ކެޓްރީނާއާއި ވިކީގެ ކައިވެނީގެ ވާހަކަތަކަކީ ދޮގެެއްކަމަށް އާއިލާއިން ބުނެފި
ބޮލީވުޑްގެ ކައިވެނީގެ ޚަބަރުތަކަށް ބަލާއިރު އެންމެ ގިނަ ބަޔަކު މިހާރު ދައްކަމުންދާ ވާހަކައަކީ އެކްޓްރެސް ކެޓްރީނާ ކެއިފްއާއި އެކްޓަރ ވިކީ ކޯޝަލްގެ ކައިވެނީގެ ވާހަކައެވެ.
އެ ކައިވެނީގެ ތައްޔާރީތައް މިހާރު ހަލުވި ސްޕީޑުގައި ކުރިއަށްދާ ކަމަށާއި، ކައިވެނި ކުރާނެ ތަނަކާއި، ކައިވެނީގެ ހަފްލާތައް ބާއްވާނެ ދުވަސްތަކާއި، ކެޓްރީނާގެ އަތުގައި އަޅާނެ ހީނާފަތުގެ އަގާއި ލާނެ ހެދުންތަކުގެ އަގު ވެސް އިންޑިއާގެ ބައެއް ރިޕޯޓުތަކުގައި ވަނީ ހާމަ ކޮށްފައެވެ.
ނަމަވެސް މިހުރިހާ ވާހަކަތަކެއް ފެތުރެމުން ދަނިކޮށް، ވިކީގެ ދެބެންގެ ދެދަރި ދައްތައަކު ބުނެފައި ވަނީ އެ ދެ ތަރިން ކައިވެނި ކުރަން އަދި ނޫޅޭ ކަމަށާއި ފެތުރެމުން ދަނީ ދޮގު ހަބަރުތަކެއް ކަމަށެވެ.
ރިޕޯޓަރ ދައިނިކް ބާސްކަރް ބުނެފައި ވަނީ، ވިކީއާއި ކެޓްރީނާ ކައިވެނި ކުރަން ނޫޅޭކަން ވިކީގެ އެ ދައްތަ ކަށަވަރު ކޮށްދީފައިވާ ކަމަށެވެ. ވިކީއާއި ކެޓްރީނާ ކައިވެނި ކުރަން ނޫޅޭކަން ވިކީ ވެސް ބުނި ކަމަށް އޭނަގެ އާއިލާ ފަރާތުން ވަނީ ބުނެފައެވެ. ނަމަވެސް އެކަމާ ގުޅޭގޮތުން އިތުރަށް އެއްޗެއް ބުނެފައެއް ނުވެއެވެ.
ކެޓްރީނާއާއި ވިކީގެ ކައިވެނީގެ ވާހަކައަކީ ދޮގެއް ކަމަށް މިހާރު ބުނަމުން ދިޔަ ކަމުގައި ވިޔަސް ގިނަ މީހުން އެ ވާހަކަ ޤަބޫލެއް ނުކުރެއެވެ. އެގޮތުން މި ދެތަރިންގެ ފޭނުން ބުނެފައި ވަނީ މިއީ ކައިވެނީގެ ވާހަކަތައް ސިއްރުކުރަން އާއިލާއިން ރާވައިފައިވާ ރޭވުމެކެވެ.
