އަރްޖިތު ފިލްމުތަކަށް ލަވަކިޔުން ހުއްޓާލައިފި
އިންޑިއާގެ މަޝްހޫރު ލަވަކިޔުންތެރިޔާ، އަރްޖިތު ސިންގު 'ޕްލޭބެކް ސިންގިންގ' ނުވަތަ ފިލްމުތަކަށް ލަވަކިޔުން ހުއްޓާލައިފިއެވެ.
އެތައް ހިޓު ލަވަތަކެއް ކިޔާފައިވާ އަރްޖިތު ފިލްމުތަކަށް ލަވަކިޔުން ހުއްޓާލިކަން ކުއްލި ގޮތަކަށް އިއުލާނުކޮށްފައި ވަނީ އޭނާގެ އިންސްޓަގްރާމުގައި ހިއްސާކުރި ޕޯސްޓެއްގައެވެ. އެ ޕޯސްޓުގައި އޭނާ ބުނެފައި ވަނީ ވޭތުވެދިޔަ އަހަރުތަކުގައި އޭނާއަށް އެހުންތެރިން ދިން ލޯތްބަށް ވަރަށް ބޮޑަށް ޝުކުރު އަދާކުރާ ކަމަށެވެ.
"އަހަރެން ދެން ފިލްމުތަކަށް ލަވަކިޔައިދިނުމުގެ އެއްވެސް މަސައްކަތެއް ނުކުރާނެ ވާހަކަ ވަރަށް އުފަލާ އެކު އިއުލާނުކުރަން، މިހާ ހިސާބުން މިކަން ހުއްޓާލީ. މި ނިމިގެން ދިޔައީ ވަރަށް އުފާވެރި ދަތުރެއް،" އަރްޖިތު ލިޔެފައިވެއެވެ.
ހިންދީ ނޫނަސް އެހެން ބަސްބަހުން ވެސް އެތައް ލަވަޔެއް ކިޔާފައިވާ އަރްޖިތުގެ އެ ނިންމުމާ އެކު ފޭނުންނަށް ލިބުނީ ވަރަށް ބޮޑު ޝޮކެކެވެ. އެކަމާ ހިތާމަ ފާޅުކޮށް މީހަކު ކުރި ކޮމެންޓަކަށް ރިޕްލައި ކުރަމުން އޭނާ ބުނެފައި ވަނީ ފިލްމުތަކަށް ލަވަކިޔުން ހުއްޓައިލިޔަސް، އަމިއްލަ މިއުޒިކް އުފެއްދުމާ ދުރަށް ނުދާކަމަށެވެ. އެހެންކަމުން އަރްޖިތު ފިލްމުތަކަށް ލަވަކިޔުން ހުއްޓާލާފައިވަނީ އެ އިންޑަސްޓްރީގައި އޮންނަ އެކިއެކި ކޮރަޕްޝަނާއި ޕޮލިޓިކްސްތަކުގެ ސަބަބުން ކަމަށް އިންޑިއާގެ ރިޕޯޓުތައް ބުނެއެވެ. ނަމަވެސް އެ ނިންމުން ނިންމި ސީދާ ސަބަބު ސާފެއް ނުވެއެވެ.
އަރްޖިތުގެ ގިނަ ލަވަތަކަކީ އެހުންތެރިން ރޮއްވާލާ ފަދަ ލަވަތަކެކެވެ. ލޯބީގެ އެތައް ލަވައެއްގެ އިތުރުން ހިތާމަވެރި އެތައް ލަވައެއް ވެސް އޭނާގެ އަޑުން ވަނީ ކިޔައިފައެވެ.
އަރްޖިތުއަކީ އިންޑިއާގައި އުފެދުނު އެންމެ ކާމިޔާބު ލަވަކިޔުންތެރިންގެ ތެރެއިން އެކަކެވެ. އެންމެ ފުރަތަމަ ބޮލީވުޑަށް އޭނާ ކިޔައިދިން ލަވަޔަކީ 2011 ވަނަ އަހަރު ނުކުތް "މާޑާ 2" ފިލްމުގެ "ޕިރް މުހައްބަތު" ލަވައެވެ. އޭނާއަށް އެންމެ ބޮޑު މަގުބޫލުކަމެއް ލިބިގެން ދިޔައީ 2013 ވަނަ އަހަރު ނުކުތް "އާޝިގީ 2" ފިލްމުގެ "ތުމް ހި ހޯ" ލަވައިންނެވެ. އޭގެ ފަހުން ހުއްޓުމެއް ނެތި އޭނާގެ ކެރިއަރު ވަނީ ކުރިއަރައިގެން ގޮސްފައެވެ.
އެންމެ ފަހުން އޭނާ ކިޔައިފައިވަނީ އަންނަ މަހު ރިލީޒްކުރަން ހަމަޖެހިފައިވާ "އޯ ރޯމިއޯ" ފިލްމުގެ "ހަމް ތޯ ތެރެ ހީ ލިޔޭ ހޭ" ލަވައެވެ. މިއީ އަރްޖިތުގެ އަޑުން ފިލްމަކުން އިވިގެންދާނެ އެންމެ ފަހު ލަވައެވެ.
Ads by STO
