނީ ފުރަތަމަ ދަރަޖައިގެ ކުށެއްގެ ގޮތުގައި ކަނޑައަޅައިފައެވެ. އަދި ރަސްމީ ގަޑީގައި ސިޔާސީ ވާހަކަ ދެއްކުމާއި، ސިޔާސީ ބަހުސްކުރުން ވަނީ ދެވަނަ ދަރަޖައިގެ ކުށެއްގެ ގޮތުގައި ކަނޑައަޅައިފައެވެ.

ވަޒީފާއިން ވަކިކުރެވޭ ފަދަ ކުށެއްގެ ގޮތުގައި، މަސައްކަތުގެ ރަސްމީ ނުވަތަ ނުރަސްމީ ގަޑީގައި ވެސް
މަސައްކަތުގައި އުޅޭ އެއްވެސް ވަގުތެއްގައި، އެއްވެސް ސިޔާސީ ހަރަކާތެއްގައި ބައިވެރިވުން ވަނީ ގޮތުގައި ކަނޑައަޅައިފައެވެ.

ސިވިލް ސާވިސްގެ މުއައްޒަފުންގެ ގަވާއިދަށް ގެނައި ބަދަލުތަކުގެ ތެރޭގައި މުވައްޒަފުންގެ ސަސްޕެންޝަން ހަރުކަށިކޮށް ސިވިލް ސާވިސްގެ ގަވައިދުގެ މުހިންމު ތިން ޗެޕްޓަރަކަށް އިސްލާހު ގެނެސްފައިވެއެވެ. މިގޮތުން އިސްލާހު ގެނައި ޗެޕްޓަރުތަކަކީ އޮފީހަށް ނުކުތުން މަނާކުރުން ބަޔާން ކޮށްފައިވާ ޗެޕްޓަރު 27އާއި އިސްލާހީ ފިޔަވަޅު އެޅުމާއި ވަޒީފާއިން ވަކިކުރުން ބަޔާންކޮށްފައިވާ ޗެޕްޓަރު 28އާއި ޝަކުވާ ހުށަހެޅުމާއި ޝަކުވާ ބެލުން ބަޔާންކޮށްފައިވާ ޗެޕްޓަރު 29އެވެ.

ގަވާއިދަށް ގެނެސްފައިވާ މުހިންމު ބަދަލުތަކުގެ ތެރޭގައި ޓެރަރިޒަމް ފަދަ ޖިނާއީ ތަހްގީގެއް މުއައްޒަފުގެ މައްޗަށް ހިންގާ ނަމަ 30 ދުވަހަށް ވަޒީފާއިން ސަސްޕެންޑް ކުރުމާއި ތަހުގީގުގެ ބާވަތުން އެ މުއްދަތު އިތުރު ކުރުމުގެ ބާރު ވެސް ސިވިލް ސާވިސް ކޮމިޝަނަށް ވަނީ ލިބިގެންނެވެ.

ޗެޕްޓަރު 27އަށް ގެނެވުނު ބަދަލުގެ ތެރޭގައި މިގަވާއިދުގައި މުއައްޒަފުން ސަސްޕެންޑް ކުރެވޭނެ މުހިންމު ހާލަތްތައް ވަނީ ބަޔާންކޮށްފައެވެ. މިހާލަތްތަކުގެ ތެރޭގައި ބަލަމުންދާ މައްސަލައާ ގުޅިގެން ހެކި ފޮރުވައިފާނެ ކަމަށް ބެލެވުން އަދި އެފަދަ ނުފޫޒެއް ފޯރުވޭނެ މަގާމެއްގައި ހުރި މީހަކަށްވުމާއި ޓެރަރިޒަމް ފަދަ ބޮޑު ޖިނާއީ ތުހުމަތެއް ކުރެވިގެން ތަހުގީގު ފެށުމުގެ އިތުރުން ހާއްސަ އެހީއަށް ބޭނުންވާ ފަރާތްތަކާއި ދައުލަތުގެ ބެލުމުގެ ދަށުގައިވާ ކުޑަކުދިންގެ ހިޔާ ފަދަ އިދާރާއެއްގެ މުވައްޒަފަކުންވުމާއި ލައިސަންސެއް އޮވެގެން ވަޒީފާ އަދާކުރަން ޖެހޭ މުވައްޒަފަކު އެފަދަ ލައިސަންސެއް ކަމާ ބެހޭ އިދާރާތަކުން ހިފެހެއްޓުން ނުވަތަ މުއްދަތު ހަމަވުން (މިސާލަކަށް ޑްރައިވިން ލައިސަންސް)ގެ އިތުރުން މަދަނީ މައްސަލައެއްގައި ކޯޓުން ކުރާ ހުކުމަކުން ގޭ ބަންދުކުރުން ނުވަތަ ޖަލަށްލުން އަދި މުވައްޒަފުން އޮފީހަށް ނުކުތުން މަނާކުރަން ޖެހޭ މަގްބޫލު ސަބަބެއް އޮތް ކަމަށް ކޮމިޝަނަށް ފެނުން ހިމެނެއެވެ.

ޗެޕްޓަރު 28އަށް ގެނައި ބަދަލުތަކުގެ ތެރޭގައި އިސްލާހުގައިވާ ވަޒީފާއިން ވަކިކުރެވޭ މުހިންމު ބައެއް ހާލަތްތައް ވަނީ ހިމަނައިފައެވެ. މިގޮތުން ވަޒީފާއިން ވަކިކުރެވޭ މުހިންމު ބައެއް ހާލަތްތަކަކީ މަސްއޫލިއްޔަތު އަދާކުރުމުގައި ވަކި ފަރާތަކަށް ޖެހިފައިވާކަން ދޭހަވާ ފަދަ ގޮތަކަށް ނުވަތަ އޭނާގެ ވާޖިބަށް ހުރަސްއެޅޭ ފަދަ ގޮތަކަށް އެއްވެސް ސިޔާސީ ހަރަކާތެއްގައި ބައިވެރިވުމާއި ހިދުމަތް ދިނުމުގައި ސިޔާސީ އެއްވެސް ތައައްސަބެއް ގެންގުޅުމާއި އޮފީހުގައި ބަދުއަހުލާގީ އަމަލު ހިންގުމާއި އޮރިޔާންކާޑު ގެންގުޅުމާއި/ދެއްކުމާއި/ބެލުމާއި/ ޖިންސީ ޝައުގުވެރިކަން ދޭހަކޮށްދޭ އެއްވެސް ހަރަކާތެއް ނުވަތަ އަމަލެއް ހިންގުން އަދި ރުހުމުގައި ވެސް ނުރުހުމުގައި ވެސް ޖިންސީ އަމަލެއް ހިންގުމާއި ޖިންސީ ގޯނާކުރުމުގެ އިތުރުން ވަޒީފާގެ މާހައުލުގައި ނުރައްކާތެރި އަމަލެއް ނުވަތަ ހަމަނުޖެހުމެއް ހިންގުން ނުވަތަ އެފަދަ އިންޒާރެއް ދިނުމާއި ދައުލަތުގެ މުދަލުން ވައްކަން ކުރުމާއި ރިޝްވަތު ދިނުމާއި ރިޝްވަތު ހިފުމާއި ވިދިވިދިގެން ހަތް ދުވަހު ވަޒީފާއަށް ހާޒިރުނުވެ ހުުރުން ނުވަތަ އަހަރު ތެރޭ 15 ދުވަހު ވަޒީފާއަށް ހާޒިރުނުވެ ހުރުމުގެ އިތުރުން ރަސްމީ ހައިސިއްޔަތުން މުވައްޒަފަށް ލިބިފައިވާ މައުލޫމާތެއް ނަހަމަ ގޮތުގައި ބޭނުން ކުރުން، ސިއްރު މައުލޫމާތު ގާނޫނާ ހިލާފަށް ހާމަ ކުރުން ހިމެނެއެވެ.

މީގެ އިތުރުން އިސްލާހުކޮށްފައިވާ ގަވާއިދުގައިވާ ގޮތުން ކޮމިޝަނުން އެ މައްސަލަ ބަލާނީ އެ ނިންމުން ނިންމިތާ ދެ މަސްދުވަސް ތެރޭ ހުށަހަޅައިގެންނެވެ. އޭގެ ފަހުން އެ މައްސަލައެއް ހުށަހަޅާ ނަމަ އެ މައްސަލަ ބެލުމުގެ ބާރު ކޮމިޝަނަށް ލިބިގެނެއް ނުވެއެވެ.