ފެނަކައިގެ ވެރިޔަކު ވޯޓަށް ނުފޫޒު ފޯރުވި އޯޑިއޯ ނަޝީދު ދިފާއު ކުރައްވައިފި

ފެނަކަ ކޯޕަރޭޝަންގެ އޮޕަރޭޝަންސް ހެޑް، ޒާހިރު އުސްމާން އެ ކުންފުނީގެ މުވައްޒަފަކަށް ފޯނުން ގުޅުއްވައި ކޮމަންޑޫ ދާއިރާގެ ބައި އިލެކްޝަންގައި ސަރުކާރު ކެނޑިޑޭޓަށް ވޯޓު ދިނުމަށް އަންގާ އޯޑިއޯ ރައްޔިތުންގެ މަޖިލީހުގެ ރައީސް މުހައްމަދު ނަޝީދު ދިފާއު ކުރައްވައިފިއެވެ.

Ads by STELCO

ރައްޔިތުންގެ މަޖިލީހުގެ ބުދަ ދުވަހުގެ ޖަލްސާގައި ނައިފަރު ދާއިރާގެ މެމްބަރު އަހުމަދު ޝިޔާމް ވަނީ ކޮމަންޑޫ އިންތިހާބާއި ކައިރިވެފައި ވަނިކޮށް ސޯޝަލް މީޑިއާގައި ލީކުކޮށްލި އެ އޯޑިއޯ އިއްވައިފައެވެ. އެ އޯޑިއޯގައި ފެނަކައިގެ ވެރިޔާ އަންގަނީ ވޯޓުލުމުގައި ނުފޫޒެއް ނެތް ކަމަށާއި ވަޒީފާއިން ވަކި ވެސް ނުކުރާނެ ކަމަށެވެ. އަދި އެމްޑީޕީގެ ކެނޑިޑޭޓު މުހައްމަދު ރާޝިދަށް ވޯޓު ދެއްވަންވީ ޒާހިރަށް ކޮށްދޭ ކަމެއްގެ ގޮތުގައިކަމަށް ވެސް އޭނާ ވިދާޅުވެއެވެ.

އޭގެ ފަހުން "ވެރިޔާއަށް ކޮންމެ ކަމެއް ވެސް ކޮށްދޭނެ" ކަމަށާއި އެހެން ނަމަވެސް ރާޝިދަށް ވޯޓު ނުދޭނެކަމަށް އެ މުވައްޒަފު ބުނެއެވެ. އޭގެ ފަހުން ޒާހިރު ވިދާޅުވަނީ އޭނާ ވަކި ގޮތަކަށް ވޯޓު ދިނުމަށް އެންގިކަން "ބޭރުތެރޭގައި ދައްކައިފިއްޔާ ކަނޑައި ވައްޓައިލާނެ" ކަމަށެވެ.

މިއޯޑިއޯ ވަކި ހިސާބަކަށް މަޖިލީހުގައި އިއްވުމާ އެކު މަޖިލީހުގެ ރިޔާސަތުން ވަނީ މެމްބަރު ޝިޔާމްގެ މައިކު ކަނޑައިލައްވައިފައެވެ. އަދި ރައީސް ނަޝީދު ވިދާޅުވީ ވަޒީފާއިން ވަކިނުކުރާނެ ކަމާއި ނުފޫޒު ނުފޯރުވާ ކަމަށް އޯޑިއޯގެ ކުރީކޮޅު ޒާހިރު ސާފުކޮށް ވިދާޅުވާ ކަމަށެވެ.

"ފުރަތަމަ ވާހަކަ ދައްކަވަން ފައްޓަވަމުން ވެސް އޭނާގެ [ޒާހިރު] އަމިއްލަ ހައިސިއްޔަތުން ކުރާ ކަމެއް ކަން، އޭނާއަކީ ކޮމަންޑޫ ވޯޓު ހައްގުވާ މީހެއް، އޭނާއަކީ ކެމްޕެއިން ކުރުމުގެ ހައްގު ވެސް އޮތް މީހެއް. އޭނާ އެންމެ ފުރަތަމަ ވެސް ފާހަގަ ކުރެއްވީ ނުފޫޒު ނުފޯރުވާނެ ކަމަށް،" ނަޝީދު ވިދާޅުވި އެވެ.

ނަޝީދު މިފަދައިން ވިދާޅުވި ނަމަވެސް އޯޑިއޯގެ ފަހު ބައިގައި އެ މުވައްޒަފު ވަޒީފާއިން ކަނޑައިލާނެކަމުގެ އިންޒާރު ޒާހިރު ދެއްވައެވެ. އޯޑިއޯގެ އެބައި މަޖިލީހުގައި އިއްވަން ޝިޔާމް މަސައްކަތް ކުރެއްވިއެވެ. އެހެން ނަމަވެސް އެ ފުރުސަތު ނަޝީދު ނުދެއްވިއެވެ.

ޝިޔާމް ވިދާޅުވީ އޯޑިއޯގެ އެ ބައި އަޑުއައްސަވަން ރައީސް ނަޝީދަށް ކެރިވަޑައިނުގަން ނަމަވެސް އޯޑިއޯގެ މައްސަލަ ކޮމިޓީތަކަށް ހުށަހަޅުއްވާނެ ކަމަށެވެ.

"އޯޑިއޯއިން ވަރަށް ބޮޑަށް ސާފުވީ ފެނަކައިގެ އޮފިޝަލް ވިދާޅުވާ އަޑު ނުފޫޒު ނުފޯރުވާނެ ކަމަށް، ވަޒީފާއިން ވަކި ނުކުރާނެ ކަމަށް. އޭގެ ފަހުން އެ ބޭފުޅާ ދައްކަވާ ހުރިހާ ވާހަކައަކީ އަމިއްލަ ހައިސިއްޔަތުން ދައްކަވާ ވާހަކަ،" ނަޝީދު ވިދާޅުވިއެވެ.

ފެނަކައިގެ ވެރިޔަކު ވޯޓަށް ނުފޫޒު ފޯރުވި މައްސަލަ ރައީސް ނަޝީދު ދިފާއު ކުރެއްވި ނަމަވެސް އެމްޑީޕީގެ ސިޔާސީ އެކްޓިވިސްޓުން ގެންދަނީ ޒާހިރު މަގާމުން ވަކިކުރުމަށް ސޯޝަލް މީޑިއާގައި ކެމްޕެއިން ކުރަމުންނެވެ. އަދި ފާޅުކަން ބޮޑު ގޮތެއްގައި ސަރުކާރު ކުންފުންޏަކުން ވަކިވަކި މުވައްޒަފުންނަށް، ވަކި ގޮތަކަށް ނުފޫޒު ފޯރުވުމަކީ އެމްޑީޕީގެ ސިޔާސަތެއް ނޫންކަމަށް ވެސް އެ ފަރާތްތަކުން ދަނީ ބުނަމުންނެވެ.

މި އޯޑިއޯއާ ގުޅިގެން ފެނަކަ ކޯޕަރޭޝަންގެ މެނޭޖިންގ ޑިރެކްޓަރާ ސުވާލު ކުރުމުން ވިދާޅުވީ އެ އޯޑިއޯއަކީ ސައްހަ އޯޑިއޯއެއް ނަމަވެސް، ޒާހިރު މަގާމުން ވަކި ނުކުރައްވާނެ ކަމަށެވެ.

މިމައްސަލަ އިދިކޮޅު ޕީޕީއެމްއިން އިލެކްޝަންސް ކޮމިޝަނަށް ވެސް ހުށަހެޅިއެވެ. އެހެން ނަމަވެސް އެކަމުގައި އީސީން ވެސް ފިޔަވަޅެއް އަޅައިފައެއް ނުވެއެވެ. އަދި އެއީ ވޯޓުގެ ނަތީޖާއަށް ބަދަލު ނާންނާނެ މައްސަލައެއްގެ ގޮތުގައި އީސީން ވަނީ ސިފަކޮށްފައެވެ.