ހިތަދޫ ގޭދޮށު މަސް ފެކްޓްރީގެ މަސައްކަތްތައް އެހެން ކުންފުންޏަކާ ހަވާލުކޮށްފި
އައްޑޫސިޓީ ހިތަދޫގައި އެޅުމަށް ހަމަޖެހިފައިވާ ގޭދޮށު މަސް ފެކްޓްރީގެ މަސައްކަތްތައް އައު ކުންފުންޏަކާ ހަވާލުކޮށްފިއެވެ.
ހިތަދޫ ގޭދޮށު މަސް ފެކްޓްރީ ހަދަން އެންމެ ފުރަތަމަ ހަވާލުކޮށްފައި ވަނީ އިންޑިއާގެ އެލްނާތު މޯލްޑިވްސް ކުންފުންޏާއެވެ. މިދިޔަ މޭމަހު ހެދި އެ އެއްބަސްވުމުގައިވާ ގޮތުން، 280 ދުވަހުގެ ތެރޭގައި މަސް ފެކްޓްރީ އަޅައި ނިންމަން ޖެހެއެވެ.
ނަމަވެސް، އެކުންފުނިން އެ މަޝްރޫއު ކުރިއަށް ނުގެންދާ ކަމަށް ބުނެ، އައްޑޫ ކައުންސިލުން ވަނީ އެލްނާތާ އެކު ހަދާފައިވާ އެއްބަސްވުން އުވައިލައިފައެވެ. އަދި މިހާރު އެކައުންސިލުން އެ މަސައްކަތް ސީ ބޮޓްސް ޕްރައިވެޓް ލިމިޓެޑް ނަމަކަށް ކިޔާ ކުންފުންޏަކާ ހަވާލުކޮށްފައެވެ. އެ އެއްބަސްވުމުގައިވާ ގޮތުން އެ ފެކްޓްރީގެ މަސައްކަތްތައް ހަ މަސްދުވަހުގެ ތެރޭގައި ނިންމަން ޖެހޭނެއެވެ.
އެ މަޝްރޫއަށް ހަރަދުކުރަން ނިންމައިފައި ވަނީ 14 މިލިއަން ރުފިޔާއެވެ. އޭގެ ތެރެއިން އިންޑިއާ ސަރުކާރުގެ ހައި އިމްޕެކްޓް ކޮމިއުނިޓީ ޑިވެލޮމްޕަންޓް ޕްރޮޖެކްޓްސް (އެޗްއައިސީޑީޕީ)ގެ ދަށުން 5.8 މިލިއަން ރުފިޔާ ހަރަދުކުރަން ނިންމައިފައިވާ އިރު، ބާކީ ބައި ހަރަދުކުރާނީ ސީ ބޮޓްސްއިންނެވެ.
ހިތަދޫގެ އިތުރުން، އައްޑޫގެ މަރަދުއާއި ފޭދޫގައި ވެސް ގޭދޮށު މަސް ފެކްޓްރީ ހަދަން ވަނީ ނިންމައިފައެވެ. އެ ރަށްރަށުގައި ގޭދޮށު މަސް ފެކްޓްރީތައް ހެދުމަށް އިންޑިއާއާ އެކު އެއްބަސްވީ މިދިޔަ ފެބްރުއަރީގައެވެ.
