އިހްލާސްތެރިކަމެއް ހުރި ނަމަ ޖޭއެސްސީ އަވަހަށް އިސްލާހު ކުރޭ: އަލީ ހުސައިން
އިހްލާސްތެރި ކަމެއް ހުރި ނަމަ ޖުޑީޝަލް ސަރވިސް ކޮމިޝަން(ޖޭއެސްސީ) އެކުލެވިފައިވާ ގޮތް އަވަހަށް ބަދަލު ކުރުމަށް ރައްޔިތުންގެ މަޖިލީހުގެ ކެންދޫ ދާއިރާގެ މެމްބަރު އަލީ ހުސައިން ގޮވައިލައްވައިފިއެވެ.
ރައްޔިތުންގެ މަޖިލީހުގެ މިއަދުގެ ޖަލްސާގައި، ޖޭއެސްސީ އިސްލާހު ކުރުމަށް ގާނޫނު އަސާސީއަށް ބަދަލު ގެނައުމަށް ރައްޔިތުންގެ މަޖިލީހުގެ މަހިބަދޫ ދާއިރާގެ މެމްބަރު އަހްމަދު ތޯރިގު ހުށަހެޅުއްވި ބިލަށް ބަހުސް ކުރައްވަމުން އަލީ ހުސައިން ވިދާޅުވީ އެމްޑީޕީން ހަތް އަހަރު ވަންދެން ދެއްކީ، ޖޭއެސްސީގެ "ކޮމްޕޮޒިޝަން" ނުވަތަ އެކޮމިޝަން އެކުލެވިފައިވާ ގޮތް ރަނގަޅު ނޫން ވާހަކަ ކަމަށެވެ.
"2012ވަނަ އަހަރުގެ ފަހުން އެ ވާހަކަ ދައްކަން ފެށީ، 2018ވަނަ އަހަރުގެ ރިޔާސީ އިންތިހާބު ނިމެންދެން ދެއްކީ ޖޭއެސްސީގެ ކޮމްޕޮޒިޝަން ރަނގަޅެއް ނޫނޭ. އެހެންވީމަ، އިހްލާސްތެރި ކަމަކީ، ވެރިކަމުގެ ދައުރު ދެބައިވެ، ތިން އަހަރުވެ، ހަތަރު އަހަރުވެ، ވެރިކަން ނިމެންދާއިރު ވެސް، އެ ގޯސް މަތީގައި ދެމި ތިބުންތޯ؟ ހަމަ ގައިމު ވެސް، އަޅުގަނޑު ގަބޫލު ކުރަނީ، އެއެއް ނޫން އިހްލާސްތެރި ކަމަކީ." އޭނާ ވިދާޅުވިއެވެ.
އޭނާ އިތުރަށް ވިދާޅުވީ ރާއްޖޭގެ އެންމެ ބޮޑު ސިޔާސީ ޕާޓީގެ ރައީސް، މުހައްމަދު ނަޝީދު ޖޭއެސްސީގައި އިންނެވުމަކީ އެންމެ ރަނގަޅު ގޮތް ނޫން ކަމަށެވެ. އޭނާ ވިދާޅުވި ގޮތުގައި، މަޖިލީހުގެ ރައީސް އެ ކޮމިޝަނުގައި އިންނެވުން ނޫން ކަމަށާއި، އެންމެ ބޮޑު "ސިޔާސީ" ޕާޓީގެ ރައީސް އެ ތަނުގައި އިންނެވުން ކަމަށެވެ.
އޭނާ ވިދާޅުވީ ދަށު ކޯޓުތަކުގެ ފަނޑިޔާރުންނަށް އުއްތަމަ ފަނޑިޔާރުގެ ސުލޫކީ މައްސަލައެއް ވެސް ބެލިގެން ނުވާނެ ކަމަށެވެ. އަދި އެއީ ކޮން ހަމައަކުން ކުރެވޭނެ ކަމެއްތޯ ވެސް އޭނާ ސުވާލު އުފެއްދެވިއެވެ.
ޖޭއެސްސީ އިސްލާހު ކުރުމަކީ ރައީސް އިބްރާހީމް މުހައްމަދު ޞާލިހުގެ ރިޔާސީ ވައުދެކެވެ.
އެ މަނިކުފާނު ވައުދުވެވަޑައިގަތީ، ވެރިކަމުގެ އެންމެ ފުރަތަމަ 100 ދުވަހުގެ ތެރޭގައި މި ވައުދު ފުއްދެވުމަށެވެ.
