ކެޓްރީނާއާއި ވިކީ ހަނީމޫނަށް ރާއްޖެއަށް!
ބޮލީވުޑްގެ ތަރިންގެ ތެރެއިން އަލަށް ކައިވެނި ކުރި މަޝްހޫރު ދެ އެކްޓަރުން ކަމަށްވާ ކެޓްރީނާ ކައިފްއާއި ވިކީ ކައުޝަލް ހަނީމޫނަށް ރާއްޖެ އަތުވެއްޖެއެވެ.
މި ދެ ތަރިން ރާއްޖެ އައިސްފައި މިވަނީ އެމީހުން ހަނީމޫނަށް އަންނަނީ ރާއްޖެއަށް ނޫން ކަމަށް "ޓައިމްސް އޮފް އިންޑިއާ"ގައި ބުނެފައި ވަނިކޮށެވެ.
އޭގެ އިތުރުން "އީ ޓައިމްސް"އިން ވެސް ބުނެފައި ވަނީ ކެޓްރީނާއާއި ވިކީ ހަނީމޫނަށް ދަނީ ރާއްޖެއަށް ނޫން ކަމަށާއި އެމީހުން ދަނީ ޔޫރަޕަށް ކަމަށެވެ.
ކެޓްރީނާއާއި ވިކީ ރާއްޖެއަށް އައީ ޕްރިވެޓް ޖެޓެއްގައެވެ. މިއަދު ހެނދުނު މުމްބާއި އެއާޕޯޓުން ފުރައިގެން އެ ޖެޓު ޖައްސައިފައި ވަނީ މާފަރު އެއާޕޯޓަށެވެ.
ބޮލީވުޑްގެ ގިނަ ބަޔަކު އެންމެ އިންތިޒާރު ކުރަމުން ދިޔަ، މި ކައިވެނި ކުރީ ރާޖެސްތާނުގެ ޖައިޕޫރްގައި އިއްޔެއެވެ. އެ އިންޑްސްޓްރީގެ އެންމެ ބޮޑު ކައިވެނީގެ ގޮތުގައި ސިފަކޮށްފައިވާ މި ކައިވެންޏަށް ދައުވަތު ދިނީ މަދު ބަޔަކަށެވެ. ނަމަވެސް ހަނީމޫނަށް ފަހު އެނބުރި ޤައުމަށް ގޮސް މި ދެ ތަރިން ބޮލީވުޑްގެ އެހެން ފަންނާނުންނަށް ހާއްސަކޮށް ރިސެޕްޝަނެއް ދޭން ނިންމައިފައިވާ ކަމަށް ރިޕޯޓުތަކުން ބުނެއެވެ.
