ޔުގެންޑާގައި ދިން ބޮމުގެ ދެ ހަމަލާއެއްގައި 3 މީހުން މަރުވެއްޖެ
ޔުގެންޑާގެ ވެރިރަށުގައި ޖާނުން ފިދާވެގެން ދިން ދެ ހަމަލާއެއްގައި 3 މީހަކު މަރުވެ ގިނަބަޔަކު ޒަހަމް ވެއްޖެއެވެ.
ވެރިރަށް ކަމްޕްލާގެ ފުލުހުން ވިދާޅުވި ގޮތުގައި މިހާތަނަށް 33 މީހުން ވަނީ ޒަހަމްވެގެން ހޮސްޕިޓަލްތަކަށް ގެންގޮސްފައެވެ. އަދި މީގެ ތެރެއިން 5 މީހެއްގެ ހާލު ވަރަށް ސީރިއަސްކަމަށް ވެސް އޮފިޝަލުން ވަނީ ބުނެފައެވެ. އަދި މިހަމަލާ ދީފައި ވަނީ 3 މީހަކުވެގެން ކަމަށް ވެސް އޮފިޝަލުން ވަނީ ބުނެފައެވެ.
ޔުގެންޑާގައި ދިން މިހަމަލާގެ ފުރަތަމަ ގޮއްވައިލުން ގޮއްވައިލައިފައި ވަނީ އެ ގައުމުގެ ގާނޫނު ހަދާ މަޖިލިސް ކައިރީގައެވެ، އަދި ދެވަނަ ހަމަލާދީފައި ވަނީ އެ ގައުމުގެ ސެންޓްރަލް ޕޮލިސް ސްޓޭޝަން ކައިރީގައެވެ. އަދި ފުރަތަމަ ހަމަލާދީފައި ވަނީ ޗެކް ޕޮއިންޓެއް ގާތުގައި އެކަކު ކަމަށާއި މި ހަމަލާގައި ދެމީހުން މަރުވެފައިވާކަމަށް ވެސް ރިޕޯޓްތައް ބުނެއެވެ. އަދި ދެވަނަ ހަމަލާދީފައި ވަނީ ދެމީހަކު ވެގެން ސައިކަލެއް ދުއްވާފައި ދަމުންކަމަށާއި މިހަމަލާގައި އެކަކު މަރުވެފައިވާކަމަށް ވެސް ރިޕޯޓްތައް ބުނެއެވެ.
މިހަމަލާތަކުގެ ސަބަބުން ހަމަލާ ދިން ސަރަހައްދާ ގާތުގައި އުޅޭ ގިނަ ބަޔަކަށް ވަނީ ކުއްލި ޝޮކެއް ލިބި ނަފްސާނީ ބިރުވެރިކަމެއްގެ ތެރޭގައި ކަމަށް ވެސް އޮފިޝަލުން ބުނެއެވެ. އަދި މީހުން ބިރުން މަގުތައް މައްޗަށް ނުކުތުމުގެ ސަބަބުން މަގުތައް ބަންދުވެފައިވާކަމަށް ވެސް އޮފިޝަލުން ވަނީ ބުނެފައެވެ.
މިހަމަލާގެ ޒިންމާ އަދި އެއްވެސް ފަރާތަކުން ނަގައިފައެއް ނުވެއެވެ.
