ކޮމަންޑޫ ކައިރީގައި އޮތް ތިން ރަށެއް ކުއްޔަށް ދޫކުރުން ކޯޓުން ހުއްޓުވައިފި
ށ. ކޮމަންޑޫ ކައިރީގައި އޮތް ތިން ރަށެއްގައި ރިސޯޓެއް ހަދަން ކުއްޔަށް ދޭން ސަރުކާރުން އިއުލާން ކޮށްފައި ވަނިކޮށް އެކަން ސިވިލް ކޯޓުން ހުއްޓުވައިފިއެވެ.
ރިސޯޓު ހެދުމަށް ސަރުކާރުން ދޫކުރި ރަށްތަކެއްގެ ތެރެއަށް ކޮމަންޑޫ ކައިރީގައި އޮތް ރަށްތަކެއް ސަރުކާރުން އިތުރުކުރީ ކޮމަންޑޫ ދާއިރާގެ ނިމިދިޔަ ބައިއިލެކްޝަންގެ ދުވަސްވަރުއެވެ. އެ ރަށްތަކަކީ ށ. މެދުރަށާއި ށ. މައިރަށުގެ އިތުރުން ށ. ދިގުރަށެވެ.
ނަމަވެސް އެ ތިން ރަށް ކުއްޔަށް ދޫކުރުން މަޑުޖައްސައިލާން ސިވިލް ކޯޓުން އިއްޔެ އަމުރު ކުރީ ޕްރިމިއާ އިކުއިޓީ ކުންފުނީގެ ފަރާތުން ހުށަހަޅައިފައިވާ މައްސަލައަކާ ގުޅިގެން ވަގުތީ އަމުރަކަށް އެދުމުންނެވެ. އެ ކުންފުނިން ދައުވާ ކުރަނީ އެ ތިން ރަށަކީ، ސަރުކާރުން ކުރިން އެ ކުންފުންޏާ އެކު ހެދި ސެޓްލްމަންޓް އެގްރިމެންޓެއްގެ ދަށުން، އެ ކުންފުންޏަށް ދޭން އެއްބަސްވެފައިވާ ތިން ރަށް ކަމަށް ބުނެއެވެ. އެހެންކަމުން އެ މައްސަލަ ނިމެންދެން އެ ތިން ރަށް އެހެން ބަޔަކަށް ނުދިނުމުގެ އަމުރަކަށް އެ ކުންފުނިން ވަނީ އެދިފައެވެ.
މި މައްސަލައާ ގުޅިގެން ސިވިލް ކޯޓުގެ އިސްގާޒީ އަބްދުﷲ އަލީ ނެރުއްވި އެ އަމުރުގައި ވަނީ ފެންނަން ހުރި ކަންތައްތަކަށް ބަލާއިރު، އެ ރަށްތައް އެހެން ފަރާތްތަކަށް ކުއްޔަށް ދިނުމުން ޕްރިމިއާ އިކުއިޓީ ކުންފުންޏަށް ލިބެނޭ ކަމަށް ބެލެވޭ ގެއްލުން މާ ބޮޑު ކަމަށެވެ. އަދި އެ ކުންފުންޏަށް އެ ތިން ރަށް ދޭން ސަރުކާރުން އެ ކުންފުންޏާ އެކު މަޝްވަރާ ކޮށްފައިވާއިރު، އެ މައްސަލައިގައި ގޮތެއް ނިމެންދެން އެހެން ފަރާތަކަށް އެ ތިން ރަށް ނުދެވޭނެ ފަދަ ފިޔަވަޅެއް ކޯޓުން އަޅަންޖެހޭ ކަމަށް ވެސް އެ ނިންމުމުގައިވެއެވެ.
Ads by STO
