ކޮވިޑާ ގުޅިގެން އެޅި ފިޔަވަޅުތައް ސައުދީން އުވައިލައިފި
ކޮވިޑް-19އިން ރައްކާތެރިވުމަށް ޓަކައި ސައުދީ އަރަބިއާއިން އަޅައިފައިވާ މުހިންމު ފިޔަވަޅުތައް ދޫކޮށްލައިފިއެވެ.
އެގައުމުގެ އިންޓީރިއަރ މިނިސްޓްރީއާ ހަވާލާދީ ރިޕޯޓްތައް ބުނާ ގޮތުގައި، މިއަދުން ފެށިގެން އެގައުމުގެ އާންމު ރައްޔިތުން ތަންތަނަށް އެއްވެ އުޅޭއިރު ގައިދުރުކަން ދޫކުރުމާ އެކު މާސްކު އަޅާކަށް ވެސް ނުޖެހޭނެއެވެެ. އަދި މައްކާއާ މަދީނާގައި ހުންނަ ދެ ޙަރަމްފުޅުގައި ގައިދުރުކަމެއް ނެތި ނަމާދު ކުރެވޭނެއެވެ. ނަމަވެސް އެ ދެ ތަނުގައި މާސްކު އަޅަން ޖެހޭ ގޮތަށް އޮތް އޮތުން ނިމުމަކަށް ގެނެސްފައެއް ނުވެއެވެ.
މިއާ އެކު ސައުދީގެ ރައްޔިތުންނަށް ގިނަ ކަންކަމުގައި ލުއި ލިބިގެންދާ އިރު، ފިޔަވަޅުތައް ދޫކޮށްލަން އެގައުމުން ނިންމީ، ވެކްސިން ޕްރޮގްރާމް ކާމިޔާބުވުމުން ކަމަށް ރިޕޯޓްތައް ބުނެއެވެ.
ސައުދީގެ އިންޓީރިއަރ މިނިސްޓްރީން ބުނި ގޮތުގައި، ކޮވިޑާ އެކު 17 ގައުމަކަށް ދަތުރު ނުކުރެވޭ ގޮތަށް އޮތްއޮތުން ވެސް ވަނީ ނިމުމަކަށް ގެނެސްފައެވެ. އެ ގޮތުން މިއަދުން ފެށިގެން ސައުދީއަށް ދަތުރު ކުރާއިރު ޕީސީއާރް ޓެސްޓް ހަދާކަށް ވެސް ނުޖެހޭނެއެވެ.
ސައުދީން ކޮވިޑާ ގުޅިގެން އެޅި ގިނަ ފިޔަވަޅުތަކަށް ލުއިދިން އިރު، އެ ގައުމުގެ އިންޓީރިއަރ މިނިސްޓްރީން ވަނީ ބަލިން ދިފާއުވުމަށް ޓަކައި ދޭ ވެކްސިންގެ ބޫސްޓަރ ޑޯޒް ޖެހުމުގެ މުހިންމުކަން ފާހަގަކޮށްފައެވެ.
