ފުއްގިރި މުއާމަލާތުގެ ސިއްރުތަކެއް ޕެންޑޯރާ ޕޭޕާސްއިން އާންމުކޮށްފި
ރ. ފުއްގިރި ކުއްޔަށް ދޫކުރުމުގައި ހިންގާފައިވާ ކޮރަޕްޝަންގެ އަމަލުތަކާ ގުޅުން ހުރި ސިއްރު މައުލޫމާތުތަކެއް ޕެންޑޯރާ ޕޭޕާސްގައި މިރޭ އާންމުކޮށްފިއެވެ.
ޕެންޑޯރާއިން މި މައުލޫމާތު އާންމު ކޮށްފައި މިވަނީ، އެ މައްސަލައިގައި ކުރީގެ ރައީސް ޢަބްދުﷲ ޔާމީން ޢަބްދުލްޤައްޔޫމްގެ މައްޗަށް މަނީ ލޯންޑަރިންއާއި ކޮރަޕްޝަންގެ ދައުވާ އުފުލައިފައި ވަނިކޮށެވެ.
ޕެންޑޯރާ ޕޭޕާސްއިން އާންމު ކުރި މައުލޫމާތުގައި ހާމަވެފައިވާ ގޮތުގައި، އެމްއެމްޕީއާރްސީ މެދުވެރިކޮށް ފުއްގިރި ކުއްޔަށް ދިނުމުގެ މުއާމާލަތުގައި އިސްކޮށް ހުރީ ރަޝިޔާގެ ރައީސް ވްލަޑިމިއާ ޕޫޓިންގެ ކުރީގެ ޑެޕިއުޓީ ޗީފް އޮފް ސްޓާފެވެ. އޭނަގެ އިތުރުން އިންޑިއާގެ ނުފޫޒު ގަދަ ޕްރޮޕަޓީ ޑިވެލޮޕަރެއް ވެސް އެ މުއާމަލާތުގައި ޝާމިލުވާ ކަމަށް މައުލޫމާތު ލިބެއެވެ.
މި މުއާމަލާތް ހިންގައިފައި ވަނީ 2015ވަނަ އަހަރުގައެވެ. އެ މުއާމަލާތަށް ފަންޑު ހޯދުމުގައި ރަޝިޔާގެ ގޭންގްސްޓަރެއްގެ އެހީ ހޯދައިފައިވާ ކަމަށް ވެސް ބުނެފައިވެއެވެ. މީގެ އިތުރުން، ފުއްގިރި ވިއްކާލައިފައި ވަނީ ޑެޕެޒާ ސާވިސް ކިޔާ ކުންފުންޏަކަށް ކަމަށާއި އެއީ ބްރިޓީސް ވާޖިންގައި ރަޖިސްޓްރީ އޮތް ކުންފުންޏެއް ކަމަށް ވެސް ބުނެފައިވެއެވެ. އެ ކުންފުނީގެ ހިއްސާ އޮތްގޮތުގެ ތަފްސީލު ވެސް ދީފައިވެއެވެ.
ޕެންޑޯރާ ޕޭޕާސްގައި އާންމުކޮށްފައިވާ މައުލޫމާތުތަކުގައި، މި މައްސަލައިގައި ރައީސް ޔާމީނާ ގުޅޭ މައުލޫމާތެއް ނެތެވެ. ނަމަވެސް ފުއްގިރި މައްސަލައިގައި ރައީސް ޔާމީންގެ މައްޗަށް ދައުވާ އުފުލާ ޝަރީއަތް ފަށައިފައިވާކަން ފާހަގަ ކޮށްފައިވެއެވެ.
ދައުލަތުން ރައީސް ޔާމީންގެ މައްޗަށް އުފުލައިފައިވާ ދެ ދައުވާއަކީ ވެސް ފުއްގިރި ކުއްޔަށް ދޫކުރުމުގައި މަގާމުގެ ނުފޫޒު ބޭނުން ކޮށްގެން ރިޝްވަތު ނެގިކަމުގެ ދައުވާއާއި އެ ފައިސާ ބޭނުން ކޮށްގެން މަނީ ލޯންޑަރކުރި ކަމުގެ ދައުވާއެވެ. ރިޝްވަތުގެ ގޮތުގައި 1،117،000 އެމެރިކާ ޑޮލަރު ރައީސް ޔާމީން ނަންގަވައިފައިވާ ކަމަށް ދައުލަތުން ތުހުމަތު ކޮށްފައިވެއެވެ.
